Di bingun 81 thun Katmang bilan Dalipan, Harei Negar 2/9 saong harei Kong an rahra (19/8), Kong an tinh An Giang pambuak haong phuong Tịnh Biên saong dom urang ngak pahla peih bruk jao alin 200 paok pandap kapul an ninh di labik, baoh sang kathaot, baoh sang kan kandah saong baoh sang bangsa Khmer dalam bhum. Yaok paok pandap hu dom kaya njauk hu yau ye brah, mi paok, taong abih yaom kaom labaih 60 trieu dong…

Di tinh Ca Mau, Kapul My thuat Viet Nam bahrau peih pakak Labik Parang My thuat labik VIII – Bhum Taneran kraong Cuu Long mbang ka 30. Labik parang 115 kaya anakhan di 103 urang mai meng 5 tinh, ban: An Giang, Ca Mau, Can Tho, Dong Thap saong Vinh Long. Dom anakhan brei mboh rilo gah ka palei negar, taneh ia, anek menuac bhum Taneran kraong Cuu Long, gam haong nan brei mboh bruk roh duah, hadah krah di dom nghe si dalam luac jalan paneh.

Meng khau tin di ong Lê Văn Tuấn, rahra palei Bình Minh, xa Krông Búk, kapul chuc nang tinh Dak Lak hu roh duah, ba tagok sa atau talang bol lin di Kubo Labik ngak nong Cư Kbô, palei An Bình, xa Krông Búk. Atau talang bol lin daok mbiah tamo gam haong dom kaya ndap nda kacing khan ao bol lin, sa thaong kalik juak kasu, sa tasi, khan bai tasal, talei tasal saong ao hajan bol lin. Kapul K51 hu mek mau tagei piah duh bruk ngak tantu ADN tui adat.

Phuong Tiến Thành, tinh Lam Dong pambuak haong Bo Tu lenh Bhum Canh sat tasik 3 bahrau peih danak dak “Canh sat tasik daong urang nao tasik”. Gah peih ngak danak dak hu jao alin 40 paok kaya alin ka dom baoh sang mbang tui sarak saong urang nao tasik kan kandah, yaok kaya alin hu yaom 1 trieu dong; pasang iek ruak, langyah prein yava saong brei jru oh mek jien ka dom urang dalam sarak saong urang nao tasik baoh sang kan kandah dalam bhum.

Daok di tinh Dak Lak, Balai Bien phong An Hải, xa Ô Loan pambuak haong dom sang iek ruak, kapul ngak pahla saong gah ngak pahla di Ban raya HCM bahrau peih bruk pasang iek ruak, langyah prein yava, brei alin jru saong alin kaya oh mek jien ka labaih 300 urang daok dalam baoh sang mbang tui sarak, baoh sang kan kandah dalam bhum. Gah Padang peih ngak jeng alin 300 paok kaya lac dom kaya njauk hu daong pasiam hatai di bol lin saong rahra, daong mikva bhum tapen negar hu tani tanat raidiuk.

Darak pasar nang luong dalam dunya daok ciuk kateik geik dak harei dak praong kayua klaih klaoh halau pabak menyek tamo di Trung Đông. Dom labik halang menyek di Trung Đông ciuk kan kandah tapak meng mesuh metak, dalam tuk nan bruk pajeng ba menyek tapa eo tasik Hormuz hu gaok gilac. Mbang meesuh metak dui atah di Nga saong Ukraine hu ba tal hu patakik pablei tabiak menyek.

Kapul kong nghe Trung Quoc Xiaomi hu pathau khan kaya bahrau di chip smart phone X-ring O3, dalam kham merat patagok bruk pasang iek linh kien pasak, pasiam majam pabak saong patakik bruk pambak tame dom gah ngak tabiak chip di langiu. Xring O3 kuhria hu pagam di smart phone talauk jaik hu ba tabiak di Xiaomi, ngan haong jalan patabiak labik ngak meng 200.000 tal 300.000 baoh phone.

Tong thong My Donald Trump daok jhul tagok bruk pandar sac lenh hanh phap ka bruk cakak patrun ka dom vaccine dalam danak dak klauk jru caga brei ka uranaih. Sac lenh hu ong Trump jhul tagok caong khin brei patrun dom janih vaccine dalam tukvak klauk jru caga ka uranaih lien bang meng 17 mbang klauk trun daok 11 mbang klauk, gam haong nan neh vaccine 3 dalam 1 caga ruak sởi, pok baok saong rubella jeng 3 mbang klauk karei gauk.