Labaih 6.000 urang di Ban raya HCM harei kabroi hu mbaok tame danak dak nao tabak takai, padeih padei Harei Hukum Viet Nam 9/11. Ini lac danak dak pamaong tal pahadar 80 thun Quoc hoi tapa Hien phap thun 1946 pagam haong Harei Gul pataom taong abih bangsa dalam negar 18/11 saong harei Ilamo Viet Nam 24/11. Danak dak daok daong paglaong ilamo, bruk bhian randap srap gap duah thau, ngak tui hukum. Gam haong nan pambak tabiak hatai gul pataom pahat padhih, padang raidiuk siam mekre.

Mban Ngak bruk Mat tran labik 8, phuong Cái Khế, ban raya Can Tho bahrau peih Harei Raya Gul pataom taong abih bangsa dalam negar pagam haong Harei Ilamo Viet Nam thun 2026. Dom thun tapa, urang jakar hu mbaok tame dom danak dak pakacah anit ranam, jhul khang bruk ngak dom mbang jak ba, khik tani tanat peih praong dom bruk ka patagok kinh te, xa hoi, khik kajap an ninh quoc phong di phuong. Di Harei raya, ban raya Can Tho alin 5 baoh sang Gul pataom hu yaom 400 trieu dong ka dom labik daok rahra saong 50 paok jien pachreih bac hu yaom 50 trieu dong ka dom adei anek saih raidiuk kan kandah.

Di xa tapen negar Buôn Đôn, Bol lin Bien phong tinh Dak Lak pambuak haong Uy mban Mat tran Negar tinh bahrau peih pakak saong jao alin 2 baoh sang Gul pataom alin ka baoh sang raidiuk kan kandah. 2 baoh sang hu jao alin ka baoh sang amuk H Bdia Bkrông, di mbon Đrang Phốk saong baoh sang ong Y Căn Na Đy Hra, di mbon Trí. Yaok baoh sang praong 60m², jien padang 110-120 trieu dong. Urang jakar, bol lin Balai Bien phong Sê Rê Pốk saong Balai Bien phong Bo Heng daong harei padang.

Di Mblang bein Gul Pataom Praong, phuong Pleiku bahrau rah tabiak malam raya kong caing tinh Gia Lai thun 2026. Bruk njauk chreih takre di danak dak lac raya pathau khan, iek praong Kaya drap ar paket negar Majam kong caing Kơ Đơ di urang Jrai, hu meng akaok abap XX. Majam hu 8 baoh, daok dalam janih caing urang Jrai bhian pandar dalam ndam likhah, adat uan sang bahrau atau likau prein yava. Dahlau tuk hu Gilang Khik drap ar Pleiku pataom khik di thun 1997, majam caing hu sa baoh sang di mbon palei Broái, xa Ia Tul, khik ramik tapa rilo rairah.

Mboh urang likei var glai haong kraong ia nduac khang di labik tatua Hóa An, Dai uy Đoàn Châu Khanh, urang jakar Kong an phuong Tam Phước. Ban raya Dong Nai, tak di nan cuk ao phao, plaong trun ia ba urang tagok ar salamat. Urang angan N.V.T. (Ndih tapui 1999). Kayua dreut druai bruk di baoh sang, sa-ai T. duah tal labik tatua Hóa An blaoh plong trun ia ta-eng pametai rup drei. Tuk prein yava saong hatai sa-ai T. hu pasiam. Dai uy Khanh hu tapak ba urang mai sang, jao salamat ka baoh sang sangka.

Labik Parang Drap ar ilamo oh mboh di meta Trung Quoc mbang ka 9 daok rah tabiak di ban Trùng Khánh, Trung Quoc yaih khan dom yaom kaom ilamo nao tal jaik jang haong raidiuk urak ini, njauk ndom tal lac urang sit umo. Taphia dom kaya ngak meng tangin, labik parang daok yaih khan bruk pandar ilamo kong nghe taka so dalam bruk khik ramik saong yaih khan drap ar. Tuai mai jirah rivang meda hu pambuak haong man hinh piah ba drei tame tamia ine girai Đồng Lương dalam labik ngak ja ảo; dom thaik thaot cakak meng bi-ar dom anek nethak thun jeng hu brei mboh chreih mekre meta.

Dom harei ini, di grauk ban medin saong palei di An Do daok chreih chrai raok raya Tanrak hadah Diwali - raya praong abih dalam thun di urang aguma Hindu, bhian hu pagap yau Tet di urang An Do. Ini oh tok lac bingun raya adat di aguma blaoh daok lac tukvak baoh sang gul pataom, rivang tangi urang dalam sang saong payua ka gauk dom panuac tadhau ayuh siam gheih. Kadha bo raya tanrak hadah khin payua oh daok dalam bruk gheih siam di dom baoh gom, bo di hatai je tame bruk siam gheih, hatai anit ranam saong bruk klah rabha di anek menuac haong gauk. 

Urang jakar UAE harei kabroi 8/11 pathau khan, kapul pacang khik di negar ini hu daong jak jeng 22 urang peih nduac gilai lac urang Arab, di sa gilai kaya njauk apui khuah di vịnh Oman. Dalam tuk nan, kapul Mỹ di labik jeng pathau khan hu cuh njauk saong ngak vô hiệu hóa sa gilai pajeng kaya di vinh Oman. Bo Tu lenh Pasak Mỹ đặc trách labik Trung Dong (CENTCOM) ndom lac suh gilai njauk taong tame kayua ngak suan bruk phong tỏa bol lin tasik brei kateik haong Iran./.