Tỉnh Long An, meng akaok thun tal puac bilan 9/2020 hu 911 urang njom ruak tangin takai cambuai

Anak bruk hajan ia sua di bhum kreh negar rah tabiak khang, kuhria tal moang 5 biar harei 11/10, hu 15 urang metai, 21 urang lahik, 8 kapal lahik saong seik 3 sà lan. Hajan praong ngak brei dauk14.500 ha njam patam saong phun pala, labaih 956 ha raong pala kaya ikan. Labaih 26 rabau sang saong rilo labik dauk dalam meng 1m tagok… Dom labik di Quân khu 4, 5, Bộ đội Biên phòng hu ieu pataom labaih  9.600 menuac haong 267 radaih, ghe gilai pambuak bruk haong dom kapul di puk palei daong pacang hajan ia sua, ba labaih14.800 sang nao tal labik siam mekre salamat.

Kuhria tal maong 6 dah page ni (12/10), Việt Nam oh hu urang bahrau halei njom ruak Covid-19 dalam 12 maong tapa, taong abih tih urang njom jeng lac 1.109 urang. Dua urang njom bahrau mboh di bier 11/10 lac 2 urang tame negar, hu brei daok karei chip di tỉnh Đồng Nai saong Hải Dương. Taong abih tih urang taom gaok jaik saong tame negar meng bhum hu jit daok tui iek prien yava urak ni lac 16.160 urang.

Tui pasak pasang iek ruak kik tỉnh Long An, meng akaok thun tal puac bilan 9/2020, dalam tỉnh hu 911 urang njom ruak tangin takai cambuai. Tui kuhria ruak daok tagok samar dalam tukvak anak tal, Pasak pasang iek ruak kik Long An daok patagok dom jalan pacang caga jit, oh caik ka nyu njom mbak.

UBND huyện Chợ Lách, tỉnh Bến Tre bahrau peih bruk rok harak brei angan mek hu chuẩn palei pala bahrau di Thủ tướng rajaei. Nan lac huyện camriep abih di tỉnh Bến Tre ngak salah bruk ni. Tal urak ni, kadung jien padang ngak palei pala bahrau di Chợ Lách lac labaih 2.176 tỷ đồng. Dalam nan, bhap bini rik tame labaih 600 triệu đồng.

Hadei di 1 thun pambuak bruk peih ngak danak dak khik caga urang kumei haong uraniah dalam tỉnh Đắk Lắk, vaktu 2019 – 2022, dalam tỉnh hu peih 1.070 mbang pathau khan adat hukum ka labaih 174.500 mbang urang kumei saong bhap bini, abih di nyu lac bhum urang bangsa takik. Kapul urang kumei, Công an, Viện Kiểm sát bhap bini, Tòa án bhap bini hu pambuak bruk taduan mek, langyah 109 bruk pambuak tal urang kumei saong uraniah dalam tỉnh. Maong rah tapa, dom duas gah rapeik rapai, taong paoh urang kumei saong uraniah hu langyah samar, njauk adat hukum.

Tổng thống Mỹ Donald Trump brei thau, prien yava di ong hu siam veik abih saong daok caga mai veik haong bruk jak ba mariek gauk hadei vaktu oh hu mboh kayua njom Covid-19. Tui jalan ba tabiak, dalam harei 12/10, urang dang akaok Nhà Trắng meda tal bang Florida dahlau tuk tal dom tiểu bang: Pennsylvania saong Iowa piah jak ba dom cử tri. Tui mbang pasang iek manuac sia di dalam negar kayua báo Bưu điện Washington saong ABC News peih ngak, urang pilih ruah ngak tổng thống di Đảng Dân chủ Joe Biden nao dahlau Tổng thống Mỹ Donald Trumph 12 điểm dalam dom cử tri hu tut angan nao pilih ruah.

Thủ tướng Anh Boris Johnson harei ini tui kuhria meda ba tabiak dom jalan ngak piah pacang cakak bruk patagok di dom urang njom Covid-19 bahrau di taneh ia ini. Meng bruk hu dom urang njom ruak saong metai kayua Covid-19 tagok rilo, rrajaei Anh daok njauk rahra lac oh ka ngak siam bruk pacang caga. Dalam tuk nan, Mintri Y tế Italia jeng brei thau lac taneh ia ini daok caga tabiak bruk brei pacang meneing bruk taom gaok rilo menuac di dalam taneh ia piah pacang Covid-19 bahrau daok tagok rilo dalam tukvak jaik di ini. Tui urang ngak praong Italia, njau samar pasang iek hu piah plaih ka Italia ba tabiak bruk pa-atah di gauk di dalam taneh ia.

Dah page ni, Thủ tướng Australia Scott Morrison brei thau, negar ni daok ginum biai  haong dom negar di Thái Bình Dương jang yau Nhật Bản, Singapore saong Hàn Quốc – hu brei thau lac caga hu siam lagaih haong jit Covid-19, ka bruk ngak tabiak bong bóng nao mai. Australia hu brei ka bhap bini New Zealand hu tal bang New South Wales, Canberra saong bhum taneh gah barak Australia meng harei 17/10 anak tal bo oh hu brei daok karei. Min, kayua New Zealand daok biak njauk caik hatai nan ye oh yah klak dom adat daok karei pandar ngak yau haong dom urang mai meng Australia./.

Urang lang: Thu Thảo – M. Phương – 12/10 10:33:55