Tui Mentri Pato Megru, tal ini, hu labaih 87% xa dalam negar hu salah blaoh asal kadha Sang bac dalam bruk padang palei pala bahrau, daong paglaong ilamo urang ngak bruk, padang sa bruk khang kajap ka bruk patagok kinh te – xa hoi karo kajap. Min, gah pato megru dalam padang palei pala bahrau jeng daok hu dom bruk kurang, kan kandah. Bruk oh samu gauk di dom bhum palei jeng daok praong; Ndap nda kaya oh samu gauk; Kapul gru pato daok kurang; Asar siam saong bruk karo kajap di dom asal kadha oh ka glaong.

Dom pasak Pato megru bruk ngak - Pato megru thuong xuyen di Binh Duong klak, urak ini lac TPHCM, dang anak rilo bruk kan kandah, abih di nyu lac bruk kurang pandap nda gam gruk pato. Bruk nan ngak kan kandah tak bruk pato saong bac di labaih 12.700 anek saih. Ong Nguyễn Văn Hiếu, Yam ndoc So Pato megru TP.HCM khan lac, urak ini So caong khin brei buh jien tame piah dom sang bac pasang iek, khik brei salamat ka dom anek saih. So jeng ba tabiak jalan palih ruah gru pato, kuhria duah ginup gru patao ka thun bac ini.

UB Bhap bini tinh Lam Dong bahrau padang tabiak Sarak di Thu tuong mbaoh tangin ka Kaya hu yaom glaong pakat begar lac Ragu patau Đắk Sơn. Ragu patau Đắk Sơn hu duah mboh di thun 2014 di xa Nam Xuân, huyen Krông Nô, tinh Đắk Nông klak (ini lac xa Đắk Sắk, tinh Lam Dong), dalam nan hu 16 baoh patau – dalam nan hu 11 baoh patau tamo saong 5 patau jaik tamo. Ini lac ragam ragu meng kal, brei mboh ka raidiuk meng kal dahlau di urang daok di bhum taneh ini meng jaman kal klak, brei mboh halau agha ka urang daok di labik ini meng klak mai di bhum taneh Tay Nguyen.

Harei pakacah limo Bảy Núi thun ini, peih gak di harei 20 bilan 9 ini, di xã Tri Tôn, tinh An Giang. Harei pakacah limo Bảy Núi yaok thun hu peih ngak di bingun  Sene Dolta. Ini lac sa dalam dom harei roya praong dalam thun di bol bhap Khmer Nam bo. Jeng yau dom thun dahlau, po dom yau limo pakacah brei suak sam, yaok mbang hu dua yau limo pakacah. Yau limo halei khang pakacah mbang caneh yau lamo daok veik lac yau limo nao dahlau atau yau limo nao hadei min takai nyu juah tagok ar hamu dahlau limo nao dahlau. Dom gu yau limo mbang caneh hu tame pakacah veik piah mek yai.

Di tinh Vinh Long, bruk ruak pandiak tabiak darah daok rah tabiak srau kadau, hu jaik 4.000 urang njauk ruak pandiak tabiak darah, tagok labaih 2 mbang dut haong tukvak ini thun dahlau. Gah y te bhum palei daok peih tabiak rilo jalan pacang caga catang, gam haong nan jak ba bruk jum tangin di rahra piah patakik bruk pambak praong saong tanuh jit ruak.

Dom gah daok pajadrak rajaei Indonesia samar langyah bruk hadang njom phong xa di sa kong ti negar ini pablei ka negar My. Jabat Khik iek nang luong hat nhan Indonesia khan lac Cesium-137 hu duah mboh dalam hareik bo bhap bini rahra mek ngak jeng ndap nda padang danak dak. Bruk pasang duah alam moi truong labaik atah 5km jeng hu mboh dom labik karei hu phong xa glong. Yau nan min, dom urang jakar oh ka ba tabiak panuac tamat ka bruk njom phong xa.

Rajaei Thai Lan hu ba tabiak adat pakauk pablei hala saong taiy Kratom di jalan ban medin saong jaik sang bac piah khik kajap prein yava saong salamat ka rahra, rilo meng lac anek ranaih saong urang dam dara. Phun Kratom lac sa janih phun nhiet doi patagok di dom negar Don Nam A ngak cadu kan kandah di than kinh, meda ngak randap mahu saong pambak tame trak nan hu rilo negar pakauk atau pasang iek tani tanat ka bruk pandar janih phun ini.

Harei alin yai Emmy 2025, melam jao brei yai praong abih di gah rayo papar binguk My tuk halei jeng hu urang iek cang mong, pachreih hatai urang meda hu peih ngak di melam paguh 14/9 di ban Los Angeles.  Yai thuong ini hu jao brei dom bruk ngak siam mekre njauk hatai meng dom danak dak saong flim binguk, ngan haong Yai Primetime Emmy lac bruk hu makna abih, pok meyaom dom danak dak papar binguk dalam tuk hu rilo urang iek abih di Mỹ./.