Việt Nam batabiak yaih khan harak passport vaccine thống nhất gam tui bruk xác thực điện tử

Harei ini lac harei quyền anek menuac dunya. Việt Nam daok ứng cử tame Hội đồng Nhân quyền vaktu 2023-2025 hu 47 taneh ia thành viên. Bruk ứng cử brei mboh hatai caong rik daong di Việt Nam tame jhul patagok dunya khik kajap dom quyền anek menuac dalam taong abih gah di Liên hiệp quốc (LHQ). Tanut patagok anek menuac di Việt Nam daok dalam kapul tagok glaong abih di dunya, jaik 46% dalam vaktu 1990-2019. Dom chuyên gia LHQ ndom lac, tanut di Việt Nam tagok biak khang, mai meng dom bruk brei ngak dahlau di Đảng, Karja saong rajaei Việt Nam dalam bruk dak padang, patagok quyền anek menuac, jhul patagok bruk samu gauk dalam xã hội. Lac taneh ia daok cakrok, Việt Nam kham merat dalam bruk patruh eik, patrun kathaot, pamaong tal cakrok khang kajap. Dom sang kathaot jaik 10% di thun 2015 trun daok 2,7% dalam thun 2020. Jien mek tame di urang kan kathaot jeng tagok jang dua mbang dalam 5 thun tapa.

Ndom ka bruk peih ngak "Passport vaccine" di Việt Nam, mintri Ngoại giao Việt Nam brei thau, kuhria tal akaok bilan 12/2021 hu dom taneh ia, dalam nan hu Japon, Hoa Kỳ, Anh, Australia, Belarus... hu njauk hatai brei pandar harak klauk jru di Việt Nam song dom tanut cambaih laih ka janih vaccine. Ấn Độ, Canada jeng njauk hatai gah nguyên tắc. Dom taneh ia karei dalam nan hu dom taneh ia ASEAN, Liên minh châu Âu, Trung Quốc, Hàn Quốc… jeng hu pasang iek song cang gah Việt Nam batabiak yaih khan harak passport vaccine thống nhất gam tui bruk xác thực điện tử. Việt Nam jeng dok brei công nhận harak klauk jru/passport vaccine di 78 taneh ia, bhum taneh hu yaih khan tal mintri Ngoại giao. 

Anak bruk jit ruak COVID-19 di TP.HCM daok tagok khang, piah khik kajap bruk iek glang, taong ruak F0 di sang, UBND TP.HCM hu panuac caong Mintri Quốc phòng pasang iek, daong pabak menuac di bol bala piah daong ka 179 bilai y tế nao mai ngan saong abih tih 537 quân y. Dahlau di nan, tuk akaok bilan 12, Sở Y tế TP.HCM hu pok panuac tagok UBND ban raya ieu Mintri Quốc phòng patui bruk daong khik ramik bruk ngak di 85 bilai y tế lưu động ngan saong 153 urang y tế tal abih bilan 12 ini.

Tui Sở Lao động-Thương binh song Xã hội tỉnh Đồng Nai, dalam tỉnh dok hu labaih 100 ribau urang ngak oh ka nao ngak veik. Makna lac kayua urang ngak mai palei nyaih jit, tal urak ni oh mai veik sang mac ngak bruk song kayua anek bhik di urang ngak dok bac di pakat mầm non, tiểu học oh ka nao bac veik. Langiu di dom urang ngak oh ka mai ngak bruk veik, meng ni tal abih thun 2021, dom doanh nghiệp dalam tỉnh daok caong hu jiak 17 ribau urang ngak bahrau. Jiak abih dom gah dok kurang menuac ngak, min rilo di abih jeng lac gah jhik song gah ngak takhaoh. Piah pasiam veik bruk kurang urang ngak, Sở lao động thương binh xã hội Đồng Nai hu dong rilo abih ka dom doanh nghiệp dalam bruk palih ruah. Pasak Dịch vụ ngak bruk tỉnh jeng mbaoh tangin tame pambuak bruk hadar song dom pasak Dịch vụ bruk ngak di 10 tỉnh gah Tây Nam Bộ, Nam Trung Bộ, Tây Nguyên piah dong ba urang ngak tal Đồng Nai ngak bruk.

Tukvak tapa, rah tabiak rilo bruk bhap bini njauk kol bleik mek angan lac jabat Công an, Viện Kiểm sát, Tòa án, urang randap haong menuac ngak praong, pakat glaong piah pachot, blah mek drap ar tui rilo jalan pachot karei di gauk. Dom jalan bo kol bleik saleik bhian ngak lac pandar dịch vụ hu bruk ngak ja đầu số, ngak ja số điện thoại, mek angan urang jakar di jabat chức năng ieu phone tal bhap bini piah kateik greik, ngak brei huac, blaoh hadei di nan ieu payua jien tame tài khoản hu kol nyu ba tabiak piah blah mek jien ndo. Kayua yau nan ye, Mintri Công an kakei bhap bini brei paglaong hatai sangka, oh brei thau thông tin, laik phone, labik daok di drei ka urang halei drei oh thau cambaih, abih di nyu nan lac oh pang tui panuac di kol nyu, oh payua jien tame dom tài khoản hu kol nan ba tabiak.

Urang brei panuac mintri Ngoại giao Trung Quốc Uông Văn Bân bahrau hu panuac lac Australia, Anh song Mỹ meda njauk bayar yaom ka dom bruk ngak suan tuk khang hatai oh brei kapul nyaom rajaei tal Thế vận hội bilan brak rah tabiak di Bắc Kinh di bilan 2/2020. Ni lac panuac bahrau di abih brei mboh bruk catang tagok gah ngoại giao di Trung Quốc, Mỹ song dom taneh ia karei.

Jabat khik ramik jru tavao châu Âu (EMA) brei thau, jaik abih dom urang njaom anek ruak Omicron tal urak ini meda lac njul, min jeng brei caik hatai duah thau, anek ruak ini meda ngak brei ruak trak tagok halei oh. Gah Y tế Thế giới (WHO) jeng brei thau, anek ruak Omicron daok njaom mbak khang di châu Phi, min mboh lac dom urang tame sang iek ruak di Nam Phi biak takik. Urak ini anek ruak Omicron daok hu mboh di 57 taneh ia saong bhum taneh angaok dunya.

Negar Anh dok rah tapa mbang tamuh jit kum menuh ada trak di abih kuhria meng dahlau mai, ngan song 36 sruh jit hu duah mboh song labaih 500.000 drei menuh ada njauk am cuh klaak. Dom mbang tamuh jit nan meda pambuak tal dom janih cim glai mai daok tui bilan. Sa labik pacang caga kum menuh ada di negar ni bahrau hu padang ngak, dalam nan hu panuac ieu dom trang trại song urang rong njauk pataogk dom jalan siam mekre sinh học. Jabat Tiêu chuẫn pandap mbang di Anh brei thau, tui dom roh duah urak ni , kum menuh ada takik ngak brei jhak pandap mbang ka urang blei mbang di Anh song hu salamat meyah menuk ada song dom pandap ngak meng menuk ada hu ngak tasak./

Urang lang: Hani Pha – Bhumi – 10/12 19:00:00