Harei ini, peih pakak nyaom biai oh bhian mbang ka 1, Quoc hoi mbang 16. Tui danak dak ba tabiak, Quoc hoi brei pasang iek, khan tapa 15  danak dak, 4 sarak hukum karja; brei panuac  ka 7 danak dak, langyah pasang iek, kuhria urang ngak bruk pakat angaok saong kham ba tabiak 6 asar kadha hu makna praong gah kinh te - xa hoi, phun jien ngak mbang. Ini lac ralo bruk praong, dalam nan hu rilo asar kadha pambak tal bhap bini, doanh nghiep, bruk ngak di karja saong patagok kinh te- xa hoi.

Pahadar 65 thun Harei Njom jru klik kruac di Viet Nam, Kapol urang njom jru mek kalik kruac dioxin TPHCM peih ngak danak dak nao tabak ngan haong kadha “ Daong urang njom jru mek kalik kruac /dioxin. Danak dak ini, hu labaih 5.000 urang nao tabak, saneng lac yaok takai yam nao rik tame pambuak praong hatai klak rabha  haong dom urang pandik harao kayua jru kalik kruac. Bingun ini, Kapol urang njom jru mek kalik kruac dioxin TPHCM hu alin brei 10 blah so patak pataom jien, yaok so hu 10 trieu dong ka 10 baoh sang hu raidiuk kan kandah, gam haong 10 paok pandap, yaok paok yaom sa trieu dong ka dom baoh sang gaok kan kandah.

Dalam tuk rilo janih baoh kayau di tinh Dong Thap yaom kaom oh karo, ye baoh kruac bung kalik hijao pablei hu yaom tani tanat.  Urak ini, baoh kruac bung kalik hijao janih kasa blei tame hu yaom jaik 30.000 dong sa kilo, janih ka 2 labaih 20.000 dong sa kilo. Yaom nan, urang pala laba labaih hu 10.000 dong sa kilo. Dalam tinh Dong Thap pala hu labaih  4.300 ha karuac bung, dalam nan kruac bung kalik hijao hu pala ralo. Rilo po bein daok peih praong taneh pala kruac bung tui jalan hacih sa-at, pambuak pagam bruk pablei tabiak.

Kong ty THHH MTV Khik iek danak dak ribaong kraong Binh Thuan hu pok tagok UBND tinh Lam Dong pasang iek, mbaoh harak brei padang ngak binek Làng di xa Phan Son, huyen Bac Binh, tinh Binh Thuan klak. Kuhria abih tih jien buh tame labaih 4 ti dong, tuk ngak salah brei pabak ia ka labaih 100 ha taneh pala drak di mikva Cam di xã Phan Sơn. Thun 2025, ia ribuk sua ngak khut tayak taong abih danak dak pacang tapa kraong saong brong ba ia ka taneh pala drak di mikva urang Cam gaok kan kandah.  

Kapol K71, Bo Chi huy Bol lin tinh Tay Ninh duah hu veik 2 atau talang liet si di phuong An Tịnh. Yau nan ye, meng harei 14/7/2026 mbiah tal ini, pataom hu abih tih 6 atau talang liet si di tinh Tay Ninh. Gam haong bruk duah pataom atau talang liet si, tinh Tay Ninh daok jhul pakhang bruk mek mau AND di dom kubo liet si. Mbiah tal ini, dalam tinh kuac mek hu labaih 15.500 kubo liet si, dalam nan hu labaih 12.500 kubo brei mek mau AND.

Mbiah tal ini, langik pandiak ba tal 66 urang metai di Nhat Ban. Tui nan, langik pandiak daok catang jang di ralo labik di Nhat Ban, tuk langik pandiak dom tinh ban yau Kochi, Wakayama tagok jaik 41 do C, rilo labik langik pandiak ta 40 do C. Dom urang ilamo kuhria iek langik tathik Nhat Ban mboh lac, bruk langik salih karei dak harei dak samar yau urak ini, oh plaik njiak hu bruk kan kandah.

Pak di Chau Au, bilan hè pandiak catang ngak ka bhum taneh ia dang anak kan kandah oh ka bhian mboh. Di Hy Lạp, apui khuah mbang gah pei ban ine Athens khuah mbang labaih 100 baoh sang. Dalam tuk apui khuah, dua sruh ahaok daong padam apui thaok gauk angaok langik. Dalam tuk dom apui khuah glai di Prang saong Tay Ban Nha hu pacang, min  ralo labik apui khuah  mbuan rah tabiak gilac veik. Di Hungary, ia kraong Danube trun biar ba taol sang mac ndien hat nhan padeih ngak bruk.

Tong thong Mỹ Donald Trump brei padeih bruk taong Iran hadei tuk Tehran saong dom taneh ia Trung Dong likau brei dui atah tukvak piah ngak brei trun kan kandah ka dom taneh ia. Bruk nan hu iek yau birau piah langyah di bhum Trung Dong. Njauk caik hatai dahlau di nan, ong Trump khan lac Mỹ caga blaoh blai piah cagar haong Iran meng siu apui, ba tal huac ka bruk mesruh catang kan kandah jang./.