Patui danak dak mbang  nyaom ka 2, Quoc hoi mbang 16, page ini dom urang Quoc hoi gunum ka Hukum pasiam, pabak veik dom asar kadha di Hukum BHXH; Hukum pasiam veik, pabak dom asar kadha di Dom hukum Lao dong; Hukum binh dang gioi…saong dom asar kadha hu makna biak karei. Brei panuac ka danak dak Hukum pasiam veik, pabak dom asar kadha di Hukum BHXH, dom urang caong khin brei ngak salah bruk buh jien tame Kadung bao hyiem xa hoi hu salamat, siam lagaih; taong yaom tani tanat bruk pambak tal, ngak brei cambaic laic bruk ngak di urang blei saong dom gah tuk peih pambak praong blei BHXH.

Hu Mbaok di Harei Roya Jum pataom bangsa di palei Têng, xã Biển Hồ, Akok  UBND tỉnh Gia Lai Phạm Anh Tuấn khan lac tinh tuk halei jeng sangka ngak brei patagok abih gah di bhum urang bangsa takik, gam paglong raidiuk bhap bini saong khik ramik ilimo bangsa dom palei. Palei Têng hu 360 baoh sang ngan haong 1.570  urang, ralo lac urang Jarai. Tapa dom bruk pakacah, mikva kham merat ngak brei cakrok patagok kinh te baoh sang. Mbiah tal ini, labaih 95% dom baoh sang hu pandar sang jaman hacih, taong abih uranaih hu nao bac.  Labaih 92% baoh sang mek hu angan Baoh sang ilimo…

Page ini 9/11, TPHCM peih bruk padang ngak tatua akaok meti di danak dak pasiam veik barat  Văn Thánh, phường Thạnh Mỹ Tây.  Danak dak atak 2,24km, ngak kan kandah tal 1.077 baoh sang bhap bini, ngak salah blaoh di thun 2028 piah langyah bruk njom nerak, pacang caga  saong ramik pasiam ndo thi. Danak daak dui atah meng jalan Võ Oanh tal kraong Nhiêu Lộc - Thị Nghè. Danak dak hu kuac rok barat, ngak ar pacang, jalan tathuak ia, jalan mbak nao mai tapen kraong, bein bingu, hijao; padang ngak tatua Phú An saong ngak jalan Ngô Tất Tố. 

Pasak pasang iek ruak kik ( CDC) Cà Mau, dalam bilan 10 thun 20216, dalam tỉnh hu 3 urang njom ruak nao mo cau nhom B. Taong abih dom urang nan hu taom gaok 3 urang ruak angaok nan ye Gah Y te tinh Ca Mau vak angan  saong tui iek prein yawa dalam 10 harei kuhria meng tuk taom gaok njauk tui hukum. Kuhria meng akaok thun 2026 mbiah tal ini, tinh Ca Mau hu 8 urang ruak nao mo cau, dalam nan hu 3 urang metai.

Di tinh Dong Thap, hajan praong gam hangin ba tal melam kabroi 8/11 jaleih, par tabung 93 baoh sang di 5 xã, nan lac: Thanh Bình, Đốc Binh Kiều, Tân Long, Tân Thạnh saong Trường Xuân. Hangin khang ngak jaoh jaleih, 2 got ndien saong rilo phun kayau hijao, ngak gal jalan  mbak. Karaj dom bhum palei jak ba bol lin, kong an saong dom kapol  nyaom  daong urang panduan ramik  drap ar, kaya kan nao labik hu salamat, kuhria bruk khat lahik piah daong jien tui hukum ba tabiak.

Tong thong Mỹ Donald Trump ndem puac veik ka bruk palih ruah kreh nhiem ky, bruk ja yak di đảng Dân chủ ngak ka taneh ia Mỹ kadun lakuh atah, dalam tuk đảng Cộng hòa lahik oh khik iek hu abih bruk di dua vien Quoc hoi. Tổng thống Trump ndem tal bruk jayak  di đảng Dân chủ haong darak pasar chứng khoán Mỹ  lahik labaih 3.000 ti USD yaom phun jien dalam sa mbang meyao meyit, tui nan ndem lac negar Mỹ meda khang kadang jang dalam tukvak anak tal.

Meng akok thun ini, Trung Quoc  hu jaik 4,65 trieu dam dara tut ngan lakhah, trun jiak 10% dut saong tukvak ini thun dahlau. Angka so kuhria hu nan dalam tuk rilo taneh ia daok ngak tui dom jalan pacang caga daong lakhah saong ndih tapui anek. Dom bhum palei di Trung Quoc brei ngak tui jalan daong jien, alin jien tal brei ba-ar blei kaya ka diuk pasang birau lakhah saong baoh sang birau ndih tapui anek.

Uber lac kong ty kong nghe pabak nen tang pambuak tuai damuai saong urang peih radaih tapa ung dung dien thoai birau njauk toa an di Australia kuhria veik jien je labaih 81 trieu AUD ngan haong jien bilan bo kong ty ini bayar ka tuai. Lien doan lao dong Australia daok brei mboh, bruk kaoh tui hukum di Toa lac kakei dahlau ka dom kong ty kong nghe daok duah plaik kak jien je./.