Urakni, dalam nagar daok jaik 240.000 baoh sang taik tahak khin hu padak pandang, ngak pasiam, ngak barau meng tukvak ni tal puac thun 2025. Thu tuong Pham Minh Chinh pandar Mentri Lao dong - Thuong binh saong Xa hoi pasang iek, bhian pandar ngak, pandar dom bhum palei kuhria iek, ngak pablaoh bruk tui harei, adit, bilan meng tukvak ni tal puac thun brei oh daok baoh sang taik tahak dalam bhum; pandar kuhria bhian harei meng pakat xa, khan brei thau daok hadom baoh sang taik tahak caong khin daong ngak pasiam, khan brei cambaic laic ka bhap bini thau tani tanat tapa rayo papar sap, papar binguk, harak mbao.

Danak dak “Gam thong amaik ame” di Kadung jien Patabiak meng hatai ranam birau peih ngak danak dak Ba bilan Pataih 2, daong ka labaih 100 uranaih metui medhar, uranaih kan kandah daok hu iek glang di 56 baoh sang raong pato padar. Ini lac bruk ngak yaok thun di danak dak, piah pambuak dom adei  thong urang raong dalam tuk uan raok  Tet Nguyen ndan bui sambai. Abih di nyu, danak dak daok peih bruk mbaoh tangin pambuak bruk thong Kapol Urang kumei dom tỉnh Bình Dương saong Đồng Nai. Dalam thun ini, jien peih ngak danak dak ac labaih 3 tỷ đồng, daong ka 200 uranaih metui di klau tinh, ban nan lac Bình Dương, Đồng Nai saong TPHCM.

So Kong thuong Ban raya HCM khan lac darak pasar dak harei dak hu rilo urang blei kaya pandap. Ban raya pabak hu ginup pandap panda piah duh ka Tet thun ni. Danak dak Tani tanat yaom kaom di darak pasar hu kuhria caga blaoh phun jien labaih 22.000 ty ndong, dalam nan labaih 8.000 ty ndong kuhria caga kaya mbang, pandap panda. Dom doanh nghiep sit barau saong darak pasar hu pabak pandap panda Tet yaom kaom tani tanat. Min, ralo labik jang daok susah ka bruk kan kandah di jalan mbak ngak srau dau gal jalan mbak mbuan ba tal bruk pajieng ba pandap that di tuk tabung glaong mbuan tuk hu tuk oh hu.

Urak ini yaom baoh durian di tỉnh Tiền Giang trun khang. Durian pajaih Dona (janaih 1) hu yaom pablei meng 150 -160 ribau dong sa kilo, Ri 6 yaom pablei meng 80 -100 ribau dong sa kilo. Ngan haong yaom nan, po bein trun jien laba dut haong bilan dahlau  meng 20 tal 30 ribau dong sa kilo. Langiu di nan, dom po gilang takik blei saong khan lac jaik kareik pambang gilang piah padeih Tet kayua bruk pablei tabiak negar langiu gaok kan daman. Bruk nan kayua gah Trung Quốc pasang iek  tani tanat jnaih baoh durian nan, dom lo baoh durian oh hu siam njauk bayar gilac veik.

Apui mbang khuah var raong pabui di sang saai Hoàng Văn Tiếp daok di palei Lang, xa Ia Chía, huyen Ia Grai, tinh Gia Lai meng mong 16 minit 8 harei 12/1. Tui pasang akaok mati khan kayua ndien patuh. Pui khuah ngak matai 1.600 pabui teik trak kuhria rah tapa 55kg sa drei, ngan haong khat lahik ralo janih pandap panda. Kuhria abih tih khat lahik jaik 6,5 ty ndong. Hadei di bruk ni, urang pan akaok bhum palei haong dom gah chuc nang hu mai pasang iek, klah rabha saong daong baoh sang saai.

Bruk apui mbang glai di bang California, Mỹ meda daok rah tabiak trak veik dalam dom harei anak tal kayua langik thu lagu saong hangin khang. Harei ini lac harei mbuan rah tabiak bala abih. Karja pak ini brei yoak pluh radaih  pajeng ia mai pabah saong kapal haok pruai jru pacang apui khuah. Hadei sa adit paui khuah glai, takik abih 24 urang metai, labaih 12.300 danak dak njauk yak klak atau khut, labaih 150.000 urang  brei panduan ba nao labik karei. Taneh apui khuah tagok tal 160 km2, ngak khat jien padai kuhria meg 135 tal 150 tỷ dola My, meda jeng bala kayua apui khuah  khat lahik jien ralo abih kuhria meng lavik mai di Mỹ.

Jaik 32.000 baoh sang di nagar Ba Lan, ralo abih lac dom tinh gah Barak, lahik ndien kayua rabuk ia khan. Kuhria grauk nagar, meng harei 9/1, gah daong padam pui khuah Ba Lan daok padam jaik 1.00 mbang pui khuah kayua langik alam kanjah jhak yau phun jaleih, dhan phun jaoh saong talei ndien klaoh. Dom kapul daong padam pui khuah drah samar daok ngak pasiam veik talei ndien ka mikva. Karja bhum palei hu ghak lac ia khan jaleih di pakat 2 dalam bhum ni saong pachreih mikva oh pajan ceik di tuk langik alam daok srau dau.

Roya Mahakumbh Mela praong abih baoh taneh ini hu peih ngak saong dui tah 45 harei hu mbaok di labaih 450 urang agama Hindu dalam saong langiu negar Ấn Độ. Dom urang hu mbaok di Adat roya mboh yau hu brei paklak duisa saong hu daong tabiak truh bruk diuk metai. Jaik tal tuk Adat roya, labaih 150.000 leu tamra padang tagok rah tui tapen kraong Hằng jaik yau ginik biak ralo manuac, dom urang halau janeng, dom urang naih joi, dom urang tu. Gah jalan pasei radaih pui di Ấn Độ hu pabak 98 radaih biak karei, peih 3.300 mbang radaih piah pajeng ba tuai damuai. Karja pak ini hu peih ngak rilo jalan khik brei salamat ka urang nao makak./.