Vaccine Covid-19 di AstraZeneca hu ba mai mblang kapal haok Tân Sơn Nhất, TP.HCM

Mbiah tal ini, taong abih 63 tỉnh, ban hu pathau khan bruk pasang iek, mbaoh tangin brei tapa dom angan hu daong jien lisei ka 65.300 urang, dalam nan menuac F0 lac 24.500 urang saong F1 lac 40.800 urang; lingiu di nan daok hu daong ka labaihn 2.600 uranaih; hu bayar abih tih jien lisei daong brei lac labaih 12 tỷ đồng. Di rilo tỉnh yau: Bắc Giang, Bắc Ninh, ban raya Hồ Chí Minh, Bình Dương, Đồng Nai, Đà Nẵng, karja hu pandar kadung jien karja tỉnh haong jien jak ba karei karei piah daong jien mbang huak ka rahra daok dalam dom labik taong ruak, labik daok karei.

Mesup harei 6/8, jaik 600 mbang vaccine Covid-19 di AstraZeneca hu ba mai mblang kapal haok Tân Sơn Nhất, TP.HCM. Ini lac mbang jao vaccine ka 7 tui harak pambuak bruk blei dahlau di Cty cổ phần Vaccine Việt Nam (VNVC) haong AstraZeneca, hu bruk daong di Mintri Y tế. Yau nan, dalam 5 adit tapa, hu jaik 4 triệu mbang vaccine AstraZeneca tui harak pambuak bruk kakei blei 30 triệu mbang di VNVC hu mai tal Việt Nam, tui nan, tal urak ini, abih tih vaccine hu taduan mek tui harak pambuak bruk kakei blei ini, lac jaik 4 triệu 400 rabau mbang.
Urak ini, dom doanh nghiệp di Đồng Nai hu panuac likau padeih ngak tui jalan “3 di labik” saong “1 jalan nao, 2 labik tal”. Hu menuac ngak di doanh nghiệp hu panuac ieu padeih bruk mbang huak, ndih daok veik dalam doanh nghiệp piah mai sang, mai labik daok di drei. UBND tỉnh Đồng Nai bahrau hu harak samar drah pambuak tal bruk ini. Tui nan, UBND tỉnh Đồng Nai ieu dom doanh nghiệp pathau khan haong Sở LĐTB saong XH, mBan Khik iek dom labik ngak kong tỉnh Đồng Nai haong urang dang akaok dom labik hu doanh nghiệp ngak bruk. Meyah hu brei adat, doanh nghiệp brei dut iek Covid-19 ka taong abih menuac ngak. Tuk halei hu UBND pakat njauk hatai taduan mek saong mboh lac âm tính, menuac ngak meng hu tabiak truh doanh nghiệp.

Mesup ini, tỉnh Lâm Đồng hu 6 urang dương tính haong SARS-CoV-2, bruk njauk biai nan lac mbang camereip abih di ban Đà Lạt hu tal 4 urang ruak dalam tukvak haong gauk. Dom urang ruak lac kumei, daok ngak di Cty jhik DWS - Cty Trách nhiệm hữu hạn Sợi Đà Lạt. Pasak pasang iek ruak kik (Sở Y tế tỉnh Lâm Đồng) daok mek mẫu di 105 menuac ngak dalam Cty saong hu panuac khan brei menuac urang halei di ban Đà Lạt hu nao tal dom labik hu menuac F0 bhian nao tal, brei hu mbaok samar drah di labik y tế piah mek mẫu dut iek.

Page 6/8, Jabat Tỉnh ủy Bình Thuận payua harak pathau khan brei thau panuac tamat di Thường trực Tỉnh ủy tal Ủy ban bhap bini tỉnh, Sở LĐ,TB saong XH gam dom huyen, ban sit dalam tỉnh ka bruk daong urang gaok kan kandah kayua jit Covid-19. Tui nan, Thường trực Tỉnh ủy njauk hatai bruk ba tabiak piah UBMT negar Việt Nam tỉnh buh jien tabiak daong baoh sang kan kathaot dalam tỉnh saong urang taha umo kathaot daok sa drei eng, kayua Sở LĐ, TB saong XH khik iek meng kadung jien Pacang caga jit COVID-19 kayua UBMT negar Viet Nam tỉnh khik ramik. Tui nan, tỉnh brei daong 1 triệu đồng ka sa baoh sang kathaot saong 1 trieu đồng  ka sa urang umo taha daok sa drei; samar ngak brei salah bruk daong ka dom urang angaok nan dahlau harei 16/8/2021.

Jaik 1 triệu 400 rabau dam dara umo meng 16-17 thun dalam negar Anh meda hu klauk vaccine caga COVID-19 hadei di tuk rajaei taduan hu panuac ieu meng dom urang ilamu. Dalam rilo bilan ini mai, rajaei Anh daok pandik akaok haong bruk lac njauk pachreih klauk vaccine ka uranaih halei oh, saong oh ka peih bruk klauk ka uraniah, piah cang duah thau ka nyu ginup jang meng gah y tế. Dalam tuk nan, Mỹ haong dom taneh ia châu Âu daok klauk vaccine ka rilo menuac umo ala 18 thun, saong daok kuhria peih bruk klauk vaccine ka uraniah umo ala 12 thun piah ngak jeng bruk oh njaom mbak ruak dalam bol bhap rahra.

Dom urang njom Covid-19 yaok harei di Mỹ tagok tal tanut lac 100 ribau urang yaok harei, glong abih kuhria dalam 6 bilan tapa. Urang birau njom ruak ralo meng di dom labik hu urang klauk jru daok biar. Tui Pasak Pasang iek ruak kik saong Pacang caga jit ruak Mỹ, dom urang dương tính saong chủng Delta meblah 83% dalam taong abih urang birau njom ruak dalam tuk nan dom urang oh ka klauk jru meblah tal 97% dom urang ruak trak kayua njom Covid-19. Dalam tuk nan, urang metai jeng tagok 33% dut saong adit dahlau, kuhria rah tapa hu 377 urang metai yaok harei.

Hadei di tuk duah thau harak gar di 38.000 urang praong njauk COVID-19, dom urang roh duah di sang bac Đại học King’s College London hu mboh bruk karei gauk ka triệu chứng njauk ruak di likei haong kumei. Tui nan, likei bhian kan suak yava, glaih glar, yuh la-an haong pandiak. Daok urang kumei mbang huak oh daok mboh mbau hagait, pandik cada saong patuh rilo. Bhian di nyu, 3 triệu chứng cambaih laih di abih kayua virus SARS-CoV-2 nan lac pandiak, patuk rilo saong idung oh daok mboh mbau hagait.  Min dom urang ilamu mboh lac, pandiak oh lac kadha camereip di ruak di yaok umo thun, yaom lac pandiak lac sa kadha hu thau cambaih./.

Urang lang: M. Phương – Ái Nghiêm – 07/08 06:09:05