Vắc-xin Covid-19 tui kuhria hu klauk iek angaok menuac dalam bilan 11 ni

Harei ni (3/11), UBND tỉnh Thừa Thiên – Huế hu panuac ieu Công ty Cổ phần Thủy điện Rào Trăng 3 pambuak haong gah công an, bol lin pasang iek dalam craoh meng Rào Trăng 3 tal Rào Trăng 4, piah tapa nan kuhria duah dom jalan langyah bruk duah menuac lahik dalam tukvak anak tal. Anak mata, dom kapul pataom tame ramik jalan ia nduac di kraong Rào Trăng paih hadei di tuk ribuk ka 10 nao tapa, mboh hu salamat ye pacang ia nduac, tui viek bruk duah menuac lahik. Dalam harei ni, dom gah pambuak tal jeng daok samar drah duah 12 urang njauk bala daok lahik di danak dak thủy điện Rào Trăng 3.

Piah caga pacang ribuk ka 10, UBND tỉnh Quảng Ngãi hu tabiak harak samar brei peih bruk panduan ba bhap bini nao labik karei. Tui nan, pandar UBND dom huyện bhum ceik: Sơn Tây, Minh Long, Sơn Hà peih bruk panduan ba bhap bini, urang jakar, urang ngak dok di dom labik glut jaleih tal labik siam mekre, salah bloh dahlau di 17 tuk harei ni 3/11. Dom jabat chức năng jak ba song hu panuac kakei bhap bini meyah oh hu bruk hagait ye jhui tabiak truh labik plaih rabuk, jhui talap mai sang piah khik salamat ka menuac urang.

Dah page ni, Sở jalan mbak Pajeng ba tỉnh Kon Tum brei thau kapul daok caga taduan 120m dầm tatua pasei di động kép hu Mintri jalan ba pajeng ba ba mai saong peih ngak chip bruk padang ngak tatua tạm dahlau di harei 15/12 piah duh ka bruk nao mai, pajeng pandap kaya nong di bhap bini. Dahlau di nan, tatua pasei Pne njauk ia sua dui seik ba tal pacang cakak 3 puk oh nao mai hu ngan saong labaih 1.400 menuac daok di xã Đăk Pne, huyện Kon Rẫy, tỉnh Kon Tum hu peih jalan nao tal dom puk meng radaih mac, khik 3 ca nô piah pajeng bhap bini saong pandap mbang menyum tapa kraong.

Vắc-xin Covid-19 kayua dom urang ilamu dalam negar roh duah, tui kuhria hu klauk iek angaok menuac dalam bilan 11 ni. Jru vắc-xin di Công ty cổ phần công nghệ sinh học jru tavao Nanogen (Khu công nghệ cao, quận 9, TP HCM) roh duah patagok hu klauk ka 60 urang halan hatain. Mintri Y tế brei thau: urak ni Việt Nam hu 4 labik ngak jru dalam negardok roh duah patagok vắc-xin Covid-19, tuk camereip mboh siam lagaih . Viện vắc-xin song sinh phẩm y tế tui kuhria hu jru ngak iek lâm sàng di puac thun ni.

Tỉnh Bến Tre daok samar ngak 2 bến phà Rạch Miễu saong tatua Rạch Miễu 2 paih patrun bruk bak radaih di tatua Rạch Miễu, pabak bruk nao mai, pajeng pandap di bhap bini di dom tỉnh ĐBSCL. Dalam nan bến phà Rạch Miễu hu buh jien tame labaih 100 tỷ đồng, atah tatua Rạch Miễu urak ni labaih 10 km, tui kuhria ngak salah saong ba tame pandar dahlau Tết Nguyên đán thun anek sak kubau 2021. Daok tatua Rạch Miễu 2 atah 17,5 km; praong 4 jalan radaih nduac, hu yaom jien buh tame ngak lac labaih 5.123 tỷ đồng, tui kuhria tal thun 2025 hu ngak salah.

Tui Daily Mail, doanh nghiệp di grauk labik dalam Mỹ dok ngak ka nyu khang kajap cửa hàng piah khik caga drap ar dahlau di melam palih ruah 3/11 kayua huac bruk srau kadau meda rah tabiak. Dom kapul cảnh sát đặc biệt jeng daok caga pacang cakak dom menuac ngak srau kadau saong pamabk tame bruk piah blah mek drap ar. Pak di Nhà Trắng jeng dok patagok dom jalan pacang caga, sa paga pacang prong hu padang tagok piah pacang cakak menuac ngak srau kadau. Dalam tuk nan, Rajaei Canada song Úc dok hu panuac ieu bhap bini nyaih atah dom labik di negar Mỹ, abih di nyu nan lac dom labik mbuan rah tabiak bruk trun jalan song tong paoh glong.

Bộ Nội vụ Áo brei thau, takik di nyu 3 urang matai dalam mbang cuh phao pametai manuac di pasak ban Vienna di melam kabroi (2/11), dalam nan hu 1 urang taong tame. Sa urang dalam bruk cuh phao ni nduac dauk hu, kayua yau nan ye, bhap bini daok hu kakei brei daok dalam sang, ranaih oh nao tal sang bac mbiah tal tuk hu panuac khan bahrau. Dom bruk cuh phao pametai manuac hu rahtabiak di 6 labik karei di pasak ban Viên di Áo ngak ka jaik 20 urang matai. Tapa duah thau mboh lac bruk taong paok ni mai meng bruk agama.

Tổng thống Rodrido Duterte di Philippines hu panuac brei thau lac sa ribuk karei meda ba tal rilo khat lihik dok angaok jalan tuh mai negar ni. Rajaei Philippines brei thau: urang metai kayua ribuk Goni –lac ribuk khang abih di dunya dalam thun ni urak ni urak ni tagok takik di abih 20 urang; labaih 90% sang danaok di palao Catanduanes njauk khut tayah. Dalam tuk nan, ribuk Atsani hu pren hangin 80km/sa tuk dok khang tagok di bhum Thái Bình Dương song tui kuhria nyu tuh tame Philippines di puac adit ni./.

Urang lang: Thu Thảo – Hani Pha – 03/11 15:13:04