Rajaei birau ba tabiak Sarak ka jien bilan takik abih ngan haong urang ngak bruk tui sarak pambuak bruk ngak. Tui nan, jien bilan biar abih tagok 7,8%, kuhria meng 1/1/2027. Labik glong abih lac 5,7 trieu dong sa bilan, biar abih lac 4,04 trieu dong sa bilan. Jien bilan kuhria ka urang ngak bruk tui sarak Hukum Lao dong saong pandar urang dalam nan hu doanh nghiep tui Hukum Doanh nghiep; Jabat, kapol nyaom, HTX, baoh sang, urang pah manuac ngak bruk ka drei.  

UBND TP.HCM birau ba tabiak bruk khik iek, ngak tui sarak saong patagok bruk di urang hu angan je dalam bhap bini bangsa takik. Dalam nan hu ban raya brei pambuak pakajap, pabak khaw tin saong ba mbuan lagaih piah bhap bini bangsa takik hu mbaok tame langyah, khik ramik ilimo, rik tame dak padang bruk jum pataom saong khik brei salamat di labik. Dom urang hu angan je ngak mbang naih joi, patagok kinh te-xa hoi, quoc phong - an ninh, khik ramik ilimo saong dak padang jum pataom hu pok meyaom, alin kaya.

So Pato megru TPHCM caong khin dom sang bac saong UBND dom phuong, xa, dac khu ka bruk pakhang pasang iek kaya mbang, jru pakauk dalam raong glang hu dalam kaya mbang huak di anek saih pak sang bac. Dom sang bac iew da-a gah pabak kaya mbang  lisei huak hu ginup harak gal brei thau cambaic laic kaya meng halei; pakauk bruk ba athur atau kaya ngak meng athur oh thau cambaic laic, ngak suan hukum caga ruak atau hu jru pakauk dalam kaya mbang di anek saih; padeih pandar, khik tamo bruk nan saong khan brei gah chuc nang thau.

Dalam oh ka bak 24 mon, di xã Thuận Lợi, TP. Đồng Nai (dahlau diah lac huyen Đồng Phú, tỉnh Bình Phước) hu 2 urang metai kayua ruak pandiak tabiak darah Dengue trak, kuhria meng akaok thun tal ini hu 10 urang ruak. Pasak Pasang iek ruak kik (CDC) TP Đồng Nai, caong khin jak ba hu rilo urang ngak bruk xa hoi, kapol nyaom, urang kumei ngak bruk “ Nao grauk jalan, tame tal baoh sang, iek kaya padang ia”. Gam iew bhap bini oh iek lap, tuk mboh pandiak tagok glong brei ba yame balai y te piah jru ruak.

Ia di kraong Cuu Long daok trun saong patui trun dalam dom bilan akaok bilan pandiak thun ini, mbuan njom ia mbak dreih yau  bilan pandiak thun 2015 -2016. Urak ini, tuh mai Bhum taneran kraong Cuu Long, thun ini hu labaih 290 ti met khoi biar jang dom thun dahau. Pasak Kuhria langik tathik  kakei  dahlau  dom bhum palei padang ngak brei trun pajaih samar di dom labik ia daok trun, plaik njiak  mek ia tuk langik pandiak.  

Thu tuong Campuchia Hun Manet caong khin tal thun 2027, taong abih dom sang bac di karja dalam negar brei ngak tui hukum oh pandar ndien thoai dalam tukbac, langiu tuk bac hu gru brei ba tame piah bac, pasram. Thu tuong Hun Manet mboh lac, yaom lac salih pandar taka so ba mai rilo bruk siam min gam tui rilo kanjak jhak. Campuchia kham merat oh daok tal bac halei di karja  hu pandar ndien thoai tui hatai.

Ribuk Murasu tame bang Andhra Pradesh, bhum Pur Meraong Ấn Độ, hangin tagok khang 120km/h, ngak hajan praong, ngak ia dauk saong khat lahik trak ka jalan mbak sang danaok, bruk ngak mbang pala drak. Ribuk ngak takik abih 2 urang metai saong labaih 12.000 urang brei panduan ba nao labik karei. Kuhria abih tih jien khat lahik labaih 40 trieu USD. Njauk ndem tal, Murasu lac ribuk  ka dua ngak kan kandah tal labik ini dalam adit tapa, ngak kan kandah tal bruk ramik pasiam saong tani tanat raidiuk di bhap bini.

Dalam 2 harei tapa, takik abih 5 mbang ahaok par di chau Au hu panuac  gham taong mbom, yau nan ye dom kapal ahaok brei par gilai saong mblang kapal haok di Ba Lan  brei kareik pabah mbang. Min dom panuac kadha  pagat saong oh hagait trak tal gah kapal ahaok. Bruk rilo kapal ahaok par di chau Au bhian hu pauac gham taong mbom sa tukvak yau gauk oh ka bhian mboh. Bol lin khik iek an ninh di bhum palei daok tui iek dom bruk nan./.