Tui danak dak mbang ka 2, Quoc hoi mbang XVI, page ini, Quoc hoi ginum biai ka Hukum pasiam veik, pabak dom asar kadha di Hukum Khik iek, pandar pahao ndao, siuk patuh saong kaya kan daong, Hukum  pacang khuah, padam khuah saong daong urang gaok bala. Dahlau di nan, dom mbang gunum biai saong gah langiu Quoc hoi, klak hukum pasang iek bruk pacang khuah padam khuah hu rilo urang jakar caik hatai. Dom panuac brei mboh, bruk cakak harak gal brei ngak hu siam mekre, pacang hu bruk kkat lahik saong parabha  bruk ngak piah pacang caga apui khuah.

Di Mbang ginum Rajaei yaok bilan, Thứ trưởng Mentri Jien padai  Nguyễn Đức Chi brei thau, bilan 10 meng blaoh, Mban tacei ba tabiak yaom kaom di Rajaei hu ginum biai, Mentri Jien padai ba tabiak dom jalan ngak ngan 5 nyaom bruk, langyah ka bruk hu makna piah pacang bruk lam phat, tani tanat darak pasar saong  khik tani tanat raidiuk bhap bini. Dom mentri, dom gah, bhum palei brei khik tani tanat yaom dom janih kaya kan yau xăng menyek, kaya mbang, jru tavao saong kaya y te. Kuhria caga ginup ndap nda pablei tuk Tet Nguyen dan.

Kapol Urang kumei tỉnh An Giang peih bruk pasram pato njaom biai “ Peih ngak bruk likei kumei sumu gauk saong langyah  dom bruk ka urang kumei saong uranaih bhum urang bangsa takik saong bhum ceik” di phuong Tinh Bien. Phường Tịnh Biên hu klau nyaom di bhum urang bangsa takik saong nyaom di bhum ceik. Ini lac dom bhum palei  hu bhap bini, bruk ngak mbang kinh te, xa hoi saong bruk daong karei di gauk, khin hu daong, ba tabiak  bruk hu makna dalam tuk peih ngak. Tapa pasram, dak harei dak ngak brei patagok hu lagaih haong bruk di urang kumei saong uaranaih di bhum urang bangsa takik saong bhum ceik.

Yaom pabui diuk, rilo manuk trun lap jaik Tet Pabaiy Jim Luac 2027, dalam tuk jien kaya mbang ka athur raong daok glong, ba tal rilo baoh sang raong glang saong doanh nghiep brei ngak sit veik atau padeih raong. Puac bilan 10 meng blaoh, yaom pabui diuk di dom bhum palei daok 43.000 đồng sa kilo, trun jaik 40.000 đồng sa kilo dut saong akaok thun. Yaom manuk kaok patih di Đông Nam bộ daok 26.000 – 30.000 đồng sa kilo, trun labaih 20% dut haong akaok thun. Di TPHCM saong dom tinh, ban jiak taphia, yaom pablei jiak sumu jien buh tame ngak, ngak ka rilo labik raong oh hu laba atau khat lahik.

Anak bruk pandiak bhang tua riya, kurang ia saong njom ia mbak aval samar dalam bilan pandiak, UBND tinh Vĩnh Long padang ngak jalan pacang caga bruk El Nino saong kuhria buh tame labaih 10.833 ti dong piah buh jien tame ngak danak dak ribaong kraong, binek, pacang caga bala meng langik saong khik brei ginup ia pandar pala drak raong glang, ia pandar. Anak meta, dom bhum palei  brei samar  pasang iek ar pacang, ar binek, balai njuk pruh ia, khik piah ia.

Cảnh sát Philippines daong 159 bhap bini negar langiu  tuk tame sa pasak dunya di Pasay, chap mek 3 urang ba akaok saong chap mek hu rilo  kaya kan, yau khan ao canh sat ja, kong tangin saong balai canh sat piah pagat urang negar langiu. Pasak pachot pagat  ini ngak bruk dalam 3 bilan, mong tame bhap bini meng Indonesia, Malaysia saong Việt Nam. Dom urang ngak nan kaoh tui duis blei manuac saong chap khik manuac suan hukum.

Hadei rilo bilan pacang caga dom mbang apui khuah glai saong apui mbang taneh, dom labik di Indonesia dang anak dom bruk karei: Labik daok tayak tayiac ngak ka bhap bini  gaok kan kandah anak ribuk ia sua bilan hajan jaik mai tal. Jabat Khik iek bala meng langik tathik iew da-a bhap bini brei kuhria caga dahlau ka ribuk ia sua saong glut jaleih taneh, dalam tuk rilo labik di Indonesia tame bilan hajan. Karja pak ini jeng hu kuhria caga manuac urang, ndao nda piah ngak bruk.

Google daok peih ngak dom tanut palih ruah birau ka dom sang bac di Mỹ piah pacang caga bruk anek saih tame  dom cong cu AI. Bruk Google brei ka dom sang bac peih padam Ai tui cang khin di dom amaik ame, sang bac ka bruk pacang tukvak pandar AI dalam sang bac, huac bruk AI ngak kan kadah tal bruk bac da-a./.