Bruk ba mai dar veik talang liệt sĩ lin halain hatain Việt Nam metai

Thủ tướng Phạm Minh Chính bahrau mbaoh tangin tame harak brei padang mBan tacei pato pakat negar dom bruk ngak, dom danak dak praong pakat negar gah jalan mbak pajeng ba. mBan tacei pato hu daong ka Rajaei, Thủ tướng Rajaei tacei pato peih ngak dom bruk, dom danak dak praong pakat negar, lac: jalan Hồ Chí Minh; dom danak dak jalan cao tốc (Bắc - Nam gah Timur; Bến Lức - Long Thành; Khánh Hòa - Buôn Ma Thuột; Biên Hòa - Vũng Tàu; Châu Đốc - Cần Thơ - Sóc Trăng), danak dak Vành đai 4 – Bhum ban ine Hà Nội, Vành đai 3 TPHCM; jalan pasei nduac samar angaok jalan Bắc - Nam…

Harei ini, Tỉnh ủy - UBND tỉnh An Giang hu peih bruk  ba mai dar veik 68 talang liệt sĩ lin halain hatain Việt Nam metai di mblang mesruh Campuchia saong dalam taneh ia, di taneh kubo liệt sĩ Dốc Bà Đắc, huyện Tịnh Biên. Tapa nan, ong Nguyễn Thanh Bình, akaok UBND tỉnh An Giang brei thau, yaom lac ka oh thau cambaih angan, puk palei di dom liệt sĩ min Đảng bộ, bol lin saong bhap bini An Giang halain hatain lambaok ka rahra dalam taneh ia saong gauk gar dom liệt sĩ piah sangka iek glang, khik ramik biak siam kubo dom saai yau gauk gar di drei.

Akaok UB bhap bini tỉnh Cà Mau bahrau brei thau bruk samar drah ka bala meng langik tasik ngan saong bruk glut jaleih ar tasik Pai nao tapa tỉnh (labik meng takai tasik gah meraong cống Kênh Mới tal takai tasik gah barak cống Đá Bạc, Huyện Trần Văn Thời saong labik Vàm Tiểu Dừa, Huyện U Minh). Urak ini, di takai tasik gah pai, labik  nao tapa dom huyện ini njauk gut jaleih 5 labik atah labaih 2.690m, ngak kan kandah tapak tal ar tasik gah pai. Glut jaleih mbuan ba tal metai lahik, jaleih sang danaok di bhap bini, dom ar pacang caga bala meng langik tasik, dom jalan điện, dom labik inem krung sajarah pakat negar, dom sang bac…

Meng harei 14/7 tal harei 21/7 meng blaoh, tỉnh Bình Dương hu veik 2 urang metai kayua ruak pandiak tabiak darah, patagok dom urang metai di tỉnh tal 12 urang. Urak ini Bình Dương hu jaik 8.600 urang ruak pandiak tabiak darah, tagok 53% dut saong tukvak ini thun 2021. Sở Y tế daok ieu kakei dom puk palei pathau khan, paglaong hatai saneng ka bhap bini dalam bruk khik ramik alam môi trường, sa tangin haong gauk pametai anek lăng quăng, bọ gậy;eng drei nao iek ruak, taong ruak tuk mboh dalam ruk deih yau njauk ruak.  

Dalam tuk bruk pacang halam njul cap mek cim yến di palei pala oh ka hu langyah tal labik tal dhua ye di tỉnh Tiền Giang daok hu bruk co klaik tame sang raong yến klaik mek sruh yến di bhap bini. Urang raong cim yến brei thau, co klaik oh lac mek nao sruh yến hu yaom glaong bo daok ngak brei cim yến metai, tui nan khat lahik gah kinh tế lac biak praong. Bruk raong cim yến daok tagok samar di Tiền Giang ngan haong labaih 1.500 sang yến; rilo sang bhap bini padang sang yến atah di labik sang daok, min oh hu menuac khik iek. Nan ye bruk sruh yến njauk co klaik mek biak mbuan, ngak brei urang raong njauk khat lahik trak.

Sa Pasak rami ramik bruk di Istanbul - Thổ Nhĩ Kỳ hu padang tabiak, hadei di tuk Nga saong Ukraina mbaoh tangin tame dom sanya pablei ngũ cốc tabiak negar langiu. Pasak daok kham marat peih ngak dom bruk kuhria caga piah peih bruk pablei ngũ cốc tabiak negar langiu tapa Biển Đen aval di abih. Dahlau di nan, harei 22/7, Nga, Ukraina, Thổ Nhĩ Kỳ saong Liên hợp quốc hu mbaoh tangin tame sanya ka bruk pambuak veik dom bruk pablei ngũ cốc tabiak negar langiu ka dom darak pasa dunya tapa Biển Đen. Liên hợp quốc jeng hu sanya ngak bruk haong gauk piah yah klaak dom pacang cakak bruk pablei tabaik negar langiu kaya nong saong khak drak di Nga.

Jabat rami ramik dom bruk pahala di Liên Hợp Quốc brei thau, dom kapul nyaom, gah pambuak bruk pahala meda brei padeih dom danak dak daong pahala ka Somalia kayua kurang jien padai. Liên hợp quốc jeng brei thau lac bruk pandiak bhang di Somalia dak harei dak jhak lac makna ngak brei jaik meteh menuac sia di taneh ia ini caong hu daong samar drah, dalam nan hu jaik 1 triệu menuac njauk klaak sang danaok. Kayua yau nan ye, Liên hợp quốc hu panuac ieu dunya njauk ngak samar drah piah peih praong saong khik ramik bruk daong pahala ka bhap bini Somalia piah pacang cakak bruk mbuan si laik tame eik lipa kathaot rambah.

Dua harei tapa, langik pandiak khang di dom tinh, ban di Trung Quốc, dalam nan di Tân Cương hu labik pandiak tagok tal 47,7 độ C.  Nhiệt độ glaong daok jhul samar bruk ralai băng ia patau di dom labik bhum ceik saong ba tal dom bala di langik tasik yau ye ia sua, jaleih taneh di rilo labik di Tân Cương. Jabat khí tượng Trung Quốc jeng hu panuac lac, băng tan – ia patau ralai di Tân Cương mbuan ba tal ia sua, pacah binek./.

Urang lang: Thu Thảo & M. Phương – 25/07