Tổng Bí thư Nguyễn Phú Trọng par akaok di nyaom biai ini 

Dah page ini 14/10, Mintri Chính trị hu peih nyaom biai brei thau cambaih saong ba tabiak bruk peih ngak sarak ka 23 di Mintri Chính trị ka jalan cak rok patagok kinh tế - xã hội, khik tani tanat quốc phòng, an ninh bhum Tây Nguyên tal thun 2030, pamaong tal thun 2045. Di nyaom biai ini, Tổng Bí thư Nguyễn Phú Trọng brei thau lac: Tây Nguyên njauk pamadeih saong patagok biak khang dom ilamo cach mang meng kan, hatai anit ranam taneh ia, sahneng duah jalan ngak bahrau, tự lực, tự cường saong hatai yam tagok khang kadang di urang jakar, urang dang saong bhap bini. Khang hatai yam tapa rup drei eng, klaak hatai oh khin kham marat, oh caga dahlau, tuk halei jeng pamaong tame bruk daong di Trung ương; khang hatai oh khin daok dalam kan kathaot, lah dom tinh, ban karei. Gam haong nan, patagok bruk daong di Trung ương, bruk pambuak gauk, bruk daong di dom tinh, ban dalam taneh ia piah cak rok patagok kinh te bhum biak samar saong khang kajap jang'.

Di Diễn đàn "Hatai caong di dam dara ban raya angan Wa” rah tabiak tuk mesup ini piah salam uan Nyaom roya Kapul dam dara Cộng sản Hồ Chí Minh Ban raya HCM mbang ka XI, ong Phan Văn Mãi – Chủ tịch UBND TP.HCM taong yaom, dam dara lac kapul ba akaok nao dahlau, daong ka TP ngak hu dom bruk ba tabiak saong lac prein khang praong dalam cakrok patagok KTXH saong mbeik drei yam tame dunya. Kayua yau nan ye, yaok urang daok ranaih umo brei hu hatai caong jak jeng saong kham merat piah ngak hu jak jeng. Kayua jak jeng di yaok urang meda daong tame jak jeng di puk paga, palei negar.

Dah page ini (14/10), di Phú Quốc, tỉnh Kiên Giang, Tổng công ty Điện lực gah Maraong peih bruk pambuak dien, hu điện áp 110 KV, tukvak 1 di danak dak jalan talei 220kV Kiên Bình - Phú Quốc.  Ini lac jalan talei tapa tasik di mangaok langik pabak điện áp 220kV atah abih di bhum Đông Nam Á, hu peih tabiak ngak camriep abih di Việt Nam, taong abih tih jien buh tame labaih 2.221 tỷ đồng. Bruk ngak salah tukvak ka 1 di danak dak ini hu daong khik kajap bruk pabak dien tani tanat, salamat, gam gam, hu chất lượng saong mek hu hatai jia di ban kaoh pulao.

Kayua ia ndik daok glaong jang tanut báo động III, bruk langik tasik kuhria mboh dahlau lac jhak saong hajan rilo, Sở Pato Megru TP Cần Thơ hu panuac lac dalam dua harei, harei ini saong harei pagaiy, dom labik pato bac brei hu jalan pato ka nyu lagaih piah khik salamat ka anek saih haong gru pato.

Ia ndik tagok ngak khat lahik labaih 2 tỷ đồng ka tỉnh Vĩnh Long. Dalam nan hu 530 baoh sang, 2 darak saong 1 labik ngak bruk di ủy ban bhap bini xã njauk ia dauk, labaih 20km jalan mbak nao mai, 35 ar pacang saong 25 gah ar njauk glut jaleih atah labaih 625m… ia ndik tagok daok ngak dauk yaok rituh ha mblang pala padai thu đông, njam patam saong baoh karuac. Urak ini gah chức năng daok ieu pataom kapul, pandap panda ngak pasiam dom labik njauk khut. Gam tui di nan jeng patui veik yaok pataom dom khat lahik piah hu sarak daong ka urang nong trun manieng kan kandah.

Ndom ka dom bruk cuh iek tên lửa gam gam di Triều Tiên, dalam nan hu bruk cuh iek bahrau abih rah tabiak tuk mesup ini (14/10), Tổng thống Hàn Quốc Yoon Suk-yeol brei thau, Hàn Quốc daok caga pacang yaok bruk di Bình Nhưỡng. Hàn Quốc hu ba 15 urang saong 16 kapul nyaom di Triều Tiên tame angan taong phạt, brei mboh dom jalan taong sa gah  mbang camereip abih di Hàn Quốc.

Yaok ribau urang di bhum Đông Nam Australia taduan hu panuac brei nao labik karei dalam harei ini piah plaih ia sua daok tagok glaong di rilo ban. Bang Victoria, daok dalam kan kandah trak damak di abih tuk ia sua samar tagok glaong, nduac tame bhum langiu di  banMaribyrnong di Melbourne, ngak brei kanja ba tabiak bruk ba rahra nao plaih. urak ini karja bang daok caga peih gilac sa pasak brei daok karei ka urang njauk ruak COVID-19 piah ngak labik daok ka dom urang nao daok plaih di bala.

Tui gah Y tế dunya (WHO), dom urang ruak dalam mbang tamuh jit ruak đậu mùa khỉ di mangaok dunya urak ini lac labaih 70 rabau menuac saong hu 26 urang metai. WHO ndom lac dom urang ruak bahrau di dunya hu takik veik meda lac tukvak "mbuan metai lahik di abih" dalam mbang tamuh jit ini, tuk dom jalan pacang caga oh hu peih ngak ginup. Châu Mỹ jeng daok hu dom menuac njaom ruak tagok rilo, meblah tal 90% dom urang ruak di dunya./.

 Urang lang: Thu Thao & M. Phuong – 14/10