Di var roh duah danak dak padang dua sang ga ala taneh Phạm Văn Bạch saong Lê Thị Riêng daok dalam danak dak metro ka 2 Bến Thành – Tham Lương, Phaok akaok UB Bhap bini Ban raya HCM Hoàng Nguyên Dinh brei thau ban raya HCM daok ba tabiak jalan ngak tal thun 2030 brei salah jaik 260 km jalan pasei ban medin, gam haong nan pandar dom labik pataom tame jhul samar tukvak ngak, kham merat salah blaoh jalan metro Bến Thành - Tham Lương dalam thun 2029, aval drah 1 thun dut saong jalan ngak ba tabiak.

Chinh uy Quan khu 7, Trung tuong Trần Vinh Ngọc hu payua harak thư meyaom urang jakar, chien si saong dom bol lin Ngak bruk 500 harei melam duah pataom atau talang liet si, gam kakei lac “oh padeih tuk atau talang dom liet si oh ka duah pataom hu”. Kuhria tal harei 4/8, dom urang jakar bol lin duah pataom hu 638 atau talang liet si. Bruk mek mau AND hu ngak salah blaoh di 45 dalam 58 kubo liet si, labaih 33.600 kubo hu mek mau. Langiu di nan, bruk ba tame taka so ho so liet si hu peih ngak njauk gam labaih 100 tai khoan ba tame ngak.

So Bangsa saong Agama ban raya Can Tho bahrau peih bruk pabak ilamo ka labaih 470 urang hu angan je. Tapa dom var pabak ini kapul urang hu angan je patui veik paglaong bruk lac “talei pambuak” khang kajap di karja saong rahra; gam haong nan pandar siam lagaih dom ilamo hu pato pakai tame tapak, daong pathau khan, jak ba mikva ngak siam jalan di Ndang, sarak, hukum di Karja, padang palei pala dak harei dak patagok.

Kong an xã Thuận Lợi, Ban Đồng Nai( dahlau diah lac huyen Dong Phu, tinh Binh Phuoc, duah mboh ong Nguyễn Văn Khỏi (ndih tapui thun 1961) daok sa drei eng dalam baoh sang khik iek apuh di puk Thuận Phú. Ong Khỏi  oh hu harak ba-ar hagait di rup tok kanal palei “Xóm Chủ, huyện Gò Công, tỉnh Tiền Giang”. Hadei rilo bilan duah thau, paang iek  du lieu rahra, Kong an  xã Thuận Lợi pambuak hu haong baoh sang ong Khởi, urak ini daok di xã Cần Giờ, TP.HCM. Hu bol lin kong an daong duah bo ong Nguyễn Văn Khỏi duah mboh sang danaok hadei 48 thun diuk rai ta-eng.

Jabat kong an daok ngak bruk haong urang khik uranaih hu mboh dalam video taong paoh, pandar talei su paneh tame takai uranaih. Sang bac mam non hu pambuak jeng njauk brei padeih ngak bruk. Dahlau nan, VOV ba khau tin, di angaok mang xa hoi rah tabiak 2 video cuak gilac bruk sa urang khik uranaih puac pa-ua saong gam gam pandar tangin taong tame akaok, tame tangin uranaih kamei tuk uranaih daok hia. Urang ini daok craok kaya mbang gam gam ka kamuan tuk kamuan oh ka padeih hia. Tuk kamuan oh ka ciuk gindang, urang ini daok pandar talei su cuk tame takai blaoh paneh.

Labaih 151.000 anek saih di Campuchia jaik tame mbang pakacah THPT. Urak ini, bruk pacang cakak bleik saleik dalam pakacah lac sa dalam dom bruk njauk ngak dahlau. Langiu gru iek bilik anek saih pakacah, gah pato megru Campuchia brei labaih 5.000 urang tui iek ta-eng piah khik brei njauk adat saong pacang caga dom bruk bleik saleik dalam mbang pakacah THPT. Langiu di nan, dom urang ngak bruk meng urang jakar tal rilo jabat, pakat trung uong saong karja bhum palei jeng hu mbaok di dom labik pakacah.

Uy mban chau Au daok ndaom biai haong Tay Ban Nha ka sa paok daong jien padai pabak ka Ceuta, hadei tuk labaih 72.000 urang panduan patruh tapen negar meng Maroc tame bhum taneh ini dalam tukvak katut panak. Urak ini labaih 70.000 urang hu gilac Maroc saong hu takik abih 88 urang metai. Min, yaok ribau urag jeng daok gilac Ceuta. Kapul oh rajaei Luna Blanca hu rabha brei labaih 12.000 paok mbang ka urang panduan labik daok dalam dom harei jaik ini.

Dom menyek ga khik piah di Lien minh chau Au (EU) urak ini biar abih kuhria meng thun 2011 mbiah tal ini, ngak haduh hatai ka bruk kurang pabak saong yaom menyek tagok glong di bilan La-ar anak tal. EU pambak tame dak harei dak praong tame khi ia hadei cakak trun bruk blei khi cuh meng Nga. Bruk cuang kandah  di Trung Đông jeng ngak klaik klaok bruk pajeng ba menyek tapa eo tathik Hormuzm tame chau Au./.