Harei ini (4/8), Quoc hoi mbang XVI yam tapa harei ngak bruk mbang ka dua di Nyaom baia oh bhian mbang ka Sa. Page ini, dom Quoc hoi ginum biai ka danak dak Hukum lac: Hukum Pacang caga, pacang bruk ba tabiak phao kraong cuh sa siuk min palai ralo; Hukum Pato, pakai hukum (pasiam veik). Taong yaom bruk ramik pasiam  Hukum Pato, pakai lac bruk njauk ngak, pabak hu ka rilo urang duah thau hukum, dalam nan hu baoh sang kathaot, jaik kathaot, urang umo taha, urang taong phat brei ramik pasiam labik khik kareik saong ngak urang tabiak guk mai veik haong bhap bini.

Tui Mentri Noi vu, mbiah tal ini, taong abih 34 tinh, ban di Trung uong ngak salah blaoh bruk dak ramik palei pala, kapol ban medil. Hadei dak ramik, dalam negar daok 48.078 palei, ban medil, trun hu labaih 41 ribau don vi. Thu truong Mentri Noi vu Nguyễn Thị Thu Hà khan lac: Bruk dak ramik dom labik sit sot, daok ralo labik atah gauk; tui nan, khik hu tamo dom bruk di yaok palei, ban medil hu sajarah dakrai, ilimo,  bangsa, agama, quoc phong, an ninh saong labik bhum taneh.

Tui kuhria dalam bilan 8 ini, dom jabat chuc nang di TPHCM brei ngak salah angan, labik, bruk ngak, jalan buh jien tame, manuac saong phun jien peih ngak jeng yau tukvak peih ngak danak dak sang daok ka urang ngak kong. Kham merat tal thun 2030, ngak salah hu 10.000 baoh sang daok ka urang ngak kong. Urak ini, hu 3 danak dak peih ngak di phuong Tay Nam ( Binh Duong dahlau), xã Bac Tan Uyen (Bình Dương klak), phuong Tân Phước (Bà Rịa - Vũng Tàu dahlau diah) saong sa danak dak tui harak gal. Tui danak dak pabak 2.866 baoh sang, jabat, pabak hu labik daok ka jaik 11 ribau urang ngak kong.

Gah bol lin ngak bruk duah, pataom atau talang liet si di Khu B, Bein bingu Lê Thị Riêng saong duah, pataom hu 14 atau talang liet si, dalam nan 4 atau daok khik hu kaya kan. Kuhria tal ini, gah bol lin duah pataom hu 182 atau talang liet si. Bo Tu lenh TPHCM khan lac, peih praong veik labik duah di Khu B,  jak ba dom bol lin, radaih mac jamraih jhul pasamar ngak bruk 500 harei duah pataom saong duah thau angan talang liet si.

UBND tinh Dak Lak brei ramik, pabak labaih 215 ti dong piah peih ngak vaktu ka 2 padang dom sang bac daok veik dom pakat di bhum taphia negar. Meng thun 2025 -2027,  tinh Dak Lak padang ngak hu 3 Sang bac gam bac gam daok di bhum taphia negar kuhria abih tih jien ngak vaktu kasa labaih  390 ti dong. Tui kuhria, 3 baoh sang hu ngak blaoh saong ba tame pandar di bilan 8 ini. Thun bac birau jaik tal, dom sang bac  pho thong bangsa gam bac gam daok dom pakat di bhum taphia negar tinh Dak Lak taduan raok labaih 3.100 anek saih meng tal bac 1 tal tal 9.

Tong thong Mỹ Donald Trump iew dom kong ty ngak menyek samar brei trun yaom xang pablei le ka urang pandar di Mỹ, tui nan brei mboh bruk pasiam veik gah ngak xang menyek meng sarak karja rai ong ngak bruk. Panuac da-a di ong Trump hu ba tabiak dalam tuk yaom xang tagok di Mỹ  labaih 4 USD/ gallon,  glong abih dalam  dom bilan tapa.

Jabat di cu dunya kakei lac, dom urang gaok pablei saong chap ngak dom bruk pachot pagat online ka dom kapol nyaom di Dong Nam A dak harei dak  khang. Labaih 300.000 urang mai meng 80 taneh ia daok gaok kateik greik. Hadei  gaok kan kandah di rilo taneh ia, karja Campuchia daok duah mek catang. Quoc hoi Myanmar, brei thau hukum birau pacang caga pachot pagat online, brei ngak tui dom jalan catang - dalam hu bruk tu hinh - ngan haong dom bruk pachot pagat online.

Dom mbamg apui khuah glai saong pandiak catang ngak khut tayak negar Prang, Tay Ban Nha saong dom bhum karei di chau Au ngak khat lahik jien padai labaih 3 ti euro dalam thun ini. Bruk ini brei mboh jien cai pandar dak harei dak glong kayua langik salih karei oh lagaih. Jaik meteh trieu hecta taneh glai apui khuah mbang dalam dua bilan. Dom taneh ia gaok kan kandah ralo di Phap, Tay Ban Nha, Bồ Đào Nha, Hy Lạp saong Romania./.