Thủ tướng Phạm Minh Chính hu panuac tacei pato 

Mesup ini 15/12/2021, di Hà Nội, Thủ tướng Phạm Minh Chính mai hu mbaok saong tacei pato Nyaom biai Ngoại giao mbang ka 31 ngan haong kadha “Ngoại giao Việt Nam nao dahlau, abih gah, bahrau, sami samar, lagaih, peih ngak jayah Sarak Nyaom roya mbang  XIII di Đảng”, hu peih tabiak tapak pambuak haong online.Bruk dunya salih karei biak samar saong srau kadau, rilo bruk bahrau yam tapa kuhria mboh dahlau, dalam nan njauk ndom tal di abih lac jit praong Covid-19 dui atah jaik 2 thun tapa, daok ngak kan kandah tal yaok gah dalam raidiuk, bruk ngak mbang, ngak huak, KTXH saong pambuak bruk dunya.Dalam tuk yau nan, tui dom jalan ngak, dom sarak di Đảng, pambuak haong pandar siam Chủ nghĩa Mác-Lê nin, jalan sahneng Ngoại giao Hồ Chí Minh, saong patagok bruk ngoại giao siam mekre, khang kadang di bangsa, gah Ngoại giao khang hatai tui jalan ngak sami samar, hadah krah, sahneng duah, pasiam dom kan kandah, yam tapa tavak tavaiy piah peih ngak samu gauk dom bruk praong di đối ngoại, meng nan mek hu dom jak jeng praong saong abih gah. 

MBan tacei jalan pakat negar hu peih mbang ginum biai haong dom tinh, bal di dah page ni piah ba tabiak jalan pacang caga ribuk Rai (tui kuhria meda nao tame tasik Biển Đông meng melam 17 tal dah page 18-12). Tui pathau khan di Tổng cục Pacang caga bala meng langik tasik, taong abih dom baoh sang oh salamat di dom tỉnh, bal jaik tasik Nam bộ lac 243.254 baoh sang. Mboh lac ini sa ribuk khang puac bilan, ong Trần Quang Hoài,Phó akaok mBan tacei jalan pakat negar ka pacang caga bala meng langik tasik ieu kakei Pasak kuhria mboh dahlau bruk langik tasik pakat negar rilo mbang brei thau ka ribuk. Tổng cục kaya ikan dalam ia saong dom gah chức năng pambuak tal njauk ieu kakei,  khan brei ka dom sruh gilai daok ngak bruk di tasik thau bruk rahtabiak di ribuk saong samar drah hu jalan langyah nao tal labik salamat.

Piah khik kajap siam mekre, salamat ka bhap bini raok tết Nguyên đán thun sak ramaong 2022, mesup ini, CA TP.HCM tabiak bruk tabung glaong cap mek dom janih tội phạm di rilo gah.Dalam vaktu meng ini tal abih harei 14/02/2022, CA TP.HCM pataom tame cap mek dom janih tội phạm pambuak tal bruk brei mesraiy trak laba, tội phạm pametai menuac, blah mek drap ar, me-in mbia, dom janih tội phạm gah jru phiel, kinh tế, tham nhũng. Gam haong nan,CA TP jeng brei patagok bruk khik iek di karja gah an ninh trật tự yau jhul samar bruk ngak CCCD saong pandar Cơ sở dữ liệu negar ka dân cư; patagok bruk khik kajap siam mekre, salamat bruk nao mai angaok jalan.

Tui Pasak pasang iek ruak kik tỉnh Đồng Nai, dom urang ruak COVID-19 trak, tui kuhria lac daok tagok saong dom kapul hồi sức tích cực tal 3 meda daok tapa prein. Dalam  15.580 urang ruak COVID-19 daok taong ruak hu 186 urang ruak trak, 102 biak trak, mbuan metai. Gam haong nan, dom urang metai kayua COVID-19 di Đồng Nai jeng tagok. Dalam adit tapa (meng harei 6/12 tal 12/12) hu 139 urang metai, tagok 76 urang dut saong aditdahlau di nan. Kuhria tal urak ini abih tih dom urang njom COVID-19 metai di Đồng Nai lac 1.079 urang. Sở Y tế tỉnh Đồng Nai hu likau Mintri Y tế daong jru pacang caga virus. Dom labik dalam tỉnh daok pasang iek, klauk vaccine ka urang ka oh klauk atau ka oh ginup 2 mbang. Gam haong nan, tỉnh daok pakhang dom kapul taong ruaknao mai ngak bruk samar drah saong tagok manuac ngak ka tal 2, tal 3 di bruk taong ruak 3 tal.

Anak bruk bak menuac ruak di dom sang iek ruak dã chiến, UBND tỉnh Trà Vinh bahrau brei padang gac 4 labik taduan tame taong ruak urang ruak COVID-19 hanjul, oh hu triệu chứng ngan saong 615 papan ndih iek ruak. 4 labik ini caik di dom huyện Châu Thành, Duyên Hải saong Tiểu Cần. Meng harei 14/12, tỉnh Trà Vinh brei padeih bruk ngak di dom bilai pasang iek y tế di dom pabah jalan tame tỉnh. Piah pasang iek jit COVID-19 dalam tuk siam mekre bahrau, tỉnh Trà Vinh brei patagok khik iek catang bruk nao mai, bruk tạm trú di bol bhap rahra, abih di nyu lac dom urang meng langiu tỉnh mai.

Tui khau tin di Mintri Y tế Campuchia, taneh ia ini bahrau duah mboh 1 urang njom biến thể Omicron nan lac sa rahra Campuchia daok matain adit ka 15 meng Ghana vaih tapa  Dubai, Thái Lan mai viek Campuchia harei 12-12.  Mintri Y tế Campuchia ieu kakei bhap bini peih bruk klauk jru caga Covid-19 ginup saong ngak biak catang adat pacang caga jit “3 khik caga – 3 oh” kayua Rajaei Campuchia ba tabiak.  

Bol bala Prang harei kabroi daok tabiak truh ban Tim-búc-tu (Timbuktu), yau brei mboh lac taneh ia ini daok patrun bruk hu mbaok gah quân sự di gah barak Mali hadei di jaik 1 pluh thun.  Bruk nan rah tabiak dalam tuk daok huac ka prein mesruh di bol bala Mali anak kol cực đoan, khủng bố daok peih praong bruk hu mbaok di gah meraong. Tui bol bala Prang, Mali brei khik sa kapul daok veik khang kajap di Tim-búc-tu, meng bruk daong di jaik 2 rabau 200 lin khik ramik sron mbon di Liên hợp quốc hu mbaok gam gam di labik ini.

Jabat yaom pataom taneh ia Italy (ISTAT) khan brei thau di harei 14/12, dalam thun 2020 di taneh ia ni hu 404.892 ranaih hu manek tabiak, trun 15.192 ranaih dut saong thun 2019. Tui jalan daok trun dalam thun 2021, tui nan tapa taka camriep dalam 9 bilan akaok thun brei mboh dom ranaih hu manek tabiak takik jang labaih 12.500 ranaih dut saong tukvak ini  thun 2020, makna lac kayua jit praong COVID-19. Tui ISTAT, dom anek tui kuhria di yaok urang kumei Italy trun daok 1,24 dalam thun 2020 dut saong tanut kuhria kac 1,17 saong ni lac sa dalam dom tỷ lệ bier abih di dunya./.

Urang lang: Thu Thảo -Mousaphuong -15/12