Dalam dua harei 26 saong harei 27 /12/2025 di Ha Noi peih bruk Meyaom anek saih, sinh vien, dam dra bangsa takik bac megru naih joi kayua Mentri Bangsa saong Agama pambuak haong Mentri Pato megru, UB Trung uong Mat tran Negar Viet Nam  peih tabiak. Thun ini, hu 145 anek saih, sinh vien, dam dara bangsa takik naih gheih hu palih ruah, lambaok ka 52 bangsa, mai meng 30 tinh, ban dalam negar. Dalam dom urang pok meyaom nan  hu rilo anek saih mek hu yai glong dalam mbang pakacah anek saih naih joi pakat negar, dunya; rilo adei hu palih ruah tame dom sang bac dai hoc, hoc vien pakacah mek hu tanut glong abih, lac urang dalam dara bangsa takik bac megru naih joi, joi rilo gah…

Meng harei ini 23/12/2025, Mac jamraih duah thau di blah web www.virigoods.vn di Mentri Kong Thuong hu ba tame ngak bruk, rik tame ngak brei cambaic laic  khaw tin kaya kan, khik kein laba ka urang blei pandar saong daong ka doanh nghiep cakrok patagok khang kajap. Tapa dom khaw tin cambaic laic yau nan tui dom jalan pasang ma QR, urang blei mbon thau kaya siam, dalam tuk doanh nghiep hu jalan ngak brei thau ka angan je, pacang caga saong takik gaok pandap ja.

Jalan peih drah samar Cần Thơ - Hậu Giang, di jalan peih drah samar di ĐBSCL (Cần Thơ - Cà Mau) hu ba tame pandar. Dalam harei akaok meti ba tame ngak bruk, jalan atah jaik 38 km gam dua labik tame saong tabiak jalan peih drah samar khik brei salamat. Yaom lac hu rilo radaih peih nao mai di dom tuk camereip daok takik, min hu jalan birau ngak brei bhap bini mboh chreih chrai ka urang peih radaih saong bhap bini di bhum taneran kraong Cuu Long. 

Tinh Dong Thap birau mbaoh harak Danak dak ngak pasiam veik ar kraong Tiền di xã An Hữu piah pacang bruk glut jaleih rah tabiak meng dom thun tapa, atah labaih 1.100 met. Bruk buh jien tame ngak danak dak piah pacang, caga glut jaleih  ar kraong Tiền di xã An Hữu lac biak njauk ngak, piah khik ka dom baoh sang di labik ini, drap ar sang danaok saong taneh pala drak ngak mbang di bhap bini; gam ngak brei labik tapen kraong Tiền saong pacang bruk glut jaleih.

UBND tinh An Giang daok payua tin SMS ka bruk pacang taong chap kaya ia suan hukum, oh khan brei thau saong oh ngak njauk tui hukum IUU tapa laik taka phone di mikva. Gam haong nan, gah chuc nang daok pathau khan, Hukum Thuy san, harak van ban tacei pato ngak tui Hukum Thuy sản, dom asar kadha ka bruk pacang caga taong chap suan hukum IUU. Gilai ikan nao ngak mbang di tathik brei tut angan, pasang iek, hu harak taong chap kaya ikan; meyah ngak suan taong phat jien tal 1 ti dong.

Dalam bilan 10, jien mek tame meng bruk pablei ameh tabiak negar langiu di Lien bang Nga tapa Trung Quoc kuhria hu 930 trieu USD saong bilan 11 tagok tal 961 trieu USD, brei mboh bruk pablei salih ameh ralo abih meng lavik mai. Kuhria abih tih dalam bilan 11 thun ini, Trung Quoc blei ameh tame di Lien bang Nga hu yaom jaik 2 ti USD, glong 9 mbang dut saong tukvak ini thun dahlau. 

Karja Tong thong Donald Trump patagok klau mbang jien daong ka urang tame negar suan hukum brei palih ruah jalan eng drei gilac veik nao palei, tagok 3.000 dola salih ka bruk 1.000 dola yau dahlau diah. Tui Mentri An ninh negar, paok jien daong nan hu brei ka dom urang daok suan hukum di Mỹ meyah urang tut angan  tabiak truh negar ini dalam thun ini. Hu brei jien harak ve kapal ahaok oh mek jien ka urang nao pablei negar.

Jabat Meriak gauk negar Italia taong phat kapol kong nghe Mỹ Apple 98 triệu euro, sumu 115 trieu USD kayua kadha pambak praong darak pasar  pandar ung dung phone tangin. Dalam harak pathau khan, jabat ini hu khan cambaic laic Apple ngak suan dom kadha karei di dom gah ngak tabiak ka 3 di hãng “ khik hu bruk App Store oh labik halei hu”. Tapa duah thau “ bruk kan kandah” di dom kadha khik ta-eng urang kayua Apple ba tabiak.