Vaccin Covid-19 akaok meti di negar drei ngak tabiak brei klauk caga ruak iek di anek manuac

Daok dom harei tra min, vaccin Covid-19 akaok meti di negar drei kayua Công ty Nanogen di Ban raya HCM roh duah, ngak tabiak brei klauk caga ruak iek di anek manuac. Yau nan min, dom urang ilamu sahaneng lac, bhap bini juai pamaong rilo tame vaccin bo iek lap bruk pacang caga ruak Covid-19, kayua samar drah ye tal puac thun 2021 janih vaccin nan meng hu brei klauk rilo urang di Viet Nam. Urak ini, Công ty Nanogen ngak tabiak hu 5.000 mbang vaccin Covid-19 piah klauk iek di anek manuac.

Tui pathau khan di mban tacei jalan pakat negar, meng bilan 4 mbiah tal urak ni, gah hàng không pajeng ba meng kapal haoh hu peih 307 mbang par ba 65.423 urang mai palei negar, dalam nan hu 440 urang njom Covid-19 di 84 mbang par. Bruk njauk menyai nan lac kuhria meng harei 8/11 tal ni, hu 17 urang duh tuai angaok kapal haoh tapa dut iek mboh dương tính song virus SARS CoV2 angaok 5 mbang par. Tacei pato di mbang ginum biai mban tacei jalan pakat negar pacang caga jit ruak Covid-19 beir harei 7/12 , Phó Thủ tướng Vũ Đức Đam hu panuac ieu ngak brei cambaih laih bruk ni. Ong Võ Huy Cường, Phó akaok Cục Hàng không Việt Nam brei thau : Meng dahlau di harei 16/11, tong abih dom mbang par, dom urang duh tuai angaok kapal haoh jeng brei dok angaok kapan haoh saong oh hu trun sang ga. Vietnam Airlines medhi lac dom urang njom ruak kayua njom di angaok kapan haoh.

Danak dak “Ba Tết mai sang” thun 2021 di Kapul Dam dara CS Hồ Chí Minh pakat negar meda alin labaih 1ribau 150 harak vé kapal haok nao mai, 1 ribau 848 harak vé radaih ôtô nao mai saong dom pandap ka sinh viên, dam dara, urang ngak atah sang hu raidiuk kan kandah mai palei taduan raok Tết thun anek sak Kubao thun 2021. Urang hu palih ruah taduan tui danak dak lac sinh viên, dam dara, urang ngak, urang daok bac megru, ngak bruk di dom tỉnh, ban gah Meraong negar saong sang daok di dom tỉnh bhum kreh negar, Barak negar. Abih di nyu, lac dam dara ngak kong, urang ngak hu hộ khẩu daok di labik njauk khat lahik trak kayua dom mbang ribuk hajan ia sua meng bilan 9 tal bilan 11 thun 2020; Dam dara, urang ngak hu 02 thun tagok oh hu nai palei mbang Tết kayua raidiuk kan kandah. Dom mbang kapal haok par, radaih oh abih jien hu peih dua mbang: Mbang ka sa di harei - 2/2/2021 (lac 21/12 tui saka ia bulan) saong Mbang ka 2 - harei 8, 9/2/2021 (lac harei 27, 28/12 tuyi saka ia bulan) lagaih haong harei padeih Tết di sinh viên, dam dara ngak kong saong urang ngak.

Công an tỉnh Quảng Bình bahrau chap khik hu 5 urang pagam tal bruk tah glai prong rah tabiak di huyện Quảng Ninh, tỉnh Quảng Bình, pataom mek hu labaih 30m³ kayau dom janih. Dom kayau ni hu tah jaleih cang tal tuk halei mbuan lagaih hu dui tabiak pataom di labik peih ngak cuah jiak tatua Khe Liệt di xã Trường Sơn. Tapa duah thau, dom urang nan khan lac dalam bilam 11 thun ni , hu tah 3 phun kayau gõ di labik đội 9, song đội 8 di lâm trường Trường Sơn. Gah chức năng hu chap khik . Urak ni, bruk nan dok hu pasang iek ngak ka cambaih laih.

Biar harei 7/12, di var hop mbao dalam Jabat Mentri Công an gah Meraong negar, pambuak tal bruk 7 urang bị can lac công an Phú Thọ Hoà, quận Tân Phú –Ban raya.HCM mbang jien piah paklak dom urang pablei salih matuy, Thiếu tướng Lê Hồng Nam, Giám đốc Công an Ban raya.HCM brei thau, meda langyah catang dom urang ngak bruk nan. Tui duah thau camereip, dom urang jakar cong an nan ngak suan quyền lợi saong hukum di karja, di bhap bini. Yau nan ye, Cong an Ban raya HCM brei ba tabiak kaoh tui hukum dom bruk pambuak tal catang. Langiu di nan, bruk khik iek gah cong an, Mban Yam ndoc Công an Ban raya HCM tacei Công an quận tân Phú brei pasang iek kiểm điểm kapol jakar, urang angaok nan caik rah tabiak bruk suan chung hukum.

Meng bruk lac akaok Ủy ban ASEAN di New York thun 2020, Kapul Việt Nam di Liên hợp quốc harei 07/12 hu peih mbang nyaom tapak piah mong iek veik dom bruk ngak di Ủy ban dalam thun, jao bruk akaok Ủy ban ASEAN di New York thun 2021 ka Brunei song ginum biai ka jalan ngak dahlau bo dom negar ASEAN meda jhul tagok di Liên hợp quốc dalam tuk vak anak tal.Tui panuac ba tabiak di Việt Nam, mbang camereip, asar kadha pambuak bruk song ASEAN jeng hu jhul tagok bruk ginum biai di Hội đồng Bảo an LHQ. Njauk caik hatai lac, jeng dalam thun 2020, Việt Nam hu ba tabiak bruk, ginum biai song jhul samar jak jeng di Đại hội đồng LHQ tapa sarak pambuak bruk LHQ-ASEAN song hu rilo di abih lac 120 negar LHQ hu mbaok tame dong. 

Hãng tin AFP taong yaom dom bruk kham merat di gah Tổng thống Mỹ Donald Trump piah bleih salih bruk palih ruah tổng thống thun 2020 oh hu yau hatai. Saong abih patih tukvak paje. Yau ye, ralo urang cử tri di kapol brei caga kuhria brei buh phiếu palih ruah tổng thống di harei 14/12. Saong harei 8/12 nan lac 6 harei dahlau harei dom urang cử tri buh phiếu puac abih piah langyah dom bruk kan kandah hukum hadei palih ruah di Mỹ pakat tiểu bang.

Yaok thun tal harei 8/12, urang takre ragam ragu dunya ba gauk hadar veik harei lahik di ca sỹ hu angan je John Lenon – po di dom kadha doh ndung bak hatai anit ranam song kadha siam mekre. Thun ini, pahadar 40 thun harei lahik di Rốc Giôn Lê-nân, rilo hãng truyền thông prong di dunya dalam nan hu rayo papar sap song thu âm ABC di Mỹ bahrau di ni hu ngak sa danak dak ragam ragu song hu mbaok di rilo urang daoh hu angan je prong di dunya piah ndom ka urang daoh ragu rốc ni./.

Urang lang: Ái Nghiêm – Hani Pha – 08/12 10:34:24