Rajaei birau patabiak Sarak ka 277 tacei pato ngak tui Sarak ka 218 di Quoc hoi pato megru pakat mam non ka uranaih umo meng 3 tal 5 thun. Tui nan, bruk ngak tal thun 2028, hu meng 50% dom tinh, ban tagok hu pato bac mam non ka uranaih umo meng 3 tal 5 thun. Bruk njauk ndem tal di Sarak lac daong var huak jala pandiak, brei ka uranaih  di dom bhum kan kandah, baoh sang urang bangsa takik lac 360.000 dong sa bilan.

VTV9 peih bruk “Taong abih bhap bini pacang caga pachot pagat” piah paglong jalan sahaneng,  khik caga bhap bini anak bruk kol pagat tapa mang biak kan thau. Ini lac bruk jak ba ngak daong ka bhap bini hu thau saong caga anak bruk pagat, bo daok klak rabha ilamo ka bruk khik rup drei jeng yau bhap bini. Kong an dom bhum palei yau Ban raya Ho Chi Minh, Dong Nai, Tay Ninh…pambuak bruk tacei ba ngak. Tui Kong an, dalam 8 bilan akaok thun ini, Viet Nam hu labaih 1.500 mbang pagat tapa mang, ngak khat lahik labaih 1.660 ti dong.

UB Bhap bini Ban Can Tho birau caong khin dom so, dom gah, bol lin saong UB Bhap bini dom xa, phuong hu gilai taong chap ikan samar peih ngak catang, siam lagaih dom bruk pacang caga taong chap ikan suan hukum, oh pathau khan saong oh tui hukum IUU di bhum palei ini. Dalam nan hu dom don vi kham ngak siam saong pacang klaoh yaok bruk pambak tal hukum IUU, taduan bruk anak Thanh uy, UB Bhap bini saong Akaok UB Bhap bini Ban Can Tho meyah caik rah tabiak bruk ngak suan.

Kayua ribuk ia sua saong ia ndik, gam hajan praong dalam bilan 10 ini ngak ia dauk dom labik di tinh Dong Thap. Kuhria abih tih tui jien khat labaih 8 ti 600 trieu dong. Urak ini, karja gam haong bhap bini ramik pasiam saong ngak kajap dom labik mbuan glut jaleih. Urak ini, ia daok tagok tui ia ndik saong glong jang pakat III labaih meng 0,1-0,3m, mbuan ngak glut jaleih ralo labik.

Rilo jalan ar kraong, ar tathik di tinh Vinh Long daok glut jaleih trak. Di xa Nhị Long, jalan kraong ribaong tame ribaong ia Cái Hóp, dua gah ar glut jaleih atah labaih 1,1 km, yaok thun mbang tame meng 1 tal 2 met, ngak jhak tal jalan nao mai dalam palei. Rilo ar pacang dom palei Mỹ Hiệp, Mỹ Hiệp A, Đức Mỹ A jaleih tah jaik 2km, hu labik jaleih lih tame dalam tal 4m. Njauk ndem tal ar kraong palei Đức Mỹ lahik abih 65 met.

Tui So Y te Hong Kong – Trung Quoc, kuhria tal mon 17 tuk harei 22 bilan 10, bhum taneh ini hu urang metai akaok meti kayua padiak Chikungunya. Tui Pasak Khik caga prein yawa Hong Kong, dom ruak trak saong metai kayua pandiak Chikungunya bhian takik gaok, hu rilo urang metai ala sa ribau. Dom ruak trak kayua prein yawa di urang ruak. Kuhria meng akaok thun tal harei 30 bilan 9, di 40 taneh ia di dunya hu labaih 445.200 mbang urang pandiak Chikungunya saong 155 urang metai.

Trieu Tien brei thau hu cuk iek 2 ten lua takik kanyi samar, iek ini lac “ dom phao karaong hu makna praong birau” daong pakhang bruk “ pacang mesruh metak” di Binh Nhuong. Tui Hang thong tan trung uong Trieu Tien bruk cuk iek ten lua nan dalam danak dak patagok prein khang pacang caga salamat taneh ia, piah “paglong kajap saong brei mboh phao karaong mesuh metak ka dom taneh ia karei hu thau tal”.

Tong thong My Donald Trump brei thau ong klah bruk taom gaok Tong thong Nga  Vladimir Putin saong khan lac tukvak urak ini oh lagaih saong dom mbang ginum biai kan njauk yau hatai caong khin, saong pagol sanya meda taom mbaok hadei tuk hu lagaih. Urang ngak praong di Mỹ lac dom mbang taom gaok haong Nga tukvak tapa “ rilo mbang oh hu siam”. Yau nan min, ong khan lac tong thong Nga “ daok khin biai veik”./.