Phó akaok negar Võ Thị Ánh Xuân, Akaok Hội đồng daong kadung jien daong ka uranaih Việt Nam

Patui danak dak mbang nyaom oh kuhria dahlau mbang ka sa, harei ini 10/1, dom urang QH ginum biai online ka Bruk buh jien tame ngak Danak dak padang ngak jalan nduac samar Bắc - Nam gah Timun vaktu 2021 -2025. Harak pathau khan di Rajaei ieu ngak pabak 729km jalan nduac samar, parabha jeng 12 danak dak meda ba tame ngak, pandar eng, kuhria dahlau taong abih phun jien buh tame ngak labaih 146 ribau 990 tỉ đồng. Akok mentri Jalan mbak pajeng ba Nguyễn Văn Thể brei thau meda kham merat dalam thun 2022 peih ngak brei salah taong abih harak gal buh jien tame ngak, piah 3 thun daok veik pataom tame padang ngak dom danak dak praong saong caong khin karja palei pambuak khang kajap piah peih ngak danak dak, abih di nyu lac bruk peih taneh. Jeng dalam harei ini, dom urang QH ginum biai online ka Hukum pasiam veik, pabak dom kadha di 8 hukum. Nan lac, Hukum Đầu tư công, Hukum Đầu tư tui jalan pambuak công tư, Hukum Đầu tư, Hukum Đấu thầu, Hukum Điện lực, Hukum Doanh nghiệp, Hukum Thuế tiêu thụ đặc biệt saong Hukum ngak tui án dân sự.

Bier harei kabroi 9/1, di jabat Akaok negar, Phó akaok negar Võ Thị Ánh Xuân, Akaok Hội đồng daong kadung jien daong ka uranaih Việt Nam, taom mbaok 50 urang daong hu angan je, hu dom rik daong praong ka dom bruk ngak di uranaih thun 2021, dalam danak dak “Dhar phor dom hatai ameh”. Thun bloh, kadung jien daong uranaih Việt Nam hu jak ba labaih 92 tỷ đồng saong daong ka labaih 115 ribau uranaih njauk kan kandah kayua jit COVID-19, daong dinh dưỡng tapa dom danak dak, daong padang ngak sang bac, tal bac, labik ma-in, dom danak dak blac raih, alin hadiah sruh radaih juak, jien bac. Tui Phó akaok negar, yaom lac njauk kan kandah di jit ruak, min dom doanh nghiệp, dom urang ngak pahla oh trun nao bruk rik daong kadung jien. Ini lac sa bruk brei mboh hatai anit ranam di dom urang ngak pahla ngan haong uranaih Việt Nam. 

Dalam Ban raya HCM urak ini oh daok quận, huyện hu jit pakat 3 lac bhum katam. Kurhia meng tuk jit Covid-19 tamuh tabiak, ini lac mbang akaok meti jit Covid-19 di Ban raya HCM hu pakat 1 saong ban raya hu jeng “bhum hijao” nan lac bhum siam mekre dalam tukvak birau. Dalam nan, dalam ban raya hu 18 quận, huyện pakat 1; ta-eng quận 1, 10, Bình Thạnh saong Ban Thủ Đức daok jit pakat 2. Yau nan, ta-eng Ban Thủ Đức jit tagok meng pakat 1 tagok pakat 2; dalam tuk 3 quận jit trun meng pakat 2 daok pakat 1 lac quận 4, 11 saong Tân Phú.

Meng pataom prein tame khang ka bruk pacang caga jit Covid-19 nan ye dom urang njom ruak Covid-19 di rilo tinh, bal dalam bhum taneran kraong Cuu Long trun khang dut saong dahlau di nan. Rilo bruk ngak hu peih ngak veik yau dahlau, daok peih ngak iek bruk brei ka anek saih nao bac tapak. Pagap yau: UBND tỉnh Sóc Trăng bahrau brei tamat tukvak pacang tabiak jalan piah ba mbuan lagaih ka bhap bini pablei salih. Akaok UBND tỉnh Bạc Liêu brei patrun pakat jit di tinh meng pakat 3 lac labik mbuan njom glaong (bhum katam) trun daok pakat 2 – lac bhum njom mbaih (bhum kanjik). Di tỉnh Hậu Giang, anek saih tal 12 hu nao bac veik tapak di huyện Vị Thủy, huyện Long Mỹ saong ban sit Long Mỹ meng harei ini.

Harei 9/1, Cục Cảnh sát hình sự, Mentri Công an brei thau lac hu cap khik hình sự Phan Thành Ngọc Minh (34 thun) haong dom urang karei dalam kapol ma-in mbia di Ban raya HCM saong tỉnh Bà Rịa - Vũng Tàu, saong yaom jien abih tih lac 300 tỉ đồng. Dom urang nan main biak kandauk, blaik saleik; Bruk jao, taduan phơi đề, tài khoản cá độ caoh mbanh, kuhria jien mbang, lah tapa zlo, Viber piah palaik njiak dom jabat chức năng thau, jien ma-in mbia hu dom urang nan jao brei tapak tangin.

Akaok mintri Y tế Cộng hòa Cyprus Michalis Hadjipantelas brei thau sa biến thể bahrau di virus SARS-CoV-2 hu caik angan lac Deltacron hu duah mboh di taneh ia ini. Biến thể bahrau hu gam bruk di truyền di biến thể Delta gam haong dom đột biến di Omicron. Jabat Gah Y tế dunya (WHO) di châu Âu hu panuac lac mbang njom mbak Omicron di dunya urak ini meda ngak brei tagok bruk mbuan tamuh tabiak biến thể bahrau kan kandah jang.

Rajaei Kazakhstan brei thau lac hu cap mek labaih 5.000 urang trun jalan ngak sraw kadau megei taneh ia ini dalam adit blaoh. Tui kuhria khat lahik drap ar kayua dom urang nan palai pajoa lac jaik 200 trieu USD. Labaih 100 D.N saong gilang pariak njauk kol nan tame blah mek, labaih 400 radaih njauk am cuh. Urak ini, bruk sraw kadau di Kazakhstan daok pacang hu. Dom jabat peih ngak tui hukum Kazakhstan hu padang 70 balai pasang iek, ngak bruk gam gam di gruak labik dalam negar piah pacang cakak bruk swau kadau rah tabika gilac.

Rajaei bang Minas Gerais di Brazil brei thau, hu takik di nyu 5 urang metai saong 20 urang karei lahik hadei di tuk sa daning ciek praong jalieh trun ngak ka 3 sruh glai pajeng tuai di Labik main sinh thái danao Furnas di Ban Capitólio -gah Đông Nam bang ni. Bala rahtabiak di maong 11 dah page harei 8-1 (tui maong pak nan) jeng ngak ka 32 urang karei njauk rambuac./.

Urang lang: Thu Thao – Bhumi – 10/01 10:48:52 AM