Kuhria meng mon 8 tuk page harei 24/11, hajan ribuk ia sua di dom tinh bhum kreh negar ngak 102 urang metai saong lahik; labaih 1.100 baoh sang khut tayak, glut jaleih. Kuhria khat lahik labaih 13.000 ti dong. Piah daong mikva  samar tani tanat raidiuk, Thu tuong Phạm Minh Chính birau hu harak payua tal dom mentri, dom gah saong 4 tinh pataom tame daong bhap bini ramik, ngak hacih sang danaok, labik ngak bruk, jalan mbak, piah samar  hu pasiam veik bruk ngak nong nghiep; daong tapuk siphau, kaya ndap nda  pato bac, samar ba anek saih  gilac veik mai bac; Ba rilo urang y, bac si trun tal bhum palei daong bruk iek ruak; Kadun tukvak  bayar sre, oh jien laba atau laba lap phun sre mesre  ka urang, doanh nghiep gaok kan kandah kayua ribuk.

UBMT negar Viet Nam TPHCM hu payua 211 tấn kaya ndap nda  daong ka tinh Khanh Hoa piah daong ka mikva bhum ia sua. Gam haong nan hu alin brei harak thaoik phun jien 50 ti dong ka tinh Khanh Hoa. Ban raya  peih bruk  daong samar chip tui 6 bruk praong nan lac samar pabak kaya mbang, daong kaya pandar yaok harei saong raidiuk, daong jru cavao, ramik pasiam alam moi truong-ha tang. Padang  4 labik ging tahaneh mbang, yaok harei brei 12.000 paok lisei huak ka mikva saong urang lin ngak bruk daong ka dom labik gaok bala trak.  

Tui Jabat kuhria dahlau ka alam langik Dong Thap, ia ndik meng akaok bilan 10 tui saka ia bulan daok di tanut glong, ngak ia tame ralo labik. Urak ini, ia tagok glong di balai Cao Lãnh lac 233cm, ia tagok pakat III lac 3 cm. Meng ini tal harei 26/11, ia ndik tagok glong gam hajan praong  ngak ia dauk ralo labik  dhaong, biar, labik tapen kraong, labik jaik ar pacang. Ia ndik ngak kan kandah tal bruk pala drak, phun mbang baoh, njam patam, raong pala kaya dalam ia, jalan mbak nao mai, raidiuk mbang ngui.

Dang uy xa Long Phu, ban Can Tho birau ba tabiak bruk ginum biai oh hu tavak meng ba-ar. Tui nan, taong abih dom mbang ginum biai hu peih ngak meng harak dien tu, oh hu pandar harak ba-ar yau dahlau diah, langiu harak ba-ar khik kandauk tui kadha ba tabiak. Khik brei kandauk saong siam ka dom harak gal dien tu. Labik ginum biai hu ginup mac dien tu, jalan internet tani tanat, khik brei salamat, khik kandauk asar kadha. 

Mbiah tal ini, jabat chuc nang hu mbaoh harak bayar jien, daong 314 ti dong ngan haong 153 taneh kuhria abih tih praong labaih 58 ha di Danak dak Jalan peih Drah samar Ban raya HCM - Thủ Dầu Một - Chơn Thành tapa tinh Dong Nai. Tuk Danak dak Jalan peih Drah samar Gia Nghĩa - Chơn Thành ngak salah blaoh jalan mbak pambuak haong bhum Tay Nguyen, pambuak bhum, jhul pakhang bruk cakrok patahok kinh te - xa hoi, khik kajap quoc phong, an ninh di dom bhum pelei saong dalam negar.

Jaik 200.000 urang Ukraine daok diuk di Mỹ gaok kan kandah kayua harak gal oh cambaic laic kayua ngak catang sarak oh brei urang negar karei tame daok. Bruk nan dak harei dak trak jang hadei tuk karja Tong thong  Donald Trump padeih pasang iek harak gal ho so di danak dak daong ka urang negar Ukraine dauk kalin kan, mesruh metak. Dahlau di nan, bilan 4 thun 2022 Tong thong dahlau diah  Joe Biden brei adat ka labaih 260.000 urang Ukraine tame daok negar Mỹ dalam dua thun.

Labaih 5.000 urang Malaysia brei klak sang danaok nao kayua ribuk ia sua biak trak rah tabiak di dom bang gah Barak, dalam nan Kelantan lac bhum gaok khat lahik trak. Cuc Khi tuong Malaysia brei panuac kakei langik jhak hajan dui atah gam hangin khang, meda ngak jhak dalam dom harei anak tal. Ia ribuk  bhian rah tabiak di bhum gah Ia harei tagok negar Malaysia  di puac thun ini.

Hoi dong An ninh Mạng Dom tieu vuong quoc  Arập thống nhất (UAE) brei panuac kakei dahlau tuk mbuan mblo tabiak du lieu di drei bo tuai damuai  meda gaok tuk dom labik sac pin cong cong oh hu pacang khik tani tanat. Kayua dom labik sac dien meda hu pagam phan mem doc hai atau hu pagam mac kandauk piah ngak dom bruk "Juice Jacking".  Salih ka bruk pabak dien, labik sac ngak labik nan  jeng  jalan pathau khan brei adat ka kol co blak  tame tavak mat khau, khaw tin di urang atau pagam ma doc tame phone tangin di urang./.