Quoc hoi harei kabroi hu brei tapa danak dak Hukum Patagok ban medin. Hukum brei ngak bruk, sarak cakrok samar, pabak hatai caong jhul patagok ban medin kaei crih, dalam nan hu Ban raya HCM. Bi thu Ban uy Ban raya HCM Trần Lưu Quang ndom lac, piah mek hu tanut cakrok dalam thun “dua lek taka”, kateik geik dalam dom bilan daok gilac lac biak praong. Bruk ini brei hu Ban raya HCM oh meda ngak tui bruk ngak klak blaoh brei khik tani tanat bruk bahrau saong dom bruk cakrok lagaih. Hukum Patagok ban medin lac sa “bruk jhul tagok” piah Ban raya HCM ngak bruk nan.

Patui veik peih praong bruk roh duah di Khu B, Bein bangu Lê Thị Riêng, Ban raya HCM, harei kabroi 24/8, kapul urang pataom hu duah mboh veik 26 atau talang bol lin saong 10 kaya hu makna. Yau nan ye, tal ini dom kapul hu duah mboh, pataom taong abih 481 atau talang bol lin. Dom kapul patui veik peih ngak samar chip, ngan haong hatai kham merat aval drah roh duah, ba dom AHLS gilac mai haong baoh sang saong ayut cuai.

Tinh Gia Lai hu peih ngak Vong Chung ket dalam negar Mbang pakacah hadah krah Robot 2026 ngan haong bruk hu mbaok di 160 kapul, 467 urang kacah. Ngan haong kadha "Robot taom gaok Ilamo", mbang pakacah caong khin anek saih pandar lap trinh, thiet ke ky thuat saong sahaneng hadah krah piah langyah dom kadha pagam haong drap ar ilamo, seni saong raidiuk. 3 kapul mek hu yai Nhat, Nhi saong Ba saong lambaok ka Viet Nam hu mbaok tame Vong Chung ket Mbang kacah hadah krah Robot dunya.

Tinh Dong Thap hu srap gap padang jalan pasang iek halau ia, pacang ia mbak, khik ia yamein, pasiam tukvak ngak, khik kajap ia pandar saong patakik khat lahik kayua pambuak di El Nino. Ngan haong bhum phun mbang baoh, gah chuc nang tinh Dong Thap pachreih kakei rahra oh pala bahrau, langyah brei tabiak bangu karei bilan di bhum mbuan rah tabiak pandiak bhang, njim ia mbak glaong tuk oh ka srap gap hu halau ia; pasang iek tanut mbak dahlau tuk tui ia saong tui ia patak pataom.

Harei kabroi 24/8, Balai Bien phong Lai Hòa, Bol lin Bien phong ban raya Can Tho hu pambuak haong karja palei peih bruk pasang duah, kuhria khat lahik, pasiam bruk khut tayah di angin gaving rah taabiak di bhum phuong Vĩnh Phước, ban raya Can Tho, ngak khut tayah 27 sang rahra, dalam nan 1 baoh sang jaleih taong abih. Balai Bien phong Lai Hòa hu jak ba 3 mbang, ngan haong 18 urang jakar, bol lin trun bhum palei, pambuak haong karja saong rahra samar drah ramik, pasiam, pakajap sang danaok njauk khut tayah, daong rahra samar drah tani tanat raidiuk.

Dom mbang apui khuah glai di grauk chau Au bilan pandiak he thun ini daok ngak mblo tabiak bruk mbuan metai menuac di ala dalam taneh nan lac rilo mbom siu daok labaih meng jaman mesuh metak, ngak kan kandah tapak tal salamat di kapul daong padam apui. Bruk pandiak bhang saong apui khuah glai bilan pandiak he thun ini daok patui veik ngak cambaih laih jang bruk kan kandah suai atah meng bruk daok kandaong labaih meng jaman mesuh metak di chau Au.

Akaok Mentri Menyek Iran Mohsen Paknejad hu pathau khan, negar ini bahrau duah mboh labaih 7.500 ty feet khoi (samu 21,24 ty m3) tru luong thak cuh di sa labik mỏ di tinh Fars, bhum Meraong negar ini. Halau drap ar bahrau ini ngak tagok yaom kaom drap ar di Iran yaok pluh tu USD. Hadei Nga, Iran lac negar hu tru luong thak cuh praong ka dua di dunya.

Japon hu ba tame ngak mac jamraik luong tu rai bahrau, pandar tui dom bruk karei di dom kaya biak sit yau electron saong nguyen tu... Urak ini, majam bahrau hu bruk ngak dom bruk kuhria mbuan mbiah, min dom kapul roh duah hu jalan ngak patagok piah ngak dom bruk kuhria katih praong hu tani tanat.