Ong Đỗ Tiến Sỹ - Ủy viên Trung ương Đảng, Tong Yam ndok Rayo sap ndom VN haong kapul urang lambaok Rayo

Harei 19/5, ong Đỗ Tiến Sỹ - Ủy viên Trung ương Đảng, Tong Yam ndok Rayo sap ndom VN haong kapul urang lambaok Rayo hu nao ravang saong am cuh gilau di labik inem mek hang Trầm - baha Trầm, xã Phụng Châu, huyện Chương Mỹ, ban Hà Nội, di tuk pahadar 132 thun harei ndih tapui Chủ tịch Hồ Chí Minh. Ini lac labik Rayo sap ndom VN papar sap "panuac ieu abih labik dalam taneh ia dang tagok mesruh pacang khamang" di Chủ tịch Hồ Chí Minh di melam 19/12/1946. Jeng pak di labik ini, melam 21/1/1947, hadei di tuk dang akaok mbang nyaom rajaei , Chủ tịch Hồ Chí Minh hu mai veik jabat di rayo sap ndom VN puac panuac tadhau ayuh Tết bhap bini, urang lin dalam taneh ia di tuk Giao thừa Tết Đinh Hợi.

Sở Lao động – Thương binh saong Xã hội TPHCM brei thau, labaih 987.000 urang ngak daok ngak bruk di dom doanh nghiệp, labaih 200.000 urang mai ngak bruk veik tui kuhria hu taduan jien daong pah sang tui Sarak 08/2022 di Thủ tướng Rajaei. Yaom daong ka urang daok ngak bruk lac 500.000 đồng sa bilan, rilo di abih lac 3 bilan. Daok urang ngak mai veik ngak bruk hu daong 1 triệu đồng sa bilan, rilo di abih lac 3 bilan. Tui kuhria, abih tih yaom jien daong lac jaik 2.100 tỷ đồng.

Dalam dom bruk di Harei pataom Caraih meng harei 19/5/2022 tal harei 21/5/2022, di ban Cao Lãnh hu rilo bruk ngak yau ye: parang iek dom janih Caraih di Đồng Tháp saong di dom tỉnh, ban dalam taneh ia, peih labik mbang menyum, pandap lưu niệm, pandap ngak meng Caraih, abih di nyu lac padang angan  kỷ lục 200 pandap mbang hu ngak meng Caraih.

Dom harei tapa, gah du lịch Bình Thuận hu rilo bui sambai tuk hu dom kapul tuai dunya mai veik hadei di 2 thun klaoh nao kayua jit COVID-19. Di labik The Cliff Resort & Residences (ban Phan Thiết) urak ini hu 40 tuai Prang daok ravang me-in dalam mbang padeih padei 8 harei 7 melam. Ini lac kapul tuai hu rilo menuac di abih bo labik ini hu taduan raok kuhria meng tuk peih pabah mbang taduan raok tuai dunya. Dalam 4 bilan akaok thun 2022, Bình Thuận hu taduan raok jaik 1,4 triệu mbang tuai du lịch. Jien mek tame meng bruk du lịch hu jaik 2.700 tỷ đồng.

Tukvak ini, rilo janih baoh kayau di sang bein dalam tỉnh Bà Rịa – Vũng Tàu daok tame bilan paik baoh. Thun ini, kayua langik oh siam, năng suất baoh kayau trun khang, yaom pablei jeng trun khang. Meyah dom thun dahlau baoh bơ yaom meng 50- 60 rabau đồng sa kg, ye urak ini trun daok meng 18-20 rabau đồng sa kg. langiu di baoh bơ, yaom dom janih baoh kayau karei yau: panat, pa-ok... jeng trun yaom biar, meng 4-5 rabau đồng sa kg. Rilo bein caik ka baoh jruh bak got kayua yaom pablei biak biar, paik pablei oh ginup jien pah urang paik.

TTK Liên hợp quốc An-tô-ni-ô Gu-tơ-rét brei thau, ong daok khik talei pambuak bruk khang kajap haong Nga, Ucraina, Thổ Nhĩ Kỳ, Mỹ saong Liên minh châu Âu piah pasiam veik bruk pablei tabiak negar langiu ngũ cốc di Ucraina dalam tuk bruk kurang pandap mbang di dunya daok trak damak tagok. Nga haong Ucraina yaok taneh ia hu jaik 1/3 dom lúa mì pabak ka dunya. Ucraina jeng lac taneh ia pablei tabiak negar langiu biak rilo tangei, lúa mạch, menyek hướng dương haong menyek hạt cải. Nga haong Bê-la-rút hu labaih 40% dom khak kali pablei ka dunya.

Harei 19/5, kapul urang ngak bruk njuk ia daok peih bruk njuk duah di labik kapal gilai du lịch Japon kram di langiu tasik Hokkaido harei 23 bilan 4. Kapal gilai  Kazu I pajeng 26 urang gaok bala saong kram di bhum tasik pulao kaoh Shiretoko. Gilai hu mboh lac daok di labik dalam 120m mala mbaok ia. Ini lac mbang camereip abih dom urang njuk ia hu mbaok tame bruk pasang iek kapal Kazu I. Dahlau di nan, 1 jamriak njuk ia oh hu menuac peih jeng hu ba mai pasang iek gilai min oh duah mboh menuac lahik halei dalam baoh kapal gilai kram nan.

Di tukvak 5 tuk 54 minit harei 20/5 tui mon Việt Nam, kapal vũ trụ Starliner oh hu menuac peih di kapul ngak kapal haoh Boeing hu cuh tagok Bilai vũ trụ dunya (ISS). Ini lac mbang par iek piah brei mboh lac Boeing meda ba menuac tagok hu Vũ trụ dalam siam mekre, salamat./.

Urang lang: M. Phuong & Thu Thao – 21/05