Dalam harei 16/8, bollin duah mboh, pataom labaih 24 atau talang liet si saong 15 atau di Labik A, bein bingu Le Thi Rieng, TPHCM. Dalam harei, Kapol duah pataom atau talang liet si kuac labaih 200 met khoi, patui peih praong taneh labik duah di Khu A.  Bộ Tư lệnh Ban raya brei ba tame ngak bruk 3 sruh mac kuac haluk, 1 radaih ben praong 3,5 tấn piah kuac taneh tagok, pajeng daong bruk ngak. Kuhria mbiah tal ini, pataom hu labaih 351 atau talang liet si saong 198 kaya kan. “Ngak bruk 500 harei melam jhul khang bruk duah pataom saong duah thau angar  atau talang liet si” ngak hu 137 harei. Labaih 1.700 atau talang liet si  hu gah bol lin duah pataom.

UBND Dac khu Phú Qúy, tỉnh Lam Dong birau dak ramik 10 palei, trun daok 6 palei. UBND tinh Lam Dong brei padang ngak dua labik pataok saong mek kaya kan di gilai trun pak palei Trieu Duong, dalam nan hu Bãi Phủ saong Labik palaik  jiak ribuk Phú Quý. Dua labik ini ginup prein ngak bruk, khik brei salamat ka dom kapal gilai atah tal 30 met tame saong tabiak. Dac khu Phu Quoc lac sa dalam dom bhum taneh lagaih ka bruk ngak mbang gah taong chap kaya ikan di tinh Lam Dong labaih 7.500 urang ngak saong jaik 1.600 gilai ikan atah 6 m tagok.

Roya nyaom dara pasar Durian thun 2026 ngan saong kadha “Durian Dak Lak - Pambuak bruk papar atah” di tinh Dak Lak. Ini lac mbang akaok meti  Roya nyaom dara pasar Durian hu peih ngak pakat tinh, hu 16 bruk paeih ngak di rilo bhum palei dalam tinh, dui atah tal harei 2/9. Dalam tinh urak ini hu labaih 41.000 ha durian, durian thun ni kuhria hu jaik 500.000 tấn. Meng dom kein lagaih, tinh Dak Lak paglong kaya kan meng bruk pambuak ngak tabiak kaya kan gam paglong baoh yamen bingi, brei thau halau gha, ngak tabiak, logoctics saong darak pasar.

UBND ban Cần Thơ birau khan brei thau samar ka bala meng langik, glut jaleih taneh mbuan ba tal bala di 4 xa, phuong nan lac Thới An Đông, Đại Hải, Lai Hòa saong Vĩnh Phước. Dom labik glut jaleih daok rah tabiak kan kandah, mbuan ba tal bala, palai lahik kaya kan di bhap bini, jalan mbak saong rilo danak dak. Ban raya caong khin dom jabat, don vi pambuak tal brei hu jalan langyah anak meta, psang iek veik, ba tabiak jalan khik siam bhap bini saong dom danak dak anak bruk glut jaleih dak harei dak ralo.

Tui Jabat khí tượng - thủy văn Meraong negar, meng harei ini tal harei 22/8, Meraong negar hu hajan di ralo labik, rilo labik hu hajan praong. Hajan di tuk jala pandiak, biar harei saong sup melam, hangin khang. Bhap bini brei caik hatai caga dahlau, brei kuhria caga bruk pala drak, bruk nao mai di drei. Kayua hajan ralo saong langik taginum sup malup di gah Meraong dalam dom harei akaok adit anak, ralo meng 29 -32 do C.

Dom urang metai kayua bala megei taneh khang 7,7 do richte di gah Pur Indonesia tagok tal takik ye lac 53 urang, labaih 130 urang njuak rambuac. Labaih 5 ribau urang brei panduan ba nao labik karei, sang danaok khut tayak saong gar jalan. Rilo urang brei diukrai dalam tadai tamra, dom urang njauk rambuac ba tame dom labik y te padang jiak taphia. Ini lac mbang megei baoh taneh ngak metai lahik ralo abih di Indonesia kuhria meng thun 2022 tal ini.

Metai lahik ka manuac urang saong kaya kan megei taneh khang 7,1 do richte rah tabiak di harei 28/7 di tinh Kumamoto daok trak jang. Kuhria tal harei ini urang metai tagok tal 39 urang. Taneh tayun megei ngak khut tayak jaik 390.000 baoh sang ba tal 3.205 urang daok diuk rai di ralo labik plaik pataom sa labik. Daok tinh Chiba, hajan ngak meta 9 urang, 1 urang lahik.

Sa kapol urang ngak kong di ban Dendermonde di Bỉ duah mboh sa gilang ameh kuhria 9 trieu Euro dalam tuk padang ngak sang. Gilang kaya nan hu labaih yaok pluh mbaik ameh saong yaok rituh jien xu ameh. Taong abih ba bayar ka canh sat yaok kuhria hu tavak tame camera, hu 4 urang ngak bruk cambaic laic. Hadei di nan, dom ameh gam piah oh brei thei gaok tame./.