Thủ tướng hu panuac dhar phol Rajaei Japon daong samar chip vaccine ka Viet Nam

Dalam mbang rivang akok meti tal negar Japon, page ini, Thủ tướng Phạm Minh Chính hu taom gaok Thủ tướng Nhật Bản dahlau dieh, ong Suga Yoshihide; urang dahlau diah ngak Tổng Thư ký đảng Dân chủ Tự do (LDP), Chủ tịch Liên minh Nghị sĩ hữu nghị Nhật - Việt Nikai Toshihiro saong dom urang di Liên minh. Di var taom gaok, Thủ tướng Phạm Minh Chính brei thau hatai bui sambai tuk mboh talei rohim pambuak dua gah suai lavik praong dalam Viet –Japon daok cak rok patagok siam khang kadang, abih gah, ngan saong hatai jia gah chính trị glong; Thủ tướng hu panuac dhar phol ong Suga Yoshihide saong ong Nikai Toshihiro kham pachreih Rajaei Japon daong samar chip vaccine ka Viet Nam dalam tuk jit ruak Covid-19 daok rah tabiak sraw kadau di Viet Nam tukvak tapa.

Mesup ni 23-11, di inem krung sajarah pakat negar labik pahadar Ngã Ba Giồng (xã Xuân Thới Thượng, huyện Hóc Môn), Kapul urang pal akaok Thành ủy - HĐND - UBND - Ủy ban MT negar Việt Nam TPHCM kayua ong Nguyễn Hồ Hải, Phó Bí thư Thành ủy TPHCM pal akaok kapul hu pok bingu, am cuh gilau pahadar dom bol bhap rahra, urang lin cách mạng, dom urang pal akaok Xứ ủy Nam Kỳ, di tuk pahadar 81 thun harei Khởi nghĩa Nam kỳ (23-11-1940 – 23-11-2021). Ngã Ba Giồng lac sa labik rah tabiak bruk bhap bini Hóc Môn - 18 palei bein hala song Chợ Lớn, Gia Định, Sài Gòn brok tagok pak di melam 22 saboh mesup 23-11-1940 dalam bruk Khởi nghĩa Nam kỳ sajarah dak rai

Mentri Y te brei thau, mbiah tal harei 22/11, hu 24 tỉnh, ban peih bruk klauk jru vaccine pacang Covid-19 ka uranaih umo meng 12 tal 17 thun, dalam nan hu Ban HCM, Bà Rịa Vũng Tàu, Đồng Nai, Tiền Giang, Long An, Tây Ninh,  Bình Dương, Bình Phước…Ta-eng Ban raya HCM tame bruk klauk jru mbang 2 ka uranaih meng harei 22/11. Di tỉnh Đồng Nai, harei 22/11 hu 12 sang bac dalam tỉnh brei ka anek saih tame sang bac gilac veik. Dom sang bac hu palih ruah ngak iek piah anek saih  gilac veik mai bac tapak lac daok dalam bhum hijao.

Meng tuk jit COVID -19 mbang ka 4 tamuh tabiak, labaih 254.000 boh sang ngak nong dalam taneh ia hu Tổng Công ty Bưu điện Việt Nam (Vietnam Post) dong peih gian hàng số mangaok labik pablei salih điện tử Postmart.vn, pablei hu jiak 1.000 tấn kaya nong, abih di nyu nan lac boh kayau, njam patam that… Tui dom urang ilamu gah gah kinh tế, bruk pablei kaya nong biak bahrau bahang ni hu dong ka urang nong langyah bruk pablei tabiak pandap panda, peih tabiak sa jalan pablei kaya nong bahrau, kein lagaih song khang kajap jang.

Tỉnh Bình Thuận brei buh tabiak meng kadung jien karja tỉnh mbang 1 labaih 8 tỷ 800 trieu dong piah daong ka dom kapol nyaom, urang ngak mbang taong chap kaya ikan saong dich vụ duh ka bruk taong iakn di tasik tui Sarak 48 di Thủ tướng Rajaei. Langiu di nan, urang nao tasik dalam tỉnh daok hu daong mesre phun jien piah blei mac, jamraih pandar angaok gilai taong chap ikan labik tasik atah; pandap halang ia tasik jeng ia taba; jamraih ngak khik piah kaya ikan… Bình Thuận hu rilo siam lagaih piah cak rok patagok bruk raong pala, taong chap saong chế biến kaya ikan. Dalam tỉnh urak  hu labaih 1.800 gilai ikan, kaya ikan mek hu labaih 200.000 tấn sa thun.

Bol baka Ukraine harei ni peih bruk pasram mesruh jiak ban ine Kiev, dalam tuk bruk dok catang tagok di jalan tapen negar haong Nga. Ni lac mbang pasram mesruh ka 2 di bol bala Ukraine dalam sa adit tapa. Adit dahlau , gah thủy quân lục chiến Ukraine jeng hu peih bruk parsam jiak palao Crimea, hu pagam tame Nga meng thun 2014. Urang dang akaok gah tình báo bol bala Ukraine ndom lac, Nga dok ba tabiak labaih 92.000 urang lin jiak tapen jalan negar piah caga sa bruk tong tame di akaok thun hadei. Min, Điện Kremlin ndom lac Ukraine song dom đồng minh phương Tây daok ngak brei catang tagok bruk oh hu biak.

Thủ tướng Đức Angela Merkel hu panuac lac dom jalan pacang caga jit Covid-19 pandar ngak urak ini di taneh ia ini oh ka ginup khang piah pasang iek bruk njom mbak mbang ka 4 daok ngak trak damak ka gah y te. Jit Covid-19 mbang ka 4 daok jhul gah y tế di taneh ia Đức ngak bruk tapa prein tuk dom urang birau njom mbak dalam 12 harei tagok jang dua mbang. Piah pacang bruk njom mbak ruak drah samar tal having akaok yau urak ini, dom bang tabiak hukum giới nghiêm ngan saong dom urang oh klauk jru.

Nerak tasuak không khí trak damak dalam dom harei jiak di ni di ban ine New Delhi - Ấn Độ ngak jhak khang tal pren yava di rilo rahra. Tui yaok pataom di sa mbang roh duah ngan saong 25 ribau urang di New Delhi song dom labik dok jiak tapen brei thau, dalam 2 adit tapa hu tal 80% boh sang hu urang ruak dom janih ruak pagam tal nerak tasuak không khí. Bruk không khí di ban ine New Delhi hu dak tame janih "biak kanyah jhak" dalam 8 harei gam gam. Tui dom urang ilamu, bruk taom gaok haong không khí jhak dalam tuk vak atah meda ba tal rilo ruak pambuak tal boh hatai song phổi./.

Urang lang: Hani Pha – Bhumi – 23/11 19:00:00