Rajaei bahrau mbaoh sarak meng 1-1-2027, anek saih, sinh vien raidiuk kan kandah lac rahra Viet nam daok tui bac di dom labik pato pakai brei hu mesraiy rilo abih lac 8 trieu dong/bilan (glaong tagok dua mbang dut saong urak ini) piah daong pandar ka bruk bac megru, daok dang. Tui sarak, Gilang pariak Sarak rahra ngak bruk brei mesraiy tapa baoh sang. Lambaok ka baoh sang di anek saih, sinh vien lac urang dang angan mesraiy saong meyao meyit haong Gilang pariak Sarak rahra.

UBND TPHCM birau ba tabiak jalan buh jien tame ngak danak dak Paglong, pasiak, ramik Balai pajeng ba hareik khang Long Trường (phường Long Trường, di Ban Thủ Đức klak) kuhria rah tapa hu labaih 400 ti dong. Danak dak iek praong bruk padang ngak sang birau meng kaya ngak meng hareik, balai kuhria teik trak, manuac ngak bruk gam ramik hareik, mbau saong ia nerak. Tapa nan, sumu bruk parabha hareik, pasang iek njom nerak saong salih birau do thi, rik tame ngak brei patagok khang kajap.

Harei Ilamo Viet nam thun ini brei pagam haong Raya Gul pataom taong abih bangsa negar, urak ini dalam negar hu srap gap labaih 400 danak dak snei adaoh tamia, danak dak pahat padhih, parang yaih khan tal bhap bini. Tui PGS-TS Bùi Hoài Sơn, Phaok Akaok Mbang Tuyen giao Trung uong, ini lac bingun pok meyaom dom yaom kaom ilamo, paglaong pambuak pagam bhap bini, paglaong bruk ngak po saong bruk ngak po di rahra dalam padang raidiuk ilamo. Kayua nan dom danak dak pamaong tal labik, rilo meng lac palei, to dan pho, labik daok rahra, haong dom bruk jaik taphia yau pambuak me-in adaoh tamia, parang adaoh bhap bini, ragam tamia bhap bini, ba drei tame drap ar.

Urak ini, dalam TPHCM hu jaik 7 trieu urang hu pasang iek prein yawa, sumu 54% bruk ba tabiak dalam thun 2026. Tui PGS-TS-BS Tăng Chí Thượng, Yam doc Sở Y tế TPHCM, danak dak dut iek prein yawa taong abih bhap bini hu salih karei siam mekre, bruk peih ngak oh ka sumu gauk di dom kapol nyaom, abih di nyu lac urang ngak saong sinh vien. Njauk caik hatai lac dut iek prein yawa di dom bhum palei mboh ralo takik karei di gauk.

Tui balai Kuhria Langik tasik – Kraong ribaong meraong negar, dalam dom harei puac adit ini Lam Dong saong dom tinh bhum Pur Meraong negar jeng hu hajan angin, hajan praong pagam tui jakala saong angan ndaoh khang. Balai Kuhria langik tasik kraong ribaong Meraong negar caik hatai sangka rahra brei srap gap dom jalan pacang caga, patakik ngak bruk di langiu langik tuk hu jakala, angin ndaoh khang. Di ban raya HCM, gam haong bruk mbuan ba tal hajan praong di sa labik, rahra brei caik hatai ka bruk ia ndik tagok glaong tui mbang ia ndik akaok bilan 10 tui saka ia bulan, ngak pambuak tal bruk nao mai saong daok dang di rahra dalam dom harei puac adit.

Urak ini, kaya mbang dalam bilan 9 di urang ngak pak Nhat Ban tagok 2,2% dut saong tukvak ini thun dahlau, brei mboh bilan patagok mbang ka 9, jien mek tame jeng tagok  khang dalam jaik 30 thun tapa. Langiu di nan, jien alin Hè, hu bayar meng bilan 6 tal bilan 8 thun ini ka urang ngak. Dalam tuk jien bilan tagok, saong jien bilan Hè jeng tagok khang meda brei samar tagok jien bilan  ka urang ngak dalam tukva anak tal.

Dom jabat Lien Hop Quoc bahrau ieu da-a paok jien daong samar chip 8,9 trieu USD piah pabak hatai caong njauk hu di yaok pluh ribau urang brei nduac patruh dom mbang mesuh di Ethiopia, nduac tapa tapen negar gah Barak Kenya. Jabat Dui ba dom asal kadha ngak pahla Lien Hop Quoc kakei caga dom urang panduan labik daok pataom di jaik tapen negar daok gaok rilo bruk mbuan lahik salamat, dalam tuk bruk pandar saong pabak daong pahla di dom labik jeng daok gaok kan kandah.

Enam urang metai saong 7 urang karei njauk rambuac kayua apui khuah mbang sa baoh sang glong 2 tal di ban New York -  Mỹ di page harei 6/11. Apui khuah mbang sa baoh sang kayau jaik gauk. Labaih 200 urang hu ba mai daong. Jabat chuc nang duah mboh sa pin lithium-ion di labik ini, min oh ka thau njauk pin ini ngak apui khuah ha-oh./.