Muk Truong Thi Mai hu panuac ndom pak di danak dak 

Melam 15/12, di Hà Nội, Kapul dam dara pakat negar peih ngak danak  “Caong khin buh prein – Jalan diukrai di dam dara”- peih mbaok mbang sinh hoạt chính trị praong dalam urang đoàn, dam dara Việt Nam, peih ngak panuac tamat 21 Nyaom biai T.Ư 4, mbang XIII di Đảng (ieu katut lac Kết luận 21). Brei panuac di tuk peih bruk, UV Bộ Chính trị, Bí thư TW Đảng, Akaok mBan Tổ chức Trung ương Trương Thị Mai pok meyaom hatai sahneng peih ngak danak dak “Caong khin buh prein – Jalan diukrai di dam dara” lac bruk ngak njauk tukvak, siam lagaih di kapul dam dara CS Hồ Chí Minh piah peih ngak Kết luận 21. Danak dak brei mboh hatai hadah, jangaih, khang kadang di rai ranaih, khang hatai mesruh pacang bruk tok sahneng ka rup drei, trun jalan sahneng gah chính trị, đạo đức, jalan diukrai siam mekre. Danak dak hu pok meyaom jalan diukrai siam mekre saong ngak brei medeih tagok hatai caong khin rik prein ka palei negar di yaok urang đoàn, dam dara.

Gah y tế dom tỉnh ĐBSCL brei thau, bruk praong dalam pacang caga jit Covid-19 urak ini lac kham marat dui trun bruk mbuan ba tal metai, nan ye njauk jhul khang bruk klauk vaccine caga Covid-19. Urak ini dom tinh, bal daok patagok bruk pathau khan, jak ba bhap bini nao klauk vaccine, brei bruk ka dom phường, xã… nao tal yaok baoh sang piah pasang iek dom urang ka oh klauk. Urang ka oh klauk njauk hu hu makna meng brei tapa. Hadei di 31-12-2021 dom urang ka oh klauk vaccine caga Covid-19 meda njauk cakak dom quyền lợi di drei…

Dalam dom harei jaik ini, kuhria rah tapa, yaok harei tỉnh An Giang hu 20 urang metai kayua Covid-19, jaik di abih lac 28 urang metai sa harei. Kuhria meng akaok mbang jit ka 4 tal ini, tỉnh An Giang hu 647 urang metai kayua Covid-19, tui nan, dom urang metai dalam dom menuac ruak  lac 2,33%. Tapa duah thau mboh lac, labaih 70% lac oh ka klauk vaccine pacang Covid-19, 30% lac urang umo labaih 50 thun saong hu ruak dahlau dalam rup. Kuhria tal harei ini, tỉnh An Giang hu klauk vaccine pacang Covid-19 mbang klauk 1 hu 98%, mbang klauk 2 jaik 92% ka urang umo meng 18 thun tagok, urak ini daok patagok bruk klauk ka anek saih umo meng 12- 17 thun.

Ilamo tamia xòe Thái hu UNESCO pok brei angan lac inem krung ilamo oh mboh di meta di menuac sia dunya. Bruk ini hu Kapul pato magru, Khoa học saong ilamu Liên hợp quốc ba tabiak dalam mbang ginum biai mbang ka 16 di Paris, France harei kabroi 15/12. Tui UNESCO, harak likau pok angan pabak hu ginum 5 asal kadha piah pok manyaom, lac: xòe Thái nao gam haong ragu ragam di dom alat ragam bangsa; bruk pok angan piah paglaong hatai saneng ka yaom glaong saong makna praong di dom ragu tamia meng kan; dom bruk ngak piah khik caga xòe di rahra bangsa Thái; harak likau pok angan hu brei mboh bruk hu mbaok di rilo rahra, kapul urang pambuak tal, dom kapul karei di gauk di inum krung ilamo xòe hu ba tame angan yaok pataom di taneh ia.

Harei 15/12, Kapul Kinh tế - Quốc phòng 778 (Quân khu 7) haong karja huyện Bù Gia Mập, tỉnh Bình Phước hu peih bruk brei sang “Tình nghĩa quân - dân” di danak danak labik daok tani tanat ka bhap bini bangsa takik di dom xã Bù Gia Mập, Đắk Ơ, Phú Văn haong Phú Nghĩa. Lingiu di bruk hu taduan baoh sang praong 53 m2, yaok sang daok hu urang ngak pahla daong brei pandap pandar yaok harei yau ye: kadik, gaok lisei điện…; gah mặt trận alin brei menuk pajaih haong phun mbang baoh. 

Harei 15/12 (tui maong New York) Hội đồng Bảo an Liên Hợp Quốc hu ginum biai ka bruk Nam Xu-đăng saong bruk ngak di Phái bộ khik ramik saron mbon di Liên Hợp Quốc di taneh ia ini (UNMISS).  Dom urang pathau khan brei mboh bruk Nam Xu-đăng dalam thun ini hu dom siam mekre, dalam nan bruk sanya padieh cuh suai lavik daok hu ngak tui saong Nghị viện patui viek meda pasang iek brei tapa Hukum negar bahrau piah padang jalan adat hukum ka bruk piluh ruah tui kuhria hu peih tabiak di thun 2023. Min, dom urang pathau khan brei thau lac bruk peih ngak sanya saron mbon di Nam Xu-đăng ka taong abih gah jeng daok rahtabiak suai damuai, gam tui di nan jeng brei mboh hatai huac kanda ka bruk kan kandah di kinh tế, pahla, hajan ia sua saong patagok bruk taong paoh gauk di dom rahra di rilo labik. Tapa nan, dom taneh ia taong yaom glaong saong thau dhar phol Việt Nam ka dom rik daong hu makna praong tuk daok ngak akaok Ủy ban 2006- lac Ủy ban trực thuộc di HĐBA LHQ pambuak tal Nam Sudan  dalam 2 thun tapa.

Harei kabroi,negar Anh hu dom menuac njaom virus SARS-CoV-2 yaok harei glaong abih kuhria meng tuk tamuh tabiak jit praong COVID-19 di taneh ini ini. Anak bruk njaom mbak samar drah di biến thể Ô-mi-crôn, rajaei Anh bahrau brei tagok tanut cảnh báo COVID-19 meng  3 tagok 4 dalam abih tih 5 tanut, hadei di tuk hu urang camereip di dunya metai kayua Ô-mi-crôn hu mboh di taneh ia ini.

Tui kuhria, Mintri Y tế, lao động saong phúc lợi Nhật Bản meda pasang iek brei adat vắc-xin Moderna piah klauk ka dom mbang klauk kakei viek aval di abih di harei ini (16/12).Tui nan,mbang ka 3 di gah Mô-đơ-na meda hu pabak oh mek jien ka dom urang umo meng 18 thun tagok.Harak nan hu ba tabiak tuk dom ngak iek di gah negar langiu brei mboh,dom kháng thể trung hòa, pacang caga bruk njom mbak virus hadei di mbang klauk ka 3 tagok 1,7 mbang dut saong mbang klauk ka dua./.

Urang lang: Thu Thảo - Mousaphuong -16/12