Dalam nan hu dong labaih 1.500 harak radaih ka urang ngak,song sinh viên đại học mai palei

2 ribau harak kapan haoh, harak radaih ô tô, harak radaih pasei brei saoh ka sinh viên, dam dara urang ngak hu rai duik kan kandah mai palei raok tết Nguyên đán 2022 hu Kapul dam dara CS Hồ Chí Minh pakat negar song Tổng Công ty Bia - alak – Ia menyum Sài Gòn alin brei ka sinh viên, dam dara urang ngak hu rai duik kan kandah mai palei raok tết Nguyên đán 2022 dalam danak dak “Tết dalam sa boh sang”; Dalam nan hu dong 270 harak kapan haoh, labaih 1.500 harak radaih song 200 harak radaih pasei 2.000 urang ngak,song sinh viên đại học di Hà Nội, Bắc Ninh, Bắc Giang, ban raya Hồ Chí Minh, Bình Dương song Đồng Nai mai palei. Langiu di nan, hu jao pandap Tết ka 800 sinh viên, urang ngak, urang ngak kan kandah, urang đoàn dam dara song urang halan hatain ba akok nao dahlau dok veik pak ni piah raok Tết Nguyên đán di ban Hà Nội, dom tỉnh Hòa Bình, Quảng Ninh song ban raya Hồ Chí Minh. Dom mbang par, dom sruh radaih brei saoh hu peih meng harei 24/1 tal harei 28/1/2022 (njauk di harei 21 – 26 bingun bilan 12 tui saka ia bilan).

Kayua jit Covid-19 daok srau kadau nan ye Tết Nguyên đán thun ini, Cà Mau brei padeih rilo bruk nao ravang, pataom mbaok praong. Yaom lac brei padeih dom bruk ngak min urang pan akaok tỉnh Cà Mau jeng daok nao ravang, alin hadiah pandap di dom labik y tế, abih di nyu lac di dom labik daok taong ruak ka urang ruak Covid-19, kuhria gam dom labik iek ruak pakat huyện, jeng yau dom sang hu gauk gar metai kayua njom Covid-19 lac sang kan kandah. Gam haong nan tỉnh hu caik tabiak jaik 40 tỷ đồng brei ka dom bruk nao ravang, alin hadiah pandap, daong pabak pandap mbang ka urang ruak njaom Covid-19 daok taong ruak.

Mbang padeih Tết Dương lịch 2022 dui atah, jeng lac tuk piah du lịch Bình Thuận kham merat ramik pasiam bruk dalam tuk vak dok kan kandah di jit Covid-19. Tui panuac khan di tuk Tết Dương lịch ni, rilo labik ngak mbang padeih padei meng 4 patuh tagok mangaok jalan du lịch prong Hàm Tiến - Mũi Né hu taduan tuai biak rilo, rilo meng lac tuai dalam taneh ia mai meng dom tỉnh, ban gah merong . Piah bruk du lịch siam mekre salamad, dahlau di nan Sở ilamu , Thể thao song Du lịch hu ramik veik asal kadha tacei pato di anak meta dom jalan “palagaih siam mekre, sami samar, pasang iek lagaih jit Covid - 19”, tui nan oh pacap dut iek tuia du lịch mai meng bhum hajao, bhum katam.

Meng harei paguh (4-1-2022), anek saih di dom sang bac Trung học cơ sở haong Trung học phổ thông di TPHCM nao bac veik di sang bac. Hadei di 2 adit peih pato tapak ka anek saih tal 9 saong tal 12, yaom lac hu dom F0 min oh ka mboh njom mbak nao mai dalam dom anek saih di sang bac. Urang pan akaok Sở Pato Megru hu oanuac kakei dom sang bac, brei ngak njauk bruk pacang caga jit ruak, plaih bruk anek saih pataom gauk rilo di labik duk iek pandiak dalam rup, labik rao tangin pameta anek ruak di mon tame saong mon tabiak bac. Gam haong nan, dom sang bac njauk khik bruk bhian randao ka anek saih khai báo y tế saong tui iek prein yava di sang piah khik kajap bruk pacang caga jit ruak. Abih di nyu lac, tuk hu anek ruak bahrau, dom labik brei khuria dhalau, caga dom jalan ngak piah khik salamat dalam sang bac. 

Tui jabat Ủy ban An toàn giao thông pakat negar, dalam 2 harei padeih Tết dương lịch 2022, dalam negar hu 41 mbang radaih paoh gauk, ngak brei 27 urang metai, njauk rambuac 25 urang. Bruk njauk biai nan lac, bruk gaok bala di 2 sruh radaih di palei Tân Sa, xã Vinh Xuân, huyện Phú Vang, Thừa Thiên Huế tukvak 20tuk 10 minite harei 1-1 ngak brei 3 urang metai. Dut song 2 harei dalam tuk vak ni thun dahlau, dalam 2 harei akaok meti di mbang padeih Tết dương lịch 2022, bruk radaih paoh gauk trun 1 mbang, tagok 3 urang metai.

Hajan dui atah dalam 2 adit tapa di Malaysia ngak brei labaih 125.000 menuac njauk panduan nao daok di labik karei. Mintri Thủy lợi Malaysia jeng khan lac, dom mbang ia tagok glaong meda hu meng ini tal harei 5/1 saong kakei menuac sia daok di bhum tapen tasik gah pai vịnh Malaysia paglaong hatai sangka. Mbang hajan ia sua ini hu maong lac "ratuh thun meng hu 1 mbang", hajan praong cakak klaoh rilo jalan praong, ngak brei rilo ban, rilo palei dauk dalam ia. Rajaei Malaysia meda daong 1,4 tỷ Ringgit (labaih 336 triệu USD) ka dom menuac gaok kan kandah di mbang ia dauk khang mbang ini. Taneh ia ini jeng hu panuac caong “Quỹ Khí hậu xanh” di Liên Hợp Quốc daong brei 3 triệu USD piah patagok bruk di negar pacang caga biến đổi khí hậu.

Jabat Cao ủy Liên Hợp Quốc ka urang tị nạn tong yaom, thun 2021 labik Mỹ Latin song Caribe hu bruk di cư rilo di abih, kayua kan kandah di jit COVID-19. Dalam nan hu Mexico jeng sa taneh ia nao tal, jang yau sa taneh ia pataok takai ka urang di cư duah jalan tal Mỹ, hu labaih 100.000 harak likau tị nạn. Langiu di nan, jiak sa triệu urang dalam bhum Trung Mỹ njauk klaak sang dok kayua kurang bruk ngak, tong phaoh, tội phạm, bruk palai pajoa di jit prong COVID-19 song biến đổi khí hậu. dalam puac thun 2021, dom kapul nyaom dunya hu peih ngak sa bruk ieu pataom jien ndua piah padang kadung jien yaom 1,79 tỷ USD piah langyah ka bruk urang tị nạn song di cư.

Viện Khoa học Y khoa ban ine Tokyo daok roh duah janih vaccine COVID-19 ba mai miễn dịch luac rai saong khik piah hu mbaun di nhiệt độ dalam bilik. Do ngak iek hu peih ngak angaok takuh brei mboh dom drei takuh hu klauk janih vaccine ni meda khik hu kháng thể glaong dalam labaih 20 bilan. Meyah klauk mbang vaccine ka 2 ka athur ngak iek hadei di 3 adit, dom kháng thể meda tagok jang 10 mbang. Dom urang ilamu jeng brei thau, janih vaccine ini takik hu tác dụng phụ jang duk haong dom janih vaccine hu brei adat pandar meyah dalam tuk samar drah njauk pandar chip./. 

Urang lang: M. Phuong – Hani Pha – 03/01