Vaccine Covid-19Klauk ka uranaih umo 5 tal ala 12 thun

Harei ini 9/4, jaik 1 trieu mbang jru vaccine Covid-19 akok meti brei ka uranaih umo 5 tal ala 12 thun hu mai tal Viet Nam saong peih bruk brei klauk jru chip hadei di tuk ngak salah bruk pasang iek vaccine, nan lac harei 15/4. Dom vaccine nan piah klauk ka anek saih bac tal 6, hadei di nan tuk dom lô jru patui veik mai tal Viet Nam meda brei klauk ka uranaih umo sit jang.

Dok dalam dom bruk ngak pamong tal harei pachit daa Po Hùng (10/3 saka ia bilan), Muinyim dakrai pakat negar hu peih danak dak tour “Mai saman Hồng Bàng” dalam nan hu dom bruk duah thau tuk vak padang taneh ia di dom po Hùng gam song dom adat cambat tanarakun dalam rija roya di urang Việt klak. Danak dak tour “Mai saman Hồng Bàng” hu peih ngak meng ni tal abih harei 11/4 di muinyim dakrai sajarah pakat negar.

Urak ini, Ninh Thuan hu taneh pala nho praong abih dalam negar ngan haong 1.200 ha, yaok thun pabak ka darak pasar labaih 30.000 tấn baoh nho that. Piah patagok kein laba meng phun nho, trun bruk kan pablei baoh nho that ka urang nong, rilo labik, D.N, HTX daok jhul khang bruk pambuak gauk ngak, roh duah brei tabiak dom janih pandap ngak meng baoh nho that. Yau bruk pambuak chuoi gia tri kaya nong di HTX nho Evergreen Ninh Thuận. HTX daok buh jien tame blei mac moc, xưởng chế biến, pataom tame roh duah ngak tabiak dom pandap meng nho yau ye nho thu, ia nho tagok mesram, alak nho. Langiu di nan, Ninh Thuận daok hu labaih 60 labik bhian ngak tabiak, tut ngan pablei salih dom pamdap alak nyo, cang nho, yaok thun dom labik nan pabak ka darak pasa yaok pluh ribau lit alak, vang nho.

Gilang pariak sarak karja huyện tapen negar Lộc Ninh, tỉnh Bình Phước brei thau, danak dak brei mesraiy ka boh sang bahrau tabiak truh kan kathaot dom thun jiak di ni hu daong pren ka yaok ribau boh sang bahrau tabiak truh kathaot hu jien buh tame patagok bruk ngak mbang, paglong jien mek tame, pasiam rai duik, patruh kathaot khang kajap. Kuhria tal urak ni, dalam huyện hu peih jien brei mesraiy tui danak dak brei mesraiy ka boh sang bahrau tabiak truh kathaot labaih 42tỷ 500 triệu đồng, ngan song 1.542 tuai dok mesraiy. Danak dak hu daong siam gah xã hội, pabak hatai cong di bhap bini, abih di nyu nan lac di bhum biak kan kandah, bhum urang bangsa takik.

100 phun te Shan tuyết tại xã Sín Chải, huyện Tủa Chùa, birau hu pok brei angan lac phun drap ar Viet Nam. Huyện Tủa Chùa hu jaik 600 ha te, angaok ceik glong labaih 1.400 m dut saong mbaok ia tasik, luac thun taginum me-om. 100 phun te ini hu huyện pasang iek, palih ruah meng labaih 4.000 phun Shan tuyết praong taha, rilo phun hu dua klau rituh thun, tamuh di dom xã Tả Phìn, Sính Phình, Tả Sìn Thàng saong Sín Chải.

Rajaei New Zealand harei ini brei thau lac brei ba tabiak labaih 480 rabau thung menyek meng gilang khik piah samar drah piah gam haong dom taneh ia dalam Jabat Năng lượng dunya pacang veik bruk kurang menyek di darak pasar xăng menyek dunya, rik daong ngak brei patrun pandiak yaom xăng menyek dunya. Meng bruk ini, New Zealand haong dom taneh ia IEA meda ba tabiak darak pasar 120 triệu thùng menyek meng dom gilang khik piah di taneh ia

Sa kapul dom urang ilamu di Chi-lê bahrau kuac raok hu sa nghĩa địa biak takik hu mboh, gam haong dom bộ talang hóa thạch hu khik piah biak siam di janih bò sát bay cổ đại hu meng labaih 100 triệu thun dahlau, bhian hu mboh di mangaok “sa mạc metai lahik” Atacama- lac sa dalam dom sa mạc thu lagu abih di dunya.

Sang megik Istiqlal daok dalam pasak ban ine Jakarta di Indonesia bahrau hu Tập đoàn Jien padai Dunya – sa thành viên di kapul Gilang pariak dunya – brei harak pok angan lac Labik hijao pakat dunya. Hu padang ngak salah meng thun 1978, Istiqlal hu labik ka 250.000 menuac, hu thau tal yau 1 Sang megik Islam praong abih bhum Đông Nam Á saong praong ka 3 di mangaok dunya. Bruk sang megik Istiqlal hu pok brei angan Baoh sang praong hijao lac bruk bui sambai ka Indonesia, taneh ia hu urang Islam rilo abih di dunya, abih di nyu lac njauk di tuk tame bilan eik Ramadan rilo siam mekre./. 

Urang lang: Hani Pha – Bhumi – 09/04