Nyaom biai hu mbaok di dom urang nong ngak mbang, pablei salih naih joi hu angan je dalam taneh ia

Nyaom biai pok mayaom urang nong ngak mbang, pablei salih naih joi dalam taneh ia mbang ka VI, tukvak 2017 - 2022 saong ginum biai urang nong dalam taneh ia mbang ka VII meda hu peih tabiak di Hà Nội dalam 2 harei 12-9 saong 13-9. Nyaom biai hu mbaok di labaih 300 urang nong ngak mbang, pablei salih naih joi hu angan je dalam taneh ia dalam 5 thun tapa. Urang praong thun di abih lac ong Ngô Văn Bạn daok di xã Mỹ Phú, huyện Thủ Thừa, tỉnh Long An, umo 75 thun, ranaih di abih lac ong Ngọc Tuấn, ndih tapui thun 1991 daok di ban sit Liên Nghĩa, huyện Đức Trọng, tỉnh Lâm Đồng – pala njam tui jalan công nghệ glaong mek hu tanut chuan VietGAP, pambuak gauk padang hợp tác xã.

UBND tỉnh Bình Thuận bahrau tacei pato dom jabat dalam tỉnh patagok peih ngak dom bruk pacang caga tong chap kaya ikan suan hukum , oh pathau khan, oh njauk tui hukum (IUU). Dalam nan, khang hatai, oh brei tabiak tasik ngan song kapan gilai oh ginup tanut tong chap,oh khik hu siam mekre salamat tuk ngak bruk mangaok tasik; Kapan gilai atah meng 15 m tagok, min oh caik jamriak VMS oh brei tong chap. Bộ Chỉ huy Bộ đội Biên phòng brei jhul khang bruk pasang iek, duah thau, pataom mek chứng cứ piah ngak harak hồ sơ song langayah catang kapan gilai lih tapa bhum tasik negar langiu.

Piah khik caga takai tasik daok njauk glut jaleih biak khang, tỉnh Bến Tre hu peih ngak iek danak dak “Kè trun manieng riyak daong khik takai tasik labik cồn Bửng, xã Thạnh Phong, huyện Thạnh Phú", haong yaom jien ngak abih labaih 14,8 tỷ đồng. Tapa 2 thun ba tame pandar, labik ini oh daok glut jaleih. Hệ sinh thái, phun gilai daok tamuh veik di mbaok cuah bãi bồi. Labik nan oh njauk lac piah pacang caga glut jaleih, khik caga taneh tapen tasik bo daok ngak brei mekre mbaok meta piah cak rok patagok bruk du lịch tasik. Jak jeng di danak dak ini lac sa bruk pilih ruah piah ka pak ini meda patui veik pandar ngak siam bruk pacang glut jaleih di dom labik karei.

Dalam tuk padeih lễ Quốc khánh, ban raya Hồ Chí Minh hu klauk vaccine COVID-19 brei ka labaih 15.500 rahra. Dalam nan, hu labaih 7.000 uranaih.Tal tuk vak ni, Gah Y tế dunya khan lac, vaccine lac jalan siam di abih dong khik caga anek menuac anak bruk njom mbak di jit COVID-19. Gah y tế ban raya brei thau, tuk halei jeng nao gam song amaik ame piah iek glang song khik caga pren yava ka dom uranaih anak dom kan kandah kan si thau dahlau di jit prong COVID-19.

Patui veik khaw tin ka bruk apui khuah quán karaoke di phường An Phú, ban Thuận An ngak brei 14 urang metai, ong Võ Văn Minh, Akok UB bhap bini tỉnh Bình Dương hu harak tacei pato dom gah chức năng brei pataom tame pasang iek kayua meng halei pui khuah saong samar pasiam veik dom khat lahik di bruk khuah, ngak brei cambaic bruk di dom urang, gah pambuak tal, langyah catang bruk ngak suan ( meyah hu); Samar duah thau cambaih angan je di urang gaok bala…Dahlau di nan, Thủ tướng Rajaei hu công điện klak rabha saong gauk gar baoh sang dom urang gaok bala; saong iew tỉnh Bình Dương samar pasiam dom khat lahik hadei apui khuah./.

Di Hàn Quốc, bruk tong gauk di dalam sang bac dok tagok, hadei di tuk dom sang bac peih pabah mbang veik. Tui pasang iek di mintri pato megru Hàn Quốc, 1,7% anek saih lac urang njauk bala di bruk taong paoh di sang bac, tagok 0,6% dut song thun 2021 tuk jiak abih dom sang bac brei anek saih bac online kayua COVID-19. Mintri pato megru negar ni daok caga sa jalan ngak piah pacang cakak tong paoh di sang bac dalam taneh ia di bilan 2 thun hadei. Gam song nan, brei peih ngak dom bruk pacang cakak puac lac mangaok mạng.

Tổng thống Mỹ Joe Biden jeng ka oh ba tabiak panuac puac di abih ka bruk ba Nga tame angan dom taneh ia daong khủng bố halei oh. Thư ký báo chí Nhà Trắng brei thau, mayah Nga njauk ba tame angan dom taneh ia daong khủng bố, bruk ini meda ngak brei klaih klaoh dom bruk pablei tabiak negar langiu pandap mbang saong ngak kan kandah tal dom sanya pajeng pandap panda tapa Biển Đen. 

Rajaei Brazil hu panuac ieu Tập đoàn công nghệ Apple (Mỹ) padeih pablei di negar Mỹ Latinh ni, tong abih dom janih điện thoại iPhone bo oh brei gam bộ sạc pin. Langiu di nan, Mintri Tư pháp Brazil jeng tong phạt Apple 12,2 triệu real (labaih 2,38 triệu USD) song makna lac Apple dok pabak sa pandap oh ka siam abih ka urang pandar. Dahlau di nan, puac thun 2021, Jabat khik caga urang pandar Brazil hu tong phạt 1,9 triệu USD ngan song Apple hadei di tuk pasang iek bruk ngak di hãng ni pablei iPhone 13 oh brei bộ sạc./.

Urang lang: Hani Pha & Thu Thao – 07/09