Ginum biai pakat dunya ngan haong asal kadha “Urang dane angan Nguyễn Đình Chiểu dalam jaman urak ini”

Harei ini UBND tỉnh Bến Tre pambuak haong  Ủy Ban UNESCO pakat negar Việt Nam saong Mintri ilamo - Thể  thao - Du lịch peih ginum biai pakat dunya ngan haong asal kadha “Urang dane angan Nguyễn Đình Chiểu dalam jaman urak ini”. Tapa nan dom urang lambaok hu brei mboh cambaih: Nguyễn Đình Chiểu lac menuac kham marat yam tapa dom kan kandah bo daok lac labik pambak tame ka bhap bini, pachreih hatai ka bhap bini, yaom lac dalam tuk taneh ia gaok kan kandah, min ong hu paneh tabiak thơ văn mesruh haong kol France, peih labik pato bac, brei jru daong menuac. Yaom lac tapa dom kan kandah, min tal luac rai, Nguyễn Đình Chiểu jeng khik hu hatai siam makre, oh huac metai labik, abih drei ka bhap bini, ka taneh ia, ngak bruk oh thau gheih ghar, pato anek saih, taong ruak daong ka bhap bini, paneh thơ văn ngak phao ndao taong kol kamang daong ka taneh ia.

UB bhap bini tỉnh Long An saong dom gah pambuak tal bahrau peih bruk ngak jalan ĐT 826E (ấp 3 Long Hậu) labik meng ĐT.826C tal takai jalan Long Hậu. Ini lac danak dak ndung bak bruk xã hội hóa, hu makna biak praong dalam bruk ieu pataom dom DN pambuak bruk haong karja padang ngak jalan mbak nao mai duh ka bruk cakrok KTXH di TP.HCM saong Long An.

UBND tỉnh Bình Thuận bahrau ieu  dom jabat, dom gah dalam tỉnh pasang iek harak gar, chứng chỉ di urang jakar, công chức, viên chức di dalam tinh, mayah mboh suan ye langyah tui njauk adat hukum. Tukvak tapa, bruk yaih khan, ngak tabiak, pablei salih saong pandar văn bằng, chứng chỉ ja rahtabiak sarau kadhau. Tui pathau khan di Công an tỉnh Bình Thuận, dom urang blei saong pandar harak văn bằng, chứng chỉ, harak gar ja, rilo meng lac urang jakar, công chức, viên chức piah pabak ginup harak gar urang jakar, quy hoạch, pok ngak, pacacah nâng ngạch, payua nao bac magru hadei di đại học, pilih ruah,...

Ndom ka bruk padang ngak tatua Mã Đà pambuak Đồng Nai haong Bình Phước saong ngak jalan roya nao tapa bhum  kreh labik khik ramik Sinh quyển dunya, Jabat pato megru, Khoa học saong ilamu Liên Hiệp Quốc (ieu katut lac UNESCO) di Việt Nam brei thau, bruk padang ngak jalan roya ini meda pambak khang tal bhum kreh di labik khik ramik Sinh quyển Đồng Nai. Gam haong nan, nyu jeng ngak kan kandah tal labik daok di dom janih athur quý hiếm saong lac makna ba tal metai lahik athur glai kayua radaih nduac angaok jalan. Kayua yau nan ye, UNESCO oh njauk hatai haong bruk padang ngak tatua Mã Đà saong ngak jalan nao tapa labik khik ramik.

Jit pandiak tabiak darah di ban raya Hồ Chí Minh saong dom tỉnh gah maraong daok tame tukvak catang tagok, dom urang njauk ruak lac urang praong thun saong urang kumei daok tagok di tanut njauk báo động. Di sang iek ruak Bệnh Nhiệt đới ban raya Hồ Chí Minh, meng akaok bilan 6 tal harei 23/6, sang iek ruak hu labaih 1.600 urang ruak tame sang iek ruak, dalam nan hu 200 urang ruak trak. Tui dom chuyên gia y tế, jit ruak pandiak tabiak darah tamuh tabiak dalam tuk rahtabiak jit ruak COVID-19 ngak ka rilo urang maluk saong hu hatai iek bier, bhian eng drei tui iek di sang. Tuk nao tal labik taong ruak ye ruak biak trak, ngak kan kandah dalam bruk taong ruak.

Thủ tướng Campuchia Hun Sen brei thau bruk tamuh veik dom urang njauk ruak COVID-19 dalam bhap bini, hadei di 52 harei oh hu urang njaom bahrau. Thủ tướng Hun Sen brei thau, yaom lac dom urang njaom ruak daok hu takik, min bruk iek lap meda jhul taneh ia ini laik tame kan kandah. Kayua yau nan ye, Thủ tướng Hun Sen ieu bhap bini ngak njauk tui dom bruk y tế saong samar drah nao klauk vaccine pacang COVID-19.

Mỹ hu ba tabiak bruk taong phat labaih 100 urang saong dom kapul hu pambuak tal gah công nghiệp quốc phòng Nga. Gam haong bruk taong phat ini, Mỹ jeng pakauk bruk blei tame ameh hu asal meng Nga. Ini lac sa dalam dom bruk ngak bahrau abih di Mỹ piah taong phat Nga kuhria meng di tuk taneh ia ini peih danak dak quân sự đặc biệt di Ukraine harei 24/02.  

Mexico saong Mỹ meda pambuak bruk haong gauk piah duah mboh saong ba tabiak langyah dom menuac gam tal bruk 51 urang “di cư” metai dalam thung radaih katung dui di Texas (Mỹ) harei 27/6 meng bloh. Dahlau di nan, Tổng thống Mexico khan lac hu takik di nyu 22 rahra taneh ia ini daok dalam dom urang metai dalam thung radaih katung dui nan. Tapa duah thau oh ka ginup abih, radaih nan meda pajeng 100 urang, lac dom urang “di cư” oh hu harak gar tui rup, tame negar Mỹ suan hukum. Ini meda lac bala praong biak trak damak pambuak tal urang “di cư” duah jalan nao tal Mỹ dalam dom thun jaik di ini./.

Urang lang: Thu Thao & M. Phuong – 29/06