Bruk ba ong Lê Hoà Bình nao kubo hu rah tabiak di tuk mesup ini 2/4

Thun 2021, dalam tuk jit prong COVID-19 rah tabiak srau kadau song kan thau dahlau hu, 12 tỉnh hu ba tabiak bruk ngak prong, pataom tame tacei pato, peih ngak pakhang, “gam pacang caga jit siam lagaih, gam pataom tame ramik pasiam patagok kinh tế - xã hội”, bruk patagok kinh tế (GRDP) di 9 dalam 12 tỉnh hu tanut patagok siam , dalam nan glong di abih lac Bạc Liêu 5,05%. Khaw tin ni hu batabiak di nyaom biai pataom iek veik bruk peih ngak tui harak sanya pakacah gauk thun 2021 song batabiak jalan ngak di thun 2022 Cụm pakacah dom tỉnh Tây Nam bộ (Cụm pakacah) kayua tỉnh Kiên Giang ngak cụm trưởng peih ngak di ban Phú Quốc

Ong Nguyễn Xuân Phúc, akaok negar, hu mbaoh tangin tame harak brei pok Huân chương Lao động hạng 3 ka ong Lê Hoà Bình, Phó Chủ tịch Thường trực UBND TP.HCM ka bruk ngak hu praong dalam pacang caga jit COVID-19, rik daong tame bruk dak padang chủ nghĩa xã hội saong khik caga taneh ia, palei negar. Di tuk jit ruak COVID-19 tamuh khang, ong Bình hu brei bruk iek gah padang ngak saong ramik pasiam dom sang iek ruak dã chiến saong brei ngak dalam samar drah. Meng kham merat abih drei, dalam jaik 3 bilan, ong Lê Hoà Bình haong dom gah chức năng di TP.HCM hu padang 16 sang iek ruak dã chiến hu 37.000 papan ndih, rik daong praong tame jak jeng di bruk pacang jit di TP.HCM. Mesup 29/3, radaih ô tô pajeng ong Lê Hoà Bình nao ngak bruk ye gaok bala angaok jalan cao tốc TP.HCM - Trung Lương. Yaom lac hu dom bác sĩ cấp cứu samar drah min ong Lê Hòa Bình oh tapa truh. Bruk ba ong Lê Hoà Bình nao kubo hu rah tabiak di tuk mesup ini 2/4.

Tỉnh Sóc Trăng bahrau peih bruk dong padang ngak sang dok ka sang kan kandah gah sang dok mbang 2/2022. Tui pathau khan di mban tacei jalan jak ba dong padang sang dok ka sang kan kandah gah sang dok, tong abih sang kan kandah gah sang dok di tỉnh hu brei adat padang ngak sang dok lac 3.240 boh sang. Urak ni, tỉnh Sóc Trăng dok 1.972 sang caong hu sang dok samar drah. Kayua yau nan ye, dalam mbang ka 2 ni , tỉnh daok jhul khang bruk jak ba piah dong padang ngak sang dok ka sang kathaot, kham merat tal puac thun 2022 ngak salah bruk padang sang dok ka dom boh sang caong hu sang daok chip.Di tuk peih ngak, dom kapul nyaom , menuac urang, urang ngak pahla , doanh nghiệp dalam song langiu tỉnh hu dong ka tỉnh Sóc Trăng labaih 33,7 tỷ đồng piah peih bruk padang ngak sang dok ka boh sang kan kathaot .

Ong Trần Quang Lâm – Yam ndok Sở jalan mbak pajeng ba TP.HCM bahrau mbaoh tangin tame harak brei ngak danak dak padang ngak, peih praong jalan roya 50 (huyện Bình Chánh). Tui nan, labik akaok jalan lac labik gaok jalan Nguyễn Văn Linh, jhung jalan tal labik gaok tỉnh Long An. Abih tih yaom jien piah padang ngak lac labaih 1.498 tỷ đồng, mek meng kadung jien karja pakat negar saong kadung jien karja ban raya. Tukvak padang ngak lac meng thun 2022 tal thun 2024.

Khaw tin meng Chi cục rong glang song Thú y tỉnh Kon Tum brei thau, sruh jit kum menuk ada H5N1 bahrau duah mboh di sang rong di muk Phạm Thị Thủy, tổ 1, phường Ngô Mây, ban Kon Tum. Ni lac, sruh jit kum menuk ada H5N1 camereip hu Chi cục rong glang song Thú y tỉnh Kon Tum brei thun meng di akaok thun 2021 mbiah tal ni . Hadei di tuk hu thau tapa dut iek meng Chi cục Thú y bhum 5, jabat chức năng hu peih bruk pasang iek song dong ka sang muk Thủy peih bruk pametai tapol menuk ada abih tih lac 1.700 drei menuk ada.

Gah Y tế dunya (WHO) harei 30-3 brei thau jalan ngak bahrau pamaong tal bruk tamat abih bruk khẩn cấp di dunya ka jit Covid-19. Dalam bruk pacang caga saong kuhria caga ka jalan ngak praong ka 3 ka jit Covid-19, WHO ndom lac jit praong ini jeng daok lac bruk srau kadau di dunya, gam haong nan, ba tabiak 2 jalan ngak praong, lac patrun dom urang njauk ruak saong taong ruah hu siam dom urang njaom Covid-19 piah patrun, patakik dom menuac metai. WHO brei thau, piah ngak hu 2 bruk ini tapa bruk patagok pasang iek saong tui iek, pasiam bruk samu gauk ka parabha vắc-xin angaok dunya, pakhang pasiam bruk iek glang prein yava saong pabak bruk y tế, jeng yau bruk pataom mek roh duah saong langyah dữ liệu.

Harei 01/04, Thượng Hải, ban hu labaih 25 triệu menuac di Trung Quốc hu peih prong bruk pacang veik song dut iek tal jiak abih rahra piah pacang cakak bruk njom mbak di Covid-19. Mbang dut iek ka 2 hu tong yaom lac prong jang song kan kandah jang tuk pagam tal labaih 16 triệu urang di 12 quận.

Gah pakauk pandar vũ khí hóa học brei thau lac Mỹ caga ngak salah bruk kuhria palai klaak kho vũ khí hóa học puac abih hu khan brei thau di taneh ia ini. Mbiah tal harei ini, Mỹ hu ngak blaoh bruk palai klaak dom janih vũ khí hóa học nyaom 2 saong 3, gam haong nan, brei palai klaak 97,65% dom vũ khí hóa học nyaom 1 – lac nyaom nguy hiểm di abih./.

Urang lang: Hani Pha – M. Phương – 02/04