Mentri Chinh tri bahrau ba tabiak Sarak ka bruk patagok bruk pacang khik, sangka saong paglaong prein yava ka rahra. Tui nan, meng thun 2026, urang hu pasang iek prein yava tui tukvak caga atau pasang iek ruak piah pilih halang oh mek jien takik abih yaok thun 1 mbang. Tal thun 2030, rahra hu iek ruak saong taong ruak oh mek jien di takik abih dalam kein lagaih bao hiem y te tui luac jalan. Sarak ba tabiak jalan ngak hu makna: tal thun 2026, bruk urang blei BHYT hu labaih 95% rahra; tal thun 2030, pamaong tal bruk taong abih rahra blei BHYT, dalam nan rahra hu brei pasang iek saong taong ruak oh mek jien di takik abih dalam kein lagaih BHYT tui luac jalan.

Harei roya Ilamo bangsa Cam mbang VI hu Mentri Ilamo, The thao saong Yulit peih ngak di bilan 10 anak tal di tinh Khanh Hoa. Harei ilamo hu mbaok di 6 tinh, ban hu rilo urang bangsa Cam nan lac: Khánh Hòa, Gia Lai, Đắk Lắk, Lâm Đồng, An Giangsaong Ban raya HCM. Harei roya pok meyaom paglong bruk ngak po di ilamo, patagok ilmao meng kan pambuak pagam haong bruk cakrok patagok di samar ini. Tui nan hu makna biak lagaih dalam bruk pato padar khik ramik ilamo bangsa Cam pambuak haong bruk cak rok patagok gah yulit, meng nan paglong raidiuk bhap bini saong jalan sahaneng di bhap bini urang Cam harei ini.

Pambuak tal mbang pasang iek mbang ka 5 di Uy mban Chau Au (EC) ngan haong ikan hadang Viet Nam dalam puac thun ini, Mentri Ngak nong saong Alam langik hu pandar dom bhum palei payua pathau khan bruk ngak hu mrng bruk pacang cakak taong mek ikan hadang chung hukum, oh pathau khan saong oh ngak tui adat IUU. Tal ini, Viet Nam hu rah tapa 4 mbang pasang iek di EC, taphia dom bruk ngak hu siam lagaih, jeng daok rah tabiak bruk dom gilai taong ikan pambuak bruk pasang iek jalan, tame bhum tasik negar langiu. Ini lac bruk ngak ka EC oh ka taoh kat kanyik ngan haong iakan hadang Viet Nam.

Kong an TPHCM kakei dahlau ka bruk bhap bini suan hukum tame tabiak negar Campuchia sraw kadau. Tui nan dom urang nan bhian palua jua urang ngak meng panuac yamen bingi pagat ngak bruk hanyol jien bilan glong, oh cang bac da-a, tame biak negar samar. Yau nan min, tuk tame negar suan hukum, urang njauk chap mek abih harak gar di drei, kateik ngak dom bruk ma-in  mbia saong pagat tapa internet. Rilo urang daok taong paoh, ndok jien pabuh piah hu nao sang.

UB Bhap bini tinh Ca Mau hu pandar dom labik, bhum palei patagok bruk pasang iek bruk pacang cakak pablei dauk, bleik saleih dalam pablei salih saong ndap nda ja lau, suan adat hukum. Gam haong nan patagok bruk pasang iek dom labik rah tabiak rilo bruk pablei dauk, bleik saleih dalam pablei salih; peih praong pasnag iek di gilang, mblang, darak pasar, labik pablei salih online; caik dahlau bruk pasang iek dom ndap nda mbuan pablei dauk: jru, ndap nda ngak gheih, ndap nda, kaya chuc nang, khak drak, kaya ndien tu. Dalam 1 bilan tapa, tinh Ca Mau langyah 29 bruk ngan haong 29 urang ngak chung hukum gah kinh te, pataom khik labaih 213 tan ndap nda oh thau meng halei mai.

Harei ini Qatar meda peih sa nyaom biai pakat glong samar chip ka dom taneh ia Ả Rập saong Hoi giao Islam mai ginum biai ka bruk mesriuh gauk jaik ini di Israel tame ban ine Doha di Qatar. Tal tukvak ini, dom  bruk ramik caga ka nyaom biai pakat glong hu caga blaoh blai. Adit dahlau, Israel patuh phao praong oh ka bhian mboh meng lavik mai tame ban ine Doha di Qatar, labik sang ngak bruk di dom urang jakar Hamas daok nyaom gauk biai piah ba tabiak jalan padeih mesruh metak birau abih kayua My ba tabiak.

Mentri Y te dalam Rahra di Thai Lan hu pathau khan samar chip ka bruk tamuh praong virus hop bao thuak yava (RSV) di uranaih umo ala 5 thun saong urang praong thun umo. Meng akaok thun tal ini hu jaik 8.500 urang njauk ruak, 1 urang metai saong kuhria hu daok tagok veik tuk bilan hajan patui veik dui atah. Tui Cuc Pasang iek Jit ruak, RSV lac makna akaok meti ngak barah pandik phoi trak di uranaih saong urang taha. Virus ini bhian pambak praong dalam bruk tathah di bilan hajan saong bilan li-an, gam haong ruak kum bilan,  COVID-19 saong barah pandik phoi.

Takik abih di nyu 193 urang metai gam yaok rituh urang lahik dalam 2 mbang bala rah tabiak tableik gilai tui gauk di Cộng hòa Dân chủ Congo. Tui bruk pathau khan di dunya, bruk bala angaok ia rah tabiak dak harei dak rilo di Congo, dalam tuk bhap bini taneh ia ini salih bruk nao mai meng gilai kayau ralo kayua abih takik jien, lap. Yau nan min, dom gilai kapal  pajeng urang angaok kraong bhian rilo tapa prein, kurang pandap khik caga rup eng.