Ong Lê Sơn Hải caong lac bhap bini pandar siam lagaih bruk daong ba di Kanja

Harei 11/1, di Ha Noi, Uy ban Bangsa peih Nyaom biai pataom iek veik bruk ngak tui Sarak ka 45/QĐ-TTg di Thủ tướng Rajaei ka bruk “Brei dom janih mbao, tạp chí ka bhum urang bangsa takik saong bhum ceik, bhum biak kan kandah” tukvak 2019 -2021 saong ba tabiak jalan ngak ka dom thun anak tal. Brei panuac tamat mbang nyaom, Akok mentri, Akok UB bangsa Hầu A Lềnh lac, dalam tukvak yau urak ini, bhap bini bhum pamaong tal di danak dak daok gaok rilo kan kandah, mbao in hu makna praong dalam bruk pathau khan. Nan ye, dom jabat hu mbaok tame peih ngak danak dak brei patagok bruk pambuak gauk dalam pathau khan, pambuak gauk peih dom mbang nao puk palei saong peih ngak biak siam bruk ba hrak mbao tal bhap bini.

Jeng dalam harei nan, di xã Xuân Hưng, Huyện Xuân Lộc, tỉnh Đồng Nai, Thứ trưởng, Phó akaok Ủy ban Bangsa Lê Sơn Hải haong kapul ngak bruk di Ủy ban Bangsa hu mai rivang, alin hadiah 20 paok pandap Tết, yaok paok yaom 800 ribau đồng ka bhap bini bangsa takik sang kan kandah, urang hu angan je, sang sarak kanja lac bangsa takik. Ong Lê Sơn Hải caong lac bhap bini pandar siam lagaih bruk daong ba di Kanja; patui jalan patagok bruk sahneng duah bahrau dalam cak rok patagok kinh tế piah oh padieh paglaong siam mekre raidiuk di drei, di dalam sang. Tapa nan, rik tame bruk cak rok patagok puk paga, palei negar.

Tui bruk ba tabiak di Ub bhap bini tỉnh Bình Thuận birau ini, gilai taong chap ikan meng halam njol katung, giã cào bay…saong dom po kapal dalam angan gilai taong ikan suan hakum, oh pathau khan saong oh tui bruk ba tabiak ye oh hu UB bhap bini tỉnh brei ngak birau, pasiam, apah atau blei kapal ikan ngak mbang tasik. UB bhap bini tỉnh Bình Thuận jeng ba tabiak cambaic laic dom tanut đặc thù ka gilai atah, pandap ngak, prein khang di mac…ngan saong gilac ngak birau, pasaim veik, gilai apah, blei ngak mbang di tasik.

Dah page ini 12/1, kapul dom gah pambuak gauk pacang caga pablei salih pandap pakauk tỉnh An Giang brei thau, bahrau duah mboh labaih 446.000 kalaok, paok jru Khik caga phun pala, jru pacang halak dom janih abih tukvak pandar. Tapa pasang iek, kapul chức năng hu mboh di labik pablei jru khik caga phun pala Được Mùa, daok di labik 103 jalan Cử Trị, khóm Vĩnh Phú, phường Châu Phú A, ban Châu Đốc, kayua amuk Hà Minh Hằng, umo 58 thun, ngak po, hu labaih 446.500 kalaok, paok jru Khik caga phun pala, jru pacang halak dom janih abih tukvak pandar. Tui kapul chức năng tỉnh An Giang, tukvak jaik di ini, di dalam tỉnh An Giang, bruk pablei salih, ngak tabiak jru Khik caga phun pala oh siam, abih tukvak pandar saong oh hu asal cambaih laih ngak kan kandah trak tal urang nong dalam bruk pala drak.

Harei ini 12/1, Công an tỉnh Đồng Nai brei thau ka bruk taong tayah kapol nyaom dui ba urang ngak kumei ma-in tapa internet, mek chip 8 urang piah duah thau ka bruk dui ba urang ngak kumei ma-in. Ta-eng Nguyễn Xuân Hoàng ndih tapui thun 1985, daok di Quận 3, Ban raya Hồ Chí Minh taduan lac urak ini daok tui khik jaik 200 urang kumei ma-in di rilo tỉnh, ban dalam negar. Kuhria rah tapa yaok bilan Hoàng mek jien tame meng bruk dui ba urang ngak kumei ma-in labaih 1 tỷ đồng. Ini lac bruk ngak naih joi di gah Công an Đồng Nai dalam tuk tabung glong pagui mek dom janih toi pham khik an ninh trat tu tuk Tet Nguyen dan thun sak Rimong 2022.

Gah Y tế dunya WHO harei 11/1 kakei lac oh njauk maong COVID-19 lac sa janih ruak dreih yau cúm, bo njauk lac sa jit praong. Tui nan, urak ini di dunya jeng daok rilo bruk ka oh thau cambaih ka biến thể Ô-mi-crôn. Janih biến thể ni daok njom mbak biak samar, ngak ka dunya gaok rilo kan kandah nan ye ka oh maong COVID-19 lac sa janih ruak tok hu di dom labik. Gah Y tế dunya jeng mboh lac, brei hu rilo jang dom roh duah piah mboh lac vắc-xin COVID-19 urak ini hu pabak bruk daong khik caga ginup piah pacang viek biến thể Ô-mi-crôn halei oh.

Hãng kapal haok Iu-nai-tịt (United) di Mỹ harei 11/01 brei thau 4% dalam taong abih urang ngak bruk di hãng ini pak Mỹ, labaih 3 ribau urang njom Covid-19. Yau nan min, oh ka hu thei dalam dom urang nan tame sang iek ruak atau metai. Bruk urang ngak bruk njom Covid-19 tagok rilo saong brei daok karei ngak kan kandah biak ralo tal bruk ngak di dom hãng kapal haok di Mỹ dalam tukvak tapa. Dom hãng kapal haok Mỹ brei klaak labaih 30 ribau mbang par kuhria meng puac bilan 12 kayua kurang urang ngak saong langik oh lagaih.

Sa kapul langiu rajaei di Tây Ban Nha brei thau, 43% bhap bini Haiti daok gaok bruk lahik an ninh pandap mbang. kapul ini hu ba panuac di Liên hợp quốc (LHQ) brei thau Haiti caong hu jaik 254 triệu USD piah langyah ka bruk ini. Sa dalam makna praong ba tal bruk ini, lac mbang bala magei baoh taneh rahtabiak di bilan pandiak thun blaoh ngak ka labaih 2.000 urang metai, 12.000 urang njauk rambuac saong 800.000 urang lahik sang danaok atau bruk ngak mbang duah jien. Taphia di nan, bruk chính trị srau kadau, tabung glaong lac bruk pametai Tổng thống Haiti Jovenel Moïse di bilan 7 thun blaoh gam haong bruk meriak gauk dalam xã hội ngak ka taneh ia ini dak harei dak laik dalam tame kan kandah./.

Urang lang: Thu Thao – Bhumi – 12/01