Page ini 5/9, yaok pluh trieu anek saih saong gru pato di dalam negar hu chreih chrai raok harei peih pakak thun bac 2026-2027. Harei peih pakak thun ini hu peih ngak samu dalam negar negar tui jalan tapak pambuak haong online. Thu tuong Rajaei Lê Minh Hưng hu mbaok saong ngak adat peih pakak di labik pambuak riyak rayo papar sap pabar binguk pasak di Sang bac Pho thong gam daok gam bac Mường Khương, tinh Lao Cai. Bruk naih gheih di Harei peih pakak lac peih pakak, jao sang bac saong ba tame pandar sang bac pho thong gam daok gam bac pambuak pakat di dom xa tapen negar hu ginup kein lagaih. Kadha ini, brei mboh bruk sangka praong dalam di Ndang, Karja ngan haong beuk patagok pato megru saong pato pakai, rilo meng lac pato megru bhum mikva urang bangsa takik, bhum ceik, tapen negar, kaoh pulao.

Harei ini, labaih 2,6 trieu anek saih TPHCM hu tame thun bac birau, tame thun bac birau caong khin paglong bruk pato bac saong hu labik bac da-a siam jang ka anek saih. Thun bac ini, TPHCM tagok labaih 96.000 anek saih dut saong thun bac dahlau, yau nan ye ban raya brei buh tame labaih 3.800 ti dong, ba tame pandar labaih 1.000 duk bilik bac birau saong pabak labaih 800 duk bilik bac. Ini lac bruk kham merat jhul pasamar bruk ngak “ 150 harei melam ngak salah 1.000 duk bilik bac birau”.

Ban raya Can Tho bahrau peih padang danak dak Buh jien tame ndap nda kaya gah pato megru daok dalam dom phuong Mỹ Xuyên, xa Hòa Tú, Gia Hòa, Nhu Gia, Ngọc Tố dahlau diah daok dalam huyen Mỹ Xuyên, tinh Soc Trang. Danak dak hu taong abih jien buh tame jaik 62 ty dong. Ong Nguyễn Văn Khởi, Phaok Akaok UB Bhap bini ban raya Can Tho ndom lac, danak dak hu makna biak lagaih, suai atah; daong dak harei dak salah blaoh kaya ndap nda sang bac saong brei mboh bruk sangka ka rai rah dam dara.

Harei ini, gah jalan pasei hu peih pablei harak ve radaih apui Tet Dinh Mui 2027 – Pabaiy Jim Luac. Tui Dhar Jabat pajeng ba jalan pasei Sai Gon urang bei harak ve tapa dom blah khaw tin dien tu, ung dung pablei ve online, di dom sang ga, tong ndai 1900.1520. Tuai damuai blei harak ve aval dahlau hu trun jien meng 5% tal 20%; blei harak ve  mai veik 5%. Anek saih hu trun jie ve 20%; uranaih umo ala 6 thun oh abih jien ve nao gam urang praong; Dom urang dalam sarak xa hoi trun meng 30% tal 90%.

UB Bhap bini tinh Dong Thap, bahrau caong khin samar chip paglaong peih ngak dom jalan pacang caga ruak meruai gila di anek menuac saong athur, oh luai ka jit ruak rah tabiak srau kadau. Meng akaok thun tal ini, Dong Thap hu taduan 10 labik jit ruak meruai gila di asau saong 2 urang metai kayua ruak meruai gila. Kayua nan, bruk patagok dom bruk pasang iek, klauk jru caga saong langyah dil samu dom bruk medil ka njauk ruak lac bruk njauk ngak samar chip piah patakik bruk mbuan ruak meruai gila pambak tapa menuac urang.

Mỹ klak angan Triều Tiên tabiak sarak dom taneh ia meda hu taduan bruk daong meng negar langiu dalam thun jien padai 2027. Bruk Triều Tiên hu angan dalam nyao  dom taneh ia ini lac mai meng rilo bruk kurang di hukum Mỹ, ba tal taneh ia ini oh hu taduan dom danak dak daong jien ndo di Washington tapa Kapol Thach thuc thien nien ky (MCC).

Kong suat ndien ia harei pagam di Trung Quoc hu 1.286 ty kW mbang akaok meti truh tapa ndien dang, brei mboh bruk salih praong dalam co cau nang luong di negar ini. Ini lac mbang akaok meti ndien ia harei jeng halau ndien hu kong suat pagam praong abih di negar ini. Trung Quoc lac negar tathuak nerak sang kreih camin praong abih dalam dunya, sanya ba dom tathuak nerak carbon mek hu glaong abih dahlau thun 2030 saong mek hu trung hoa cardon di thun 2060.

 Honduras ba tame 233 do thi tame tanut kakei ka pandik bhang kayua langik El Nino. Dalam dom bhum palei gaok kan kandah, 103 do thi dang di tanut bhong. Rilo labik thu lagu, talah ra-ai taneh kayua kurang ia. Bhap bini khan lac, rilo taneh pala tangei saong ratak metai abih, dalam tuk ia ka athur raong dak harei dak kurang ia. Ia di Honduras hu meng 100 -200 mm./.