Danak dak jak ba halain hatain alin darah ini dui atah meng harei 2/1 tal 9/3

Mban Khik iek danak dak Mỹ Thuận birau pok tagok Mentri Jalan mbak pajeng ba pasang iek, taong yaom Harak pathau khan roh duah dahlau bruk meda ngak hu di Danak dak buh jien tame padang ngak jalan peih radaih drah samar Châu Đốc-Cần Thơ-Sóc Trăng tukvak ka 1. Tui bruk ba tabiak, danak dak buh jien tame padang ngak jalan peih radaih drah samar Châu Đốc-Cần Thơ-Sóc Trăng hu labik akok pambuak jalan Raya 91 di xã Vĩnh Tế, ban Châu Đốc, tỉnh An Giang; labik puac jalan di xã Trung Bình, huyện Trần Đề, tỉnh Sóc Trăng atah abih tih labaih 188KM. Bruk buh jien tame padang ngak jalan peih drah samar nan rik tame pambuak dom pabah lamnge tasik di Cần Thơ, tapen tasik ia dalam xã Trung Bình, huyện Trần Đề, tỉnh Sóc Trăng, dom ban praong yau Cần Thơ, Long Xuyên, Châu Đốc, pabah mbang negar dunya rah tui jalan taphia negar Campuchia...

Dah page ini, mban tacei jalan jak ba halain hatain alin darah ban raya HCM peih Nyaom biai pataom iek veik bruk halain hatain alin darah thun 2021 saong peih tabiak danak dak jak ba halain hatain alin darah tuk Tết saong Lễ hội Xuân Hồng 2022. Danak dak jak ba halain hatain alin darah ini dui atah meng harei 2/1 tal 9/3, ngan haong jalan ba tabiak lac taduan 44.000 kadung darah. Dalam thun 2021, TP.HCM hu labaih 186.000 mbang urang alin darah, mek hu 84% bruk ba tabiak jak ba dalam thun. Kayua njauk kan kandah di jit COVID-19 nan ye ban raya brei klaak 723 mbang taduan mek darah, trun labaih 65.000 urang tut angan alin darah.

Urak ini, dom po bein amriak kalu di tỉnh Bà Rịa -Vũng Tàu daok tame tuk paik mek asar. Meyah thun blaoh amriak kalu pablei di bein yaom glong abih lac 68.000 đồng sa kg ye urak ini yaom amriak kalu lac 84.000 đồng sa liko. Tui Chi cục Pala drak saong Khik caga phun pala tỉnh, bruk amriak kalu tagok yaom lac biak chreih chrai ka gah amriak kalu, lagaih ka urang pala amriak kalu patagok hadei di rilo thun yaom laik biar. Tui kuhria mboh dahlau yaom amriak kalu meda daok tagok kayua bruk blei tame daok glong, dalam tuk nan amriak kalu bilan birau hu takik.

Dalam dom harei padieh tết Nguyên đán meng blaoh, tỉnh Ninh Thuận hu labaih 50.600 mbang tuai damuai mai rivang iek, padieh padae, rilo jang labaih 75% dut saong tukvak ini thun blaoh; jien mek tame meng dom bruk du lịch hu labaih 35 tỷ đồng. Piah dui pachreih tuai damuai, rilo doanh nghiệp du lịch hu buh jien tame ngak bahrau viek rilo labik rivang main, dom tour rivang main, dom labik tal duh ka tuai dalam tuk Tết yau ye: Vịnh Vĩnh Hy, hang Rái, bein nho, mblang raong pabo, bimon Pô Klông Garai, palei ngak lar am hamu Craoh, du lịch cộng đồng Núi Chúa… Ini lac sa bruk biak bui sambai ka gah du lịch Ninh Thuận dalam thun 2022 ni.

Tui Pasak kuhria dut mboh dahlau bruk langik tasiak pakat negar, ia mbak njom tame Bhum taneran kraong Cửu Long jeng yau tỉnh Kiên Giang mai aval saong di tanut glong jang dut saong dom thun dahlau. Bilan 2 ini, ia mbak njom tame kraong Cái Lớn ngak kan kandah tal xã Vĩnh Phước B, xã Vĩnh Hòa Hưng Nam huyện Gò Quao. Kraong Cái Bé ia mbak ngak kan kandah tal xã Minh Hòa, huyện Châu Thành, xã Long Thạnh, huyện Giồng Riềng. Yau nan ye, Sở Ngak nong saong patagok palei pala Kiên Giang hu panuac ieu dom bhum palei peih ngak dom jalan pacang caga pandiak bhang, njom ia mbak, khik brei ginup ia pruh piah pala drak saong ia pandar dalam bilan thu thun 2021- 2022.

Iran tabiak mbaok tên lửa birau cuh atah jaik 1.500km. Janih birau ini lac tên lửa cuh atah rai ka klau kayua Jabat kapal haok vũ trụ Iran thiết kế saong ngak tabiak. Tên lửa pandar nhiên liệu khang saong meda cuh njauk saong biak samar dom he thong pacang tên lửa. Tukvak caga cuh tên lửa trun daok 1/6 dut saong tên lửa bhian mboh. Iran nan lac sa dalam dom taneh ia hu danak dak tên lửa praong abih di Trung Đông, dalam nan hu rilo janih tên lửa saong hu janih cuh atah tal 2.000km.

Liên minh châu Âu (EU) meda patagok bruk parabha jien padai, jhul samar danak dak klauk jru di dom taneh ia châu Phi daok hu taong yaom lac “kadun likuk” kayua peih bruk klauk vắc-xin suai jang rilo dut saong rilo labik karei di dunya. Dalam nan, EU meda pabak brei 125 triệu ơ-rô, langiu di paok jien 300 triệu ơ-rô hu sanya dahlau di nan piah daong ka dom taneh ia pato tacei dom urang ngak gah y tế jang yau khik piah vắc-xin. Dom urang ngoại giao EU brei thau lac, tukvak pandar vắc-xin katut, labik khik piah vắc-xin hu takik, cơ sở hạ tầng oh siam … ba tal kan kandah brulk klauk jru di châu Phi./.

Urang lang: thu Thao – Bhumi – 10/02