Salam uan Nyaom roya lambaok vakil dalam negar mbang ka XIV di Ndang, biar harei kabroi (15/1), Quan khu 5 peih bruk Padang Sang taom gauk bhap bini di Buôn Kđoh, xa labik Katmang Cư Pơng, tinh Dak Lak. Ini lac danak dak hu makna chinh tri - xa hoi praong dalam, brei mboh bruk ngak, hatai anit ranam di Bol lin saong mikva dom bangsa Tay Nguyen. Sang taom gauk bhap bini Buôn Kđoh hu caga padang tui jalan sang atah bhap bini di bangsa Randaiy, padang praong 150m². Danak dak hu taong abih tanut buh jien tame 2,5 ty dong meng jien di Mentri Quoc phong daong, kuhria salah blaoh di Quy III thun ini.

Tinh Dong Nai padang ngak dua danak dak tatua Cát Lái saong tatua Long Hưng tui jalan urang saong karja (PPP) harei broi. Kuhria phun jien buh tame ngak jaik 30.000 ti dong, dua danak dak caong khin abih bruk cuang kandah tavak kraong ia pacang, pabak prein khang birau di bhum Dong Nam bo. Brei panuac tacei pato, Phó Thủ tướng Mai Văn Chính brei panuac lac bhum kinh te Dong Nam Bo. Yau nan min, ong khan cambaic laic “labik gal tavak” ralo abih di urak ini lac jalan mbak nao  mai, njauk ndem tal 40 km jalan kraong ia meng tatua Dong Nai tal tatua  Phước Khánh daok pacang TPHCM saong Dong Nai.

Di xa Phước Dinh, UB Bhap bini tinh Khanh Hoa harei kabroi peih bruk di Danak dak panduan rahra, brei labik daok bahrau, peih paha mbaok taneh Sang mac Ndien hat nhan Ninh Thuan 1. Danak dak hu taong abih taneh hu njauk peih paha labaih 485 ha, ngak pambuak tal labaih 477 baoh sang rahra, hu labaih 2.000 urang di xa Phuoc Dinh. Jalan ngak di Danak dak lac khik kajap rahra hu labik daok bahrau hu kein lagaih ka bruk diukrai samu atau siam jang labik daok klak, dak harei dak tani tanat bruk daok dang mbang ngui suai atah. Taong abih tanut buh jien tame danak dak labaih 3.200 ty dong.

Urang ngak nong pala tamekai pablei Tet thun birau nethak Athaik Binh Ngọ di xã Phước Long, tinh Ca Mau daok pataom tame iek glang 60 ha pala tamekai pablei darak Tet. Urak ini, dom mblang hamu pala tamekai tamuh siam, mikva caong khin bilan paik tamekai mek jien tame ralo. Phước Long lac xã pala tamekai pablei Tet hu meng lavik  mai. Tamekai  di labik ini  danei angan meng lavik brei rilo baoh, baoh praong, yamen kayua lagaih haong taneh riya. Dom pajaih tamekai urang pala pak ini lac: An Tiêm, Thành Long, Mặt Trời Đỏ; tamekai kanduh kanyik katam hatai meriak bhong. 

Dalam tukvak tabung glaong Tet Nguyen dan 2026, Vietnam Airlines pachreih kakei rahra tagok tukvak di drei, kakei caik labik saong blei harak ve aval tapa website, pandar di dong Vietnam Airlines atau majam bilik harak ve, tadai pablei harak ve di Hãng. Tuai damuai jeng hu pachreih ngak harak gar online dalam 24 tuk dahlau tuk peih par ahaok tapa website, pandar di dong, VNeID, tong dai atau di dom tadai ta-eng ngak harak gar di mblang kapal ahaok par.

Harak ho chieu Singapore, bhap bini taneh ia kaoh pulao ini brei adat oh cang thi thuc tuk tame 192 negar dalam taong abih 227 taneh ia di dunya. Tui kuhria ho chieu Henley birau ini hu khan, Singapore sa mbang tra khik hu kajap angan taneh ia hu ho chieu khang kajap di dunya. Ini lac mbang ka 3 jaik gauk Singapore khik hu labik ba kaok. Dang dhi 2 dalam sarak angan dom taneh ia lac Nhật Bản saong Hàn Quốc hu 188 labik rivang ma-in oh cang thị thực. Dalam bhum Dong Nam A, Malaysia dang dhi  9 hu 180 labik rivang ma-in oh cang hu visa.

Dom urang tui agama Chinh thong giao di Serbia bahrau raok thun bahrau ngan haong mbang cuh phao bangu saong parang iek bruk truac tanrak hadah di angaok langik Belgrade. Malam raok thun bahrau di Belgrade kareik  gilac meng mbang parang iek cuh phao bangu saong peih par ahaok oh hu urang peih pandar di angak kraong Sava di pasak ban medin. Dom urang tui agama Chinh thong giao raok thun bahrau di harei 13 bilan 1, kayua ngak tui saka Julian klak, suai jang saka Kong giao 13 harei. Saka Julian hu pandar praong rilo di chau Au dahlau tuk saka Kong giao tabiak rai.

Yam ndoc dieu hanh di Kong ty Tesla ong Elon Musk birau khan brei thau, phan mem peih radaih ta-eng di urang ngak radaih dien ini brei tut angan tui yaok bilan hadei harei 14/2 anak tal. Padeih brei blei radaih bayar  jien sa mbang. Urak ini, Tesla brei adat ka po radaih dien di drei blei phan mem peih ta-eng ( hu tui iek) bayar abih sambang 8.000 dola atau tut angan 99 dola yaok bilan di Mỹ.