Kapul ngak bruk pato Tacei pakat negar ka bruk roh duah, pataom saong ngak tantu angan je atau talang bol lin (Mban Pato tacei 515 pakat negar) kayua Thuong tuong Lê Quang Minh, Phaok akaok Tong cuc Chinh tri, Uy vien Mban Pato tacei 515 pakat negar ngak akaok kapul, harei kabroi 8/9 hu pasang iek ngak “Danak dak 500 harei malam jhul khang bruk roh duah, pataom saong ngak tantu angan je atau tlang bol lin” di Quan khu 9. Ndom ka pato tacei, Thuong tuong Lê Quang Minh caong khin Mbang Pato tacei 515 Quan khu 9 brei pabak dom jalan langyah piah paglaong siam lagaih bruk roh duah, pataom atau talang bol lin. Yaok bilan, yaok quý brei caong khin Mbang Pato tacei 515 dom bhum palei ngak siam bruk pathau khan, dil samu pato tacei, dui ba dom bruk kan kandah, tavak tavaiy… meng nan meda daong, brei mboh hatai kham merat ka chinh tri.

Harei kabroi 8/9, dom bol lin ngak bruk duah pataom atau talang liet si di Bein bingu Lê Thị Riêng, TPHCM patui peih praong, kuac duah di labik khu A. Tui nan, Kapol K74 kuac duah, oh mboh atau talang liet si. Dahlau di nan, di Khu A di Bein bingu Lê Thị Riêng, bol lin ngak bruk brei panduan ba mbia patau  pahadar nao labik karei piah kuac duah. Bruk panduan ba mbia pahadar hu ngak tui ilimo lagaih piah khik siam tamo makna sajarah dakrai.

Tinh Ca Mau daok peih padang Paok Inelang du lieu piah palagaih saong paglaong ka bruk pasang iek, pandar drap ar du lieu taka so. Bruk salah blaoh Paok Inelang du lieu lac bruk njauk hatai hu pabak, klah rabha saong pandar du lieu di dom jabat karja; dak harei dak pabak hu hatai caong pambuak haong co so du lieu negar, gah bruk ngak saong dom nen tang taka so. Ini lac bruk hu makna dalam duh bruk pato tacei, dui ba, langyah harak gal karja, pabak jitvu karja saong daong patagok karja taka so, kinh te taka so, xa hoi taka so.

Urang brei apah, brei nyim, alin tai khoan gilang pariak, the gilang pariak, tai khoan vi dien tu…taong phat tal 10 trieu dong. Ini lac asar kadha di Sarak ka 330 kayua Rajaei ba tabiak, taong phat hanh chinh dalam gah an ninh mang saong khik caga du lieu di urang. Jien taong phat tagok 20 trieu dong ka bruk ngak ja angan je, harak gal atau ho so ja piah padang doanh nghiep, peih atau tut angan meyao meyit jien padai. Taong phat jien glong  abih tal 100 trieu dong ka bruk peih tai khoan so oh njauk bruk ba tabiak, harak gal atau pandar khaw tin ja.

Malam kabroi 8/9, di mblang caoh balaong Quy Nhơn, Raya Pahat padhih tinh Gia Lai mbang ka I thun 2026 hu peih pakak. Raya thun ini hu peih 21 mon pahat, hu 3.000 urang me-in, labaih 600 urang pato ba saong 500 trong tai dalam tinh hu mbaok tame. Raya oh tok lac pok meyaom hatai pahat padhih di rahra, pambak danak dak “Dalam rahra pasram rup tui Wa Ho”, blaoh daok pagam pahat padhih saong ilamo, jirah rivang, tapa nan yaih khan thaik thaot Gia Lai chreih chrai, meda ilamo dalam Thun Jirah pakat negar 2026.

Triều Tiên saong Nga padang tatua jalan tabak pambuak dua negar. Danak dak tatua tapa kraong Đồ Môn hu dua gah lac makna praong pambuak dua negar. Thu tuong Nga Mikhail Mishustin khan lac, tatua birau jhul pakhang bruk ngak mbang patagok di dua taneh ia tui rilo gah, dalam nan hu yutlit saong duah bruk ngak birau.

Indonesia brei thau bruk pandar ahaok par oh hu urang peih par hu pandar ngak iek dalam gah ngak nong di dom bhum meda daong patrun tal 90% jien pruh jru di taneh pala. Di tinh Meraong Papua, jien buh tabiak ka pruh jru ka sa hecta taneh patrun 10 mbang saong tukvak ngak hu patrun meng 4 tuk trun daok 20 tuk. Ahaok par oh hu urang peih par daong bruk pruh jru rah tabiak samar jang, siam lagaih jang.

Ia ribuk sua di bang Bihar, bhum gah Pur Ấn Độ daok rah tabiak trak, tuk ia kraong Hằng tagok glong abih meng lavik mai. Labaih 2,2 trieu urang gaok kan kandah, karja brei urang mai daong duah, daong kaya mbang saong kakei ia ribuk daok pambak praong veik.  Karja jak ba labaih 1.400 gilai kapan gam bol lin pacang bala pakat negar saong bang mai daong ba urang daok gar tavak tabiak.