Dom labik dhaong, bier di Ninh Thuận njauk ia dauk

Meng harei 2 tal harei 4/12/2020, di Hà Nội, nyaom roya pakat negar dom bangsa takik Việt Nam mbang ka 2 thun 2020 peih tabiak ngan haong kadha “ala hala dok hadah hadai di Đảng, dom bangsa samu gauk, jumpataom, iek praong, daong gauk, patagok dom kein lagaih gam cak rok patagok haong taneh ia”. Hu peih tabiak 10 thun sa mbang, nyaom roya dom bangsa takik Việt Nam mbang ka 2 thun 2020 lac sa harei roya praong di dom bangsa Việt Nam, lac tuk piah maong iek viek jalan patagok, dom jak jeng dalam bruk ngak bangsa, sarak bangsa, dom kham marat yam tagok kan kandah di abih gah kinh tế - xã hội bhum mikva bangsa takik saong bhum ceik, abih di nyu nan lac dalam tukvak 2010 - 2020.

Urang dương tính Covid-19 bahrau hu khan brei thau di beir harei kabroi (lac urang ruak 1.347) hu pagam tapak tal urang ruak 1.342 (urang likei ngak tiếp viên hàng không, lac urang ruak hu khan di beir harei 29/11). Tui pasang iek dịch tễ camereip di urang ruak 1.347, hu taom gaok jiak (F1) lac 38 urang; bruk taom gaok song urang taom gaok jiak (F2) lac 154 (dalam nan hu 62 urang di quận Tân Bình song 92 urang di quận 10). Urak ni gah y tế dok samar pasang iek, brei dok karei song mek drah dut iek dom urang pagam tal dom uraang ruak. Jang yau khan chip ka bhap bini hu nao tal dom labik bo urang ruak hu mbaok (yau labik pato bac, quán cafe, quán karaoke) pambuak pagam chip song jabat y tế jiak di abih; peih bruk pacang caga dom labik nan song pruh jru pametai anek ruak.

Hadei di tuk mboh hu urang njom ruak meng urang daok karei (urang ruak Covid-19 ka 1.347) di ban raya HCM, mBan pato tacei pakat negar pacang caga jit ruak Covid-19 hu payua harak ieu kakei dom Mintri: Quốc phòng, Công an, jalan mbak, Ngoại giao saong Ủy ban bhap bini dom tỉnh, ban paglaong bruk pasang iek saong khik ramik urang tame negar. Gam tui di nan jeng pasang iek catang saong yaok harei pasang iek bruk peih ngak dom adat pacang caga jit di dom labik brei daok karei pataom rilo manuac, daok karei di sang, labik daok; oh caik ka dom urang oh ngak tui adat tame labik brei daok karei saong ieu kakei manuac daok karei ngak tui njauk adat piah plaih njom pambak.

Danak dak pacang ia sua hu tong abih tih phun jien jiak 10.000 tỷ đồng mbuan si padeih kayua oh ka mbaoh tangin tame phụ lục hợp đồng dui atah tuk vak ngak salah bloh (abih harei pandar meng bilan 6/2020). Công ty TNHH Trung Nam BT 1547, po padang ngak danak dak brei thau: hợp đồng camereip tal bilan 6/2019 abih tuk vak, hadei di nan danak dak hu dui atah tal bilan 6/2020, urak ni abih tuk vak kayua dahlau di nan brei padeih ngak labaih meteh thun. Meyah danak dak njauk padeih, khin padang ngak gilac veik abih labaih 5 bilan kayua peih ngak rilo harak gar.

Meng harei 28 tal 30/11, di Ninh Thuận hu hajan khang. Dom labik dhaong, bier njauk ia dauk, ngak kan kandah tal raidiuk di bhap bini saong bruk pala drak. Tỉnh daok pataom prein piah pacang caga haong hajan ia sua, trun takik abih dom khat lahik ka anek manuac saong drap ar. Di huyện Ninh Phước, taong abih mblang hamu ngak padai, 300 ha phun nho, 700 ha phun medar gam saong 1.200 ha phun njam patam njauk ia dauk, ngak kan kandah tal năng suất saong bruk praong tagok di phun pala. Di huyện Thuận Nam, hu 270 baoh sang njauk ia nduac tame, njauk panduan ba tabiak langiu 178 sang saong 709 urang nao daok di dom baoh sang khang kadang. UBND tỉnh Ninh Thuận brei thau, urak ni ia duk hu di dom bilai thủy văn trun daok ala saong jaik tanut báo động 1, min, hajan jeng daok khang nan je kan si thau hu dom bruk kan kandah karei.

Gah Y tế dunya ndom lac, dunya mbuan si hu dom jit ruak prong dalam harei anak tal meyah oh duah thau bruk srau kadau Covid-19 mbang ni. Brei panuac di mbang họp báo harei kabroi, ong Mike Ryan, Akaok Điều hành danak dak y tế samar drah di Gah Y tế dunya hu panuac ieu dom negar pasang iek biak cambaih laih jalan ngak halei ka bilan trượt tuyết jiak si tal piah meda klah nyaih njom mbak jit Covid-19 tuk hu rilo urang pataom di sa labik. Dalam tuk nan Tổng giám đốc kapul Y tế dunya Tedros Adhanom Ghebreyesus hu panuac ieu dom negar jhuil chính trị hóa bruk duah thau asar di janih virus SARS CoV-2, mong lac bruk nan ngak jeng paga pacang dalam duah thau bruk biak di nyu.

Nga daok brei ngak iek vắc- xin ka dua pacang Covid-19 hu angan lac “EpiVacCorona” kayua pasak pasang iek roh duah pakat kanja ka Vi-rút học saong Công nghệ Sinh học "Vector" di jabat pasang iek saong khik caga urang pandar Nga patagok. Vắc- xin ni hu taong yaom lac salamat abih ka urang taha saong dom urang njom ruak dahlau dalam rup. 3.000 urang halain hatain di Nga meda hu mbaok tame bruk ngak iek hadei di tuk tut angan tame di janih vắc -xin ni. Dahlau di nan vắc-xin hu tut angan camriep di Nga lac Sputnik-V, hadei di tuk ngak iek hu praong, mek hu siam lagaih tal 95%. Yaom di Sputnik-V lap jang jaik 2 mbang dom janih yau nan.

Ả-rập Xê-út brei adat ka dom hãng kapan haoh di I-xra-en par tapa negar di drei tuk angaok jalan nao tal Dom Tiểu vương quốc Ả-rập Thống nhất. Bruk nan hu mbaoh tangin tame dm mong dahlau di tuk mbang par pajeng tuai camereip di I-xra-en tal Các Tiểu vương quốc Ả-rập Thống nhất hu ba tabiak di mesup ni. Mbang par mbuan si klaak meyah oh hu thỏa thuận ni. Dom mbang par tapak lac sa binah di dom bruk sanya pasiam talei talei rohim bo I-xra-en mek hu dalam thun ni song Dom Tiểu vương quốc Ả-rập Thống nhất, Ba-ranh song Xu-đăng./.

Urang lang: Thu Thảo – Hani Pha – 01/12 10:37:08