Thun bac ini, Sang bac anek naih angan Họa Mi, daok di xa Buon Don, tinh Dak Lak hu buh jien tame 6 ty dong. Ini lac dom kham merat di bhum palei piah patagok taong abih tal bac tagok 11 tal di sang bac pasak saong 1 tal bac di sang bac pak mbon palei Đrăng Phốk, pabak hatai caong bac megru di 360 uranaih di taong abih xa. Nai gru Trần Thị Thanh Hương, Akaok Sang bac anek naih Họa Mi chreih chrai lac: “Daok di xa bhum atah bayah, bhum tapen langiu negar daok gaok kan kandah, bruk hu Ndang saong Karja sangka buh jien tame co so vat chat laneing lanoi ieu lac bruk daong prein biak praong. Danak dak oh lac daong amaik ame sahnang hatai payua anek bo daok brei kein lagaih piah gru pato sangka, pato megru uranaih siam jang. Ini jeng lac bruk hu makna piah sang bac kham merat jeng sang bac mek hu tanut chuan negar akaok meti di xa.”

Oh lac pakat mam non, dom sang bac tieu hoc saong THCS di dalam xa Buôn Đôn jeng hu sangka buh jien tame co so vat chat. Tuk dom bilik bac laneing lanoi, gru pato mai tal yaok baoh sang piah jak ba anek saih nao bac. Kayua di xa tapen langiu negar ini, anek saih urang bangsa takik hu tal 86% nan piah ka anek saih nao bac hu ginup oh lac bruk mbuan ngak. Ong Hồ Sĩ Lâm, Akaok Sang bac Tieu hoc Y Jút brei thau: “Akaok thun ini, UB Bhap bini xa pato tacei biak tani tanat bruk jak ba anek saih. Mban yam hieu saong gru pato hu nao tal yaok baoh sang piah ngak bruk pilih ruah anek saih di sang. Meng nan, tal ini hu 125 anek saih dalam thun umo hu tabiak tal bac bak ginup. Dom adei tal bac 1 jeng hu pataom piah ngak randap haong sang bac tal bac bahrau.”

Meyah di pakat tieu hoc, bruk jak ba anek saih hu lagaih jang di pakat THCS, bruk ini gilac gaok rilo kan kandah. Kayua rilo adei jeng praong, baoh sang  kathaot rambah nan mbuan ngak ka dom adei padeih bac piah daong amaik ame rilo jang. Dang di anak bruk nan, oh lac karja saong sang bac, bo rilo kapul, urang ngak pahla jeng hu daong gauk piah jak ba dom adei patui veik nao tal sang bac. Võ Thị Loan, Phaok Akaok Sang bac THCS Võ Thị Sáu khan brei lac: “Thun bac ini, sang bac hu 425 anek saih, labaih 80% hu lac uranaih bangsa takik. Piah dom adei sahnang hatai tui bac, taphia bruk daong di karja saong gah pato megru, khol dahlak hulin daok tok hu bruk daong di dom gah pahla. Bingun akaok thun, kong an Ban raya Ho Chi Minh pambuak haong Kong an tinh Dak Lak alin hadiah 16 paok tapuk, 10 chruh radaih juak ka anek saih kan kandah, gam haong 5 kompute ka bilik bac tin hoc. Sa gah ngak mbang pablei salih pablei tabiak di bhum palei jeng alin daong veik 10 sruh radaih juak ka anek saih bhum atah bayah.”

Bruk nan daok hu bruk daong di bhap bini mbon palei. Meng akaok bilan 8, taha palei, akaok mbon palei, dom kapul ndoan the dalam xa jeng jum tangin haong sang bac piah pasang duah, jak ba, khik kajap 100% uranaih hu nao bac njauk thun umo. Amuk H’Đa nê Byă, Bi thu Chi bo Buôn Đôn, xa Buôn Đôn brei thau: “Yaok thun, majam chinh tri mbon palei jeng pambuak haong sang bac pasang duah harak angan, nao tal baoh sang jak ba dom adei dalam thun nao bac. Meng nan, rilo thun ini mai, taong abih 100% uranaih di mbon palei jeng hu nao bac njauk thun njauk umo.”

Ngan haong bruk sangka buh jien tame di Karja, bruk hu mbaok tame daong di karja, bruk abih tung tian di gru pato, bruk sa hatai di amaik ame saong bruk klah rabha di dom gah ngak pahla, thun bac bahrau di xa tapen langiu negar daok di Buôn Đôn, tinh dak Lak brei peih bruk meng dom bruk bui sambai. Ini jeng lac bruk pala urang menuac di bhum taneh daok rilo kan kandah ini./.