Patui veik danak dak Mbang nyaom ka 2, Quoc hoi mbang 16, page ini (6/11) dom lambaok vakil Quoc hoi hu mbaok di danak dak Pahadar 80 thun harei Quoc hoi Viet Nam brei tapa harak Hien phap akaok meti (09/11/1946 - 09/11/2026). Hadei nan, dom lambaok vakil nyaom biai di labik nyaom ka danak dak Hukum pasiam, pabak dom kadha di rilo hukum karei gauk. Pambuak tal Danak dak Hukum Dau thau (pasiam), dom lambaok vakil Quoc hoi brei mboh rilo suhsah duh hatai anak dom bruk oh lagaih dui atah dalam jalan dau thau y te - makna ba tal bruk kurang ia, kaya ndap nda saong ngak tabiak rilo kan kandah tal hukum ka dom labik pasang iek taong ruak.

Di “Nyaom biai nao mai di jakar ban raya haong urang jakar, urang kumei thun 2026” kayua Thành ủy TPHCM di harei 5/11, Urang kumei TPHCM caong khin ban raya dom sarak ngak atah tukvak ka bruk y te, sang danaok, bruk ngak, iek glang anek bik, patagok kinh te. PGS.TS.BS. Hoàng Thị Diễm Tuyết, Yam ndoc Sang iek ruak Hùng Vương likau ban raya pamong tal klau bruk: klauk jru vaccine HPV ka 90% uranaih kumei saong pamong tal uranaih likei; iek ruak caga dahlau ung thu cổ tử cung ka labaih 70% urang kumei; iek ruak dil sumu ka 90% urang mboh ruak cổ tử cung.  

Mentri Ngak nong saong Alam langik bahrau caong khin UB Bhap bini tinh Lam Dong pataom tame taoh talaih kan kandah, tavak tavaiy ka bruk quy hoach, taneh riya saong harak gal buh jien tame saong khik kajap halau pabak pajaih ka gah raong hadang. Thun 2025, dalam negar ngak tabiak labaih 168 ty drei hadang pajaih, anak meta pabak hu hatai caong raong ngak kaya mbang. Dalam nan, labik Meraong Kreh Negar, njauk ndom tal lac Lam Dong saong Khanh Hoa, pabak labaih 40% bruk ngak hu dalam negar. Min, bruk ngak tabiak di dom bhum palei daok gaok rilo kan kandah.

Tỉnh Tây Ninh iek praong bruk patagok, palih ruah saong pato pasram ka anek saiah meng akaok thun bac, dak harei dak paglong bruk pato megru hu kuhria dahlau, piah hu urang naih joi ngak bruk ka tinh. Tui So Pato megru Tây Ninh, paglong bruk pato megru, palih ruah anek saih hu bac naoh joi, pato pasram ilimo glong saong parilo gru pato lac bruk praong. Bruk ini oh lac khik hu dom tanut glong di dom mbang pakacah bo daok ngak brei hu rilo anek saih.  

Tui Pasak Kuhria Alam langik Kraong ribaong Negar, thun ini bruk El Nino mek hu tanut tagok tal 96%. Nhiet ndo kuhria rah tapa bilan 11.2026 di rilo labik hu kuhria glaong jang kuhria rah tapa rilo thun meng 1-2 ndo C. Njauk caik hatai lac, di Bhum taneran kraong Cuu Long, halau ia angaok kraong Cuu Long saong dung tich Biển Hồ hu kuhria di tanut biar abih di puac bilan ia sua. Njom ia mbak mbuan ngak pandiak bhang, kurang ia ka labaih 85.800 hevta padai Dong Xuan, 120.000 hecta taneh pala padai – hadang saong 45.000-50.000 hecta phun mbang baoh di dom bhum tapen taasik Bhum taneran kraong Cuu Long.

Lạm phát di dom taneh ia pandar jien euro tagok tal 4% dalam bilan 10, glong abih dalam 3 thun tapa, kayua jien blei xang menyek tagok glong. Italia jien xang menyek glong abih, dalam tuk nan Malta saong Đức nao cagar veik. Bruk ini mai meng jien nang luong tagok glong, labaih 20,8% dut saong tukvak ini thun dahlau. Langiu di nan, lam phat jitvu, dalam nan hu dom jian pah sang daok, nha hang, yulit saong bao hiem, tagok rik tame ngak ba tal khat ralo jien.

Trung Quốc hu kuhria padang labaih 15 mblang kapal ahaok par dân dụng bahrau dalam 5 thun anak tal yau sa bruk kham merat paglaong co so ha tang gah ahaok par. Jalan ngak ini jeng piah paglaong bruk di Urumqi, Tây An, Côn Minh saong Cáp Nhĩ Tân yau dom pasak ahaok par pakat dunya duh dom labik yau nan, gam haong nan peih praong bruk ngak mbang saong pandar ahaok par pajeng tuai damuai praong kayua dalam negar patagok.

Biar harei 5/11 (tui tukvak Viet Nam), rilo mbang par di chau Au par trun samar atau salih jalan par hadei tuk taduan hu dom mbang lac taong mbom. Bruk nan rah tabiak dalam tuk gah kapal ahaok di chau Au rah tabiak sraw kadau. Dahlau di ini 2 harei jeng hu gham taong mbom yau nan, ba tal takik di nyu 7 mbang par saong sa gilai yulit taduan hu pauac nan, min oh hu  bruk patuh halei rah tabiak./.