UBND HCM birau tabiak harak brei patui veik bruk pa-atah di gauk dalam xa hoi abih ban raya tui Sarak 15 di Thu tuong Rajaei

Page ini 15/6, Mentri Y tế brei thau, Viet Nam hu 71 urang birau njom Covid-19 di 4 tỉnh, ban. Dalam nan, Bắc Giang hu 28 urang saong Ban raya Hồ Chí Minh hu 23 urang birau njom ruak. Kuhria tal 6 tuk page ini 15/6, Viet Nam hu abih tih 9.238 mbang urang njom dalam negar saong 1.643 urang tame negar. Urang birau njom mbak kuhria meng harei 27/4 tal ini lac 7.668. Urang metai lac 6, dalam nan urang taong dhit ruak lac 4.236.

Mintri Y tế bahrau hu harak samar drah ieu kakei UBND dom tinh, bal hu parabha vaccine mbang ka 3 pato tacei jak ba gah y tế saong dom kapul karei yau ye công an, bol lin… hu mbaok tame daong peih bruk klauk chip vaccine Covid-19 dalam labik, ngak salah dahlau di harei 15/8. Ni lac sa bruk ngak hu makna njauk ngak samar drah tui panuac pato tacei di Thủ tướng rajaei. Mayah oh samar ngak hu, ye ba vaccine ka dom kapul, tinh, bal karei. Tal urak ni, Việt Nam hu abih tih 1.552.651 mbang klauk vaccine caga Covid-19. Dalam nan hu jaik 60 ribau urang hu klauk ginup 2 mbang.

UB bhap bini Ban raya HCM birau tabiak harak brei patui veik bruk pa-atah di gauk dalam xa hoi abih ban raya tui Sarak 15 di Thu tuong Rajaei gam saong dom quy định cambaih laih. Tui nan, UB bhap bini Ban raya brei padeih dom nyaom biai, dom bruk pataom labaih 20 urang sa bilik, oh brei pataom rilo manuac meng 10 urang tagok langiu jabat ngak bruk, sang bac, sang iek ruak; manuac brei pa-atah di gauk labaih 2 mét di labik công cộng. Dom labik cửa hàng tiện ích brei peih pabah mbang min brei khik kajap bruk pacang caga jit, oh brei pablei labaih 10 urang dalam sa tuk haong gauk.

Dah page ni (15/6), pasak pasang iek ruak kik tỉnh Bình Dương brei thau, hu 12 urang F1 di urang njom ruak Covid-19 (BN 10584) lac po quan ia tea tasau angan “Cô chủ nhỏ”. Dahlau di nan, po quan ia tea tasau daok di ban sit Tân Uyên nao iek ruak saong mboh dương tính haong SARS-CoV-2. Urang diuk lac điều dưỡng ngak di jabat iek ruak Đa khoa Châu Thành (ban Thủ Dầu Một) jeng mboh dương tính. Tal melam 14/6, gah y tế brei thau lac hu 39 urang F1 saong 221 F2. Ban sit Tân Uyên peih bruk paatah di gauk tui sarak 16 meng di maong 12 melam 15/6.

Cục Cảnh sát hình sự - Bộ Công an brei thau, birau chap mek labaih 10 urang ma-in mbia, cá độ dat blong praong di Ban raya HCM haong yaom jien abih tih labaih 1.500 tỷ đồng. Urang angan Bùi Tuấn Anh ndih tapui thun 1990, palei Nam Định, urak in daok di TP.Thủ Đức tuk camereip taduan lac dang tabiak tacei pato kapol nyaom ca độ caoh mbanh meng kreh thun 2019 tal harei ini. Tapa duah thau, gah chức năng hu duah mboh rilo pandap yau: phao hoa cải, siuk đạn, ndao, dhong saong dom mac moc piah duh ka bruk ma-in mbia.

Tong Yam ndok Y tế dunya (WHO) Tedros Adhanom Ghebreyesus pok meyaom sanya di kapul 7 negar công nghiệp cak rok patagok (G7) pabak 870 triệu mbang vắcxin caga Covid-19 ka danak dak COVAX (danak dak neh rabha samu gauk vaccine kayua Liên hợp quốc saong dom negar pambuak gauk peih ngak). Tui WHO, yaok harei hu labaih 10 ribau urang metai kayua Covid-19, dalam nan châu Phi hu manuac ruak matai glaong jang saong meda hu brei klauk dahlau di abih dalam danak dak parabha vaccine Covid-19 di G7 rik pataom alin hadaih brei.

Thủ tướng Anh Boris Johnson brei dui atah veik tukvak peih ngak dom jalan pacang caga jit di Anh 4 adit tra, lac tal harei 19/7, dalam tuk biến thể Delta daok ngak ka urang njom tagok khang di rilo labik, tui kuhria mboh urang njom ruak tagok labaih 64% yaok adit. Dom labik y tế di taneh ia ini brei jhul khang bruk klauk jru vaccine, abih di nyu lac klauk jru mbang ka 2 ka dom urang umo labaih 40 thun. Langiu di Anh, dom taneh ia châu Âu karei yau Bỉ, Đức, Bồ Đào Nha… jeng daok mboh bruk njom mbak drahk samar di biến thể virut ini.

Brei pamuac di mbang họp báo harei 14/6 dahlau di tuk hu mbaok tame mbang nyaom pakat glaong abih kapul Bắc Đại Tây Dương (NATO), Tổng thống Mỹ brei thau lac 7 harei tapa, tui kuhria yaok harei Mỹ jeng daok hu 370 urang metai kayua Covid-19 saong negar ni daok yam jaik tal tanut biak pandik harao lac hu jaik 600 ribau urang metai kayua jit ruak. Yaom lac bruk klauk vaccine caga Covid-19 glaong abih di dunya, min Mỹ jeng daok hu rilo bruk njauk ngak piah taong tayah vi-rút mbuan metai menuac ini./.

Urang lang: Thu Thảo – Ái Nghiêm – 15/06 10:03:27