Tổng Bí thư Nguyễn Phú Trọng, Mintri Chính trị, mBan bí thư hu peih Nyaom biai pakat negar

Dah page ini di Hà Nội, ala bruk par akaok di Tổng Bí thư Nguyễn Phú Trọng, Mintri Chính trị, mBan bí thư hu peih Nyaom biai pakat negar brei thau cambaih, peih ngak Sarak 13 harei 2-4-2022 di Mintri Chính trị mbang XIII ka jalan cak rok patagok kinh tế - xã hội, khik tani tanat quốc phòng, an ninh bhum ĐBSCL tal thun 2030, pamaong tal thun 2045. Sarak hu caong lac ba mai prein khang piah ka bhum kinh tế praong ĐBSCL ngan haong mblang taneh praong 40.400km2, meda patagok jang dom prein khang ka bruk cak rok patagok dalam pala drak, dui pachreih hu bruk buh jien tame dom gah karei di gauk ngan haong dom tinh, ban dalam bhum, ba mai kein laba saong prein dkhang dalam tukvak anak tal saong rik tame gam haong taneh ia peih ngak jayah Sarak nyaom roya mbang XIII di Đảng.

Brei hu sarak dong blei bảo hiểm y tế; pabak dom sarak daong jien ka urang hu angan je ; ramik veik yaom jien daong tuk nao rivang tangi sua ruak kik, dong tuk kan kandah, alin brei pandap lễ, tết ka urang hu angan je piah lagaih song bruk di urak ni. Nan lac dom panuac cong di Nyaom biai ”Bruk di anak meta song jalan paglaong siam lagaih, peih ngak sarak song patagok bruk ngak di urang hu angan je dalam urang bangsa takik bhum Đông Nam bộ” kayua Ủy ban bangsa pambuak bruk song UBND tỉnh Đồng Nai peih ngak bahrau ni.

Mban pato tacei pacang caga jit ruak saong pasiam viek kinh tế TPHCM hu patabiak bộ tiêu chí taong yaom salamat dalam bruk pacang caga jit Covid-19 ngan haong dom bruk ngak, dom gah dalam tukvak diukrai siam makre bahrau, pacang hu jit ruak Covid-19. Tui nan, ieu kakei taong abih bhap bini, urang hu mbaok tame dom bruk ngak, njauk cuk pataik pacang mbaok; pandar mã QR piah khik ramik khau tin urang tame, tabiak jabat, padang mban tacei jalan pacang caga jit saong kapul salamat Covid-19; hu jalan pacang caga jit di jabat, labik ngak bruk…

UBND tỉnh Long An bahrau peih bruk padang ngak labik ngak cong Nam Thuận di xã Đức Hòa Đông, huyện Đức Hòa ngan song taneh prong labaih 308ha, haong yaom phun jien buh tame ngak abih tih labaih 5.300 tỷ đồng. Labik ngak cong Nam Thuận hu cong lac rik dong tame bruk padang Long An jeng sa labik hadah patagok di labik pabah mbang bhum Tây Nam Bộ.

“Harei pataom Du lịch tỉnh Vĩnh Long mbang ka II thun 2022” bahrau hu peih tabiak di tỉnh Vĩnh Long. Tapa nan piah yaih khan thaot binguk du lịch Vĩnh Long tal tuai damuai, pok manyaom pandap panda du lịch di tỉnh, jhul khang bruk pablei salih, buh jien tame, paglaong bruk pambuak gauk ba mai kein laba daong ka dom doanh nghiệp du lịch, labik ngak mbang pablei salih piah duah thau hatai caong di urang pandar piah paglaong pandap panda du lịch.

Dalam mbang taom gaok Thủ tướng Ukraine, Tổng thống Mỹ hu ndom tal pok jien dong an ninh pabak yaom 800 triệu USD song pok jien dong kinh tế 500 triệu USD ka Ukraine. Tổng thống Mỹ ndom lac, pok jien dong kinh tế pabak ni hu ba tong abih tih pok jien Mỹ rik dong ka Ukraine tagok tal labaih 1 tỷ USD. Gam song nan karja Mỹ brei adat ka rahra Ukraine tal Mỹ dok tạm thời meyah lac rahra Ukraine hu urang Mỹ dong brei.

Liên Hợp Quốc hu panuac pok meyaom bruk kuhria brei ka mbang par pajeng tuai camriep par meng ban ine Sanaa di Yemen tal Jordani hadei di 6 thun oh brei par, ini lac sa bruk ngak hu makna praong di harak sanya padieh cuh dui atah 2 bilan di dom gah di Yemen; gam tui di nan jeng ieu kakei dom gah patui viek peih tabiak dom mbang par yau nan dalam dom harei anak tal.

Urak ni hu takik di abih 34 urang metai song 102 urang karei njauk rambuac dalam 2 mbang patuk gam gam rah tabiak di gah brak Afghanistan harei 21/4. Dalam dom bilan jiak di ni, Afganistan bhian rah tabiak dom mbang tong bom khủng bố hu mong lac meng kol IS./.

Urang lang: Thu Thao – Hani Pha – 22/04