UNESCO pambuak saong Mentri Pato Megru Viet Nam hu peih jalan kuhria “Khol dahlak meda hu”. Danak dak pamaong tal bruk jhul tagok pato megru STEAM dalam nan hu ilamo khoa hoc, kong nghe, ky thuat, nghe thuat saong toan hoc brei ka urang kamei, abih di nyu nan lac dom bhum urang bangsa takik saong labik daok rilo kan kandah. Langiu di nan, danak dak daok paglaong ilamo ka labaih 650 gru pato, gam haong nan jak ba labaih 300 urang dang akaok dam dara ba drei tame jhul tagok bruk likei kamei samu gauk, tapa nan daong dui ganik sit ka likei kamei dalam majam pato magru.

Piah samar ba dom danak dak tame ngak bruk duh ka gah y te, ilamo saong bruk diukrai di bhap bini rahra, urang ngak praong tinh Ca Mau caong ka dom  don vi ngak salah samar blaoh harak gal, ngak njauk tukvak ba tabiak. Ta-eng danak dak ramik pasiam Sang daoh  Cao Văn Lầu njauk brei caik hatai ka jalan  pasang iek ndap kaya padang ngak, ramik harak brei thau  ka jalan buh jien tame ngak, dalam nan hu bruk padang Jabat ngak bruk di Tinh ndoan saong dom bruk pambuak tal piah khik brei sumu gauk.

Adat Dinh Cô di xa Long Hải, ban raya Ho Chi Minh urak ini daok rah tabiak dalam 4 harei, meng 27 tal 30/3 (lac harei 9 - 12/2 saka ia bulan) di Labik inem mek sajarah Dinh Cô, ngan haong rilo danak dak ngak adat bhap bini pambuak haong ilamo – pahat padhih – jirah rivang biak gheih, ngak jeng bruk takre dui pachreih tuai damuai. Dom kapul pakacah dom bruk ngak bhap bini yau pak hanyuel, nao ca kheo; tamia lân - sư - rồng rah tabiak luac bhian. Var malam lac danak dak mblang adaoh tamia pamedeih sakarah bruk padang Dinh Cô, daong ka mikva thau tani tanat jang ka halau agha inem mek.

Rija Dua Tpeng di urang Khmer xã Lộc Hưng, tỉnh Đồng Nai lac janih ilamo bhap bini ralo janih hu meng lavik rai mai, ndung bak rilo ilamo siam gheih. Roya brei mboh adat cambat di urang ngak padai ia saong ngak apuh. Tapa adat rija roya, urang bangsa Khmer caong khin brei salamat, khang kajap, phun kayau that hijao, phun kayau rak dhar hala athur raong caik menek bak var, bilan yuak kuak hu rilo padai brah. Roya hu yaih khan  rilo kaya mbang biak bingi di urang bangsa Khmer, S’Tieng…

Meng harei 3/4 tal 30/4 jaik tal, 16 kapul juak radaih danei angan dalam negar meraik gauk dalam Mbang pakacah radaih juak dalam negar cup papar binguk Ban raya Ho Chi Minh – “Taneh ia hasa”, dalam nan hu 25 jalan nduac, taong abih jalan nduac atah 2.745 km. Dom urang pakacah di jalan akaok meti di harei 3/4 di tinh Phu Tho – bhum taneh halau agha di bangsa negar Viet Nam, hadei nan nao tapa dom tinh, ban saong tamat di kreh pandiak jala harei 30/4 anak hoi truong Thong Nhat, Ban raya Ho Chi Minh…

Hadei 4 thun padang ngak veik, meneing ha tang meng kan di Mblang pakacah  La Mã cổ đại brei paieh pabah mbang gilac di ban ine Roma, Italia. Ngak veik mbaok patau cur tamo yau meng kan, dom kien truc sư daong ka tuai damuai hu thau ka danak dak padang ngak blaoh meng 80 thun hadei Cong nguyen. Njauk ndem tal, labik mblang bein birau  peih pabah mbang oh mek jien, brei ka bhap bini saong tuai damuai hu rivang iek bo oh abih jien blei harak ve.

Kapul phling ragam K-pop danei angan BTS bahrau ba tabiak album bahrau abih angan Arirang ndom ka bruk praong tagok ka halau agha saong ilamo Han Quoc di kapul. Piah salam uan danak dak ba tabiak album, BTS hu peih sa bruk par drone biak gheih truac hadah langik New York Mỹ. Yaok rituh baoh drone ngak jeng dom thaik thaot siam gheih di angaok langik yau mbaok meta di BTS, Arirang… ngak jeng thaik thaot gheih dui pachreih fan chreih takre di dunya.

UNESCO birau khan brei thau biak haduh hatai anak dom  bruk kan kandah kayua  mesruh metak ngan haong dom drap ar sajarah dakrai di Iran. Dom mbang patuh phao di Mỹ saong Israel taong  tame Iran  ngak khut tayak 4 labik ilamo saong sajarah dakrai, dalam nan hu dom medil saong sa sang megik meng kan dahlau. Bruk ini ngak haduh hatai ka dom peih praong mesuh metak ngak khut tayak dom labik gheih mekre meda daok khik catang.