Ong Lâm Hoàng Mẫu, Yam ndok So Bangsa saong Aguma Ban raya Can Tho, brei thau, bruk daong urang pato sap, akhar Khmer hu peih ngak dalam rilo thun. Bruk bahrau di sarak lac peih praong bruk daong ngan haong dom labik pato sap Khmer di sang baha, sang ilamo, labik sang bac di ban raya. Tui nan, urang pato sap saong akhar huroh Kmer hu daong 50.000 dong/tiet, rilo abih 12 tiet/adit/tal bac, dalam tukvak oh tapa 2,5 bilan yaok thun. Sarak hu peih ngak meng bilan He thun 2026 tal abih thun 2030, khik kajap bruk daong hu njauk menuac njauk urang.

Ban Can Tho brei peih bruk “ Nyaom darak pasar Kaya mbang Ia bulan pataom mbaok – Kaya mbang Tây Đô” dalam adit blei pandar saong kaya mbang Can Tho meng harei 25/9 tal harei 4/10 anak tal, di Ban nao tabak Ninh Kiều, hu labaih 100 labik kaya mbang, OCOP, pablei salih, ilamo. Tapa nan Nyaom darak pasar, Mban peih buk pamong tal labik ma-in sambai, rivang iek saong pataom mbaok  bhap bini, tuai damuai dalam tuk Tet Trung thu thun ini; tui nan pakhang bruk pambuak doanh nghiep, labik ngak tabiak kaya kan, nghe nhan – urang gheih ngak, dom po kaya OCOP haong urang blei.

Tinh Vinh Long ba tabiak jalan ngak dalam thun ini hu takik abih 50 kaya ndap nda OCOP mek hu meng 3 patuk ba tagok hu mbaoh tangin. Gam haong patagok kaya, tinh sangka iek praong paglaong asar siam, padang angan je saong peih praong darak pasar pablei kaya kan. Bruk patagok OCOP hu pagam haong jirah rivang palei pala, palei ngak bruk saong khik ramik dom ilamo siam gheih di bhum palei, daong brei bruk ngak, parilo jien mek tame ka rahra. Urak ini tinh Vinh Long hu 980 kaya OCOP.

Bộ Tư lệnh Quân đoàn 34 birau peih bruk alin brei sarak di Akok Mentri Quoc phong ka bruk palih ruah bol lin chuyen nghiep thun 2026 ka muk  Rmah H' Thiệp - lac diuk kamei di ong Kpă Thiệp. Muk Rmah H'Thiệp (ndih tapui thun 2003) hu palih ruah tame Bol lin bhap bini Viet Nam, pakat quan ham Thieu uy bol lin bhap bini chuyen nghiep. Dahlau di nan, dalam dom harei padeih ngak nao rivang sang di tinh Gia Lai, urang jakar bol lin  Kpă Thiệp mboh dua urang ndien handoh oh huac hagait samar daong ka urang. Dua urang nan diuk, daok sa-ai Kpă Thiệp plang lahik.

Hadei dom harei amaik ame dak talei dang cang meng hadah page, bruk blei tapuk bac megru di Gah patabiak Pato Megru di Ban raya HCM hu patrun. Dom urang mai blei hu patrun rilo, tukvak cang hu dui katut, dom amaik ame tok lahik dom minit piah salah blaoh bruk blei tapuk ka anek. Lambaok Gah patabiak Pato Megru brei thau, amaik ame meda cang sang bac pabak tapuk salih ka bruk nao tal labik pablei tapuk.

Tapuk ky luc Guinness dunya thun 2027 birau khan brei thau ka dom bruk ngak hu oh ka bhian mboh di manuac sia dunya. Dalam yaok ribau ky luc nan saong biak karei hu ndem tal mac pluh thu mbuk praong khong lo, atah 1,75m, glong 1,6m; athaik umo 4 thun di Anh glong 199 cm; tapuk hu tavak ky luc di Emma Phillips, negar New Zealand payeng kapan kayau di takai 77 mbang dalam 30 giay…

Rilo urang chreih phling ragam hu pataom di Rio de Janeiro, Brazil piah hu mbaok tame harei raya phling ragam praong hu cang maong abih dalam dunya. Thun ini, Rock in Rio dui atah tijuh harei haong band phling ragam rock Mỹ Foo Fighters me-in dalamharei akaok meti. Langiu di nan, danak dak peih pakak daok hu mbaok di band phling Rock Thụy Điển The Hives ga haong rilo urang seni karei.

Sa mbang co blah Gilang khik piah drap ar Renoir di gah meraong negar Pháp. Nyu klaik 4 blah thaik binguk. Dua blah thaik nan hu mek veik, dalam 2 blah thaik daok veik oh ka duah mboh. Munyim parang iek 13 blah rup thaik di Renoir gam labaih 40 blah kaya sarak, ndap nda dalam sang saong thaik binguk. Dom kadha hu yaom glong abih di Gilang khik piah nan bhian pablei yaok pluh trieu dola My.