Tổng yam ndoc Rayo sao ndem Viet Nam (VOV) alin brei pandap ka anek saih, bhap bini urang bangsa takik di ban sit Sa Pa

Kapol ngak bruk di Rayo sao ndem Viet Nam (VOV) saong Uỷ ban Bangsa kayua ong Đỗ Tiến Sỹ, Ủy viên Trung ương Đảng, Tổng yam ndoc Rayo sao ndem Viet Nam (VOV) saong ong Hầu A Lềnh, Ủy viên Trung ương Đảng, Akok mentri, Akok Uỷ ban Bangsa ba kaok nao rivang, alin brei pandap ka anek saih, bhap bini urang bangsa takik di ban sit Sa Pa, tỉnh Lào Cai uan raok Tet nguyen dan. Rilo paoh pandap, jien, pandap panda karei gam haong yaok rituh mac tính bảng, yaom abih tih jaik 1,7 tỷ đồng hu Kapol jao brei ka anek saih, Kadung jien pachreih bac saong bhap bini kan kandah di ban sit Sa Pa.

TPHCM  hu padang 6.000 “bhum hijao” di dom tổ dân phố, tổ bhap bini, khu phố, ấp, dom jalan sit, jalan praong, chung cư di dalam ban raya HCM. Urak ni hu labaih 156.000 bhap bini gam hu mbaok tame khik caga “bhum hijao”. Yaok “bhum hijao” lac sa tổ dân phố, khu phố, ấp, labik bhap bini, sa baoh sang chung cư ngan haong dom jalan ngak piah eng drei khik ramik, eng drei pasang iek manuac urang saong radaih tame, tabiak.

Parang iek kadha “ Rimong dalam mỹ thuật meng kan di Viet Nam” taduan raok tuai meng harei 18/1 tal harei 31/8/2022 di Muyim Sajarah dak rai pakat negar, labik: 1 Tràng Tiền, Hà Nội. Meng labaih 30 pandap saong dom harak tài liệu, thaot binguk hu palih ruah, parang iek daong urang mai duah thau saong sahaneng dalam jang ka bruk duah pataom pandap, makna di thaot binguk rimong dalam sajarah dakrai ilamu Viet Nam.

Uỷ ban Mặt trận negar Việt Nam TP.HCM, kapul urang kumei Doanh Nhân TP.HCM (HAWEE)  saong dom doanh nghiệp peih danak dak siêu thị Tết mini zero đồng piah daong ka bhap bini TP.HCM rok Tết  hadei di sa thun njauk kan kandah kayua jit ruak. Meng harei 8/1 tal 21/1,  hu 32 siêu thị hu peih di 22 quận, huyện saong Ban Thủ Đức piah duh ka bhap bini mai tal blei pandap Tết.

Pasak kuhria mboh dahlau bruk langik tasik pakat negar brei thau, meng harei ini tal harei 20.1, ia mbak njom tame bhum taneran kraong Cuu Long meda dak harei dak tagok. Dom tỉnh brei samar pataom piah ia.

  Harei 14/1, Gah Y te dunya WHO hu pasang iek, brei ngak dua jalan birau taong ruak Covid-19, tapa nan brei pabak tame pandap dahlau gam haong dom janih vaccine urak ini piah pacang caga ruak trak saong metai ka urang ruak Covid-19. Dua jalan taong ruak nan lac pandar jru taong ruak talang khớp hu baricitinib saong kháng thể tổng hợp Sotrovimab.

Tổng thống Joe Biden brei thau, Mỹ meda pabak brei saoh dom blah pataih pacang mbaok chất lượng glaong ka bhap bini, dalam tuk dom menuac njaom ruak bahrau Covid-19 meng biến thể Ô-mi-crôn (Omicron) tagok glaong dalam taneh ia. Ong Biden brei thau, Mỹ brei tagok jang jaik 3 mbang gilang khik piah di negar ka pataih pacang mbaok N95 biak siam, khik caga hu glaong saong hu panuac kakei, pataih pacang mbaok lac sa janih praong daong pasang iek bruk njaom mbak di biến thể Omicron.

Dalam sa panuac brei thau kayua  Hội đồng Châu Âu birau ba tabiak, Liên minh EU mbang ka 15 brei dui atah jang 6 bilan dom adat taong phat kinh te pamaong tame dom gah cambaic laic di kinh te Nga, meng pauac bilan ini mbiah tal harei 31 bilan 7 thun 2022, kayua dom bruk ngak trun bruk ngak po saong khik caga taneh ia di Ucraina./.

Urang lang: Bhumi – Thu Thao – 15/01