Harei kabroi, di tinh Gia Lai, Mentri Kong an peih bruk kuhria iek veik Danak dak “ Abih baoh sang oh daok taik tahak” di dom tinh Tay Nguyen. Meng akaok thun 2025 , mbiah tal ini, gah Kong an hu padang ngak sang birau, ramik pasiam veik 6.370 baoh sang alin ka urang kathaot, jaik kathaot di dom tinh Gia Lai, Lâm Đồng saong Quảng Ngãi. Kuhria abih tih jien daong tagok tal labaih 355 ti dong, danak dak hu ba mai ka yaok ribau  baoh sang tani tanat raidiuk, rik tame bruk praong ngak brei karo kajap saong cakrok patagok kinh te – xa hoi di  bhum Tay Nguyen.

HĐND tinh Dong Thap birau brei tapa Sarak daong ka urang jakar, kong chuc,  vien chuc, urang ngak hadei ramik pagam don vi hanh chinh di tinh. Tui nan, tỉnh Dong Thap hu daong 5,1 trieu dong sa urang sa bilan ngan haong urang jakar kong chuc, vien chuc meng tinh Dong Thap (klak) tapa tinh Dong Thap (birau), tukvak daong lac 24 bilan. Tui kuhria mboh dahlau, hu 913 urang njauk daong, oh kuhria urang ngak praong di Kapol sang urang ngak bruk mbang tui sarak karja hu brei tham quyen  di dom kapol nyaom kayua Dang, Karja jao bruk. Jien buh tame ngak jiak 56 ti dong sa thun.

Tinh Ca Mau hadei pagam tame, kham hu jeng pasak raong hadang siam lagaih, khang kajap dang akaok bhum urang bangsa takik saong dalam negar. Kham merat kuhria abih hadang raong hu 587.000 tấn saong jien mek tame meng bruk pablei kaya dalam ia hu 2 ti 500 trieu USD dalam thun ini. UBND tinh Ca Mau caong khin urang ngak praong pakat uy, karja pakat xã kuhria mboh bruk peih ngak brei patagok gah raong hadang lac bruk hu makna praong. Hadei pagam tinh Bac Lieu (klak), Ca Mau urak ini hu taneh praong pala raong kaya dalam ia hu labaih 450.000 ha, dalam nan hu labaih 90% raong hadang, dang akaok dalam negar.

Dalam raidiuk ilamo saong adat cambat yang mebang di bhap bini urang Cam Hroi di xa Vân Canh, tỉnh Gia Lai pambuak haong dom riya roya meng kan hu peih ngak luac thun yau: Rija likau hajan, Yang ia harei - ia bulan, Yang taco akaok…Yaok rija roya  hu ilamo karei di gauk, min siam abih lac Rija Po yang palei. Ini lac bruk ngak ilamo meng kan di mukkei biak gheih oh meluh di labik halei. Piah khik ramik saong patagok dom ilamo siam gheih  di bol bhap rahra bangsa takik, pambuak haong bruk cakrok gah dulich, So Ilamo, The thao saong Dulich tinh Gia Lai peih ngak veik Rija Po yang palei di urang Cam Hroi.

100 anek saih hu raidiuk kan kandah di dom tinh: Đồng Tháp, An Giang, Vĩnh Long saong TP.HCM daok hu da-a tame Trại hè Đại sứ Kaya Viet sit sot haong kadha “ Pambak praong hatai anit ranam, pasang hadah hatai caong khin”, peih ngak di TPHCM. Dalam 4 harei peih ngak trai he, dom adei hu mbaok tame rivang ma-in, bac megru saong langyah di dom labik sirah ilamo - sajarah- pato megru; hu tacei pato  hadah krah saong pasram jalan diuk rai; taom gaok dom nghe si, doanh nhan…Dom kapol saong urang ngak bruk, njauk hatai rik daong bruk trai he kuhria tui jien daong labaih 700 trieu dong dalam hatai klak rabha, anit ranam.

Kaoh pulao Kamchatka, Lien bang Nga harei kabroi rah tabiak bruk tayun megei baoh taneh khang tagok tal 8,8 do richter, ngak megei tayun ralo labik saong kakei dahlau ka riyak song than, min oh ka thau bruk jhak tal manuac sia. Dalam labaih 10 minit, kaoh pulao Kamchatka hu 5 mbang megei baoh taneh saong labaih 30 mbang megei dalam sa harei. Riyak glong labaih 4m hu mboh di labik tapen tasik, di jabat chuc nang  brei panuac kakei ka royak saong than saong kakei bhap bini rahra plaik atah tapen tasik.

Thu tuong Australia Anthony Albanese birau khan lac taneh ia brei ba YouTube tame angan dom mang brei pakauk uranaih umo 16 thun. Thu tuong Albanese khan lac, bruk pakauk uranaih umo 16 thun iek mang xa hoi meda hu khik brei siam ka dom adei  dalam tuk umo daok praong tagok. Daong dom adei hu 3 thun piah pambuak dom bruk gah langiu jaik taphia drei saong pasiam veik bruk pambuak internet. Dom mang internet xa hoi meda taong phat tal jaik 50 trieu AUD meyah ngak suan ka umo. 

Jabat kapal ahaok vu tru Mỹ ( NASA) kuhria cakak trun 3.780 urang sumu 21% bol lin ngak bruk urak ini. Dahlau di nan, karja  Tong thong My Donald Trump jhul pakhang bruk ramik veik urang jakar ngak bruk di rilo jabat lien bang. Mentri Ngoai giao saong Mentri Pato megru Mỹ jeng daok tame ngak bruk dak ramik, brei ngak dahlau sarak “ Taneh ia Mỹ lac dahlau abih” di Tong thong Donald Trump.