Di mbang Nyaom biai ka 15 Mbang Pato tacei pakat Negar ka bruk pacang caga taong mek ikan hadang suan hukum, oh khan brei thau saong oh ngak tui adat hukum (IUU) rah tabiak di biar harei 30/9, Thu tuong Phạm Minh Chính brei mboh ka hatai kham merat pacang cakak taong mek IUU, kakei dahlau ka bruk njauk pacang cakak bruk taong mek IUU, meng ini tal harei 15/11/2025 brei patruh klaoh bruk ini yau hu kakei dahlau bruk pacang cakak bruk kaya ja, kaya ngak mblah, pandap mbang ja, jru taong ruak ja. Dom urang oh ngak tui ye njauk taong bhat tui hukum; mentri, dom gah, karja palei halei oh ngak siam ye njauk taong bhat tui njauk Sarak 32 di Mban Bi thu.

Harei 1 bilan 10 yao thun hu LHQ palih ruah ngal Harei Dunya Urang taha umo piah paglong jalan sahaneng, pahadar urang sangka iek daong saong langyah dom bruk di urang taha di dunya. Pachreih tui Harei Dunya Urang taha saong peih ngak Bilan ngak bruk daong Urang taha thun 2025 di Viet Nam ngan haong kadha “ Sangka iek glang urang taha saong patagok  bruk  ngak di urang taha umo - Brei kuhria caga bruk bhap bini rahra umo taha”, rik tame peih ngak danak dak pakat negar ka Urang taha umo, Bruk khik caga, ike glang saong pakajap prein yawa.

UB Bhap bini Vinh Long bahrau peih ngak danak dak Jalan barak Meraong hu yaom 250 ty dong. Jalan ini jeng “jalan pambuak” di dom labik, labik ngak kong haong lamnge, tatua saong dom bhum kinh te hu makna, brei patrun jien pajeng ba, dui katut tukvak pajeng kaya saong dui pachreih phun jien buh tame. Ini lac sa dalam dom danak dak hu makna, ba tui makna ka chinh tri, kinh te, xa hoi; gam haong nan lac danak dak salam uan Nyaom roya lambaok vakil dalam negar mbang ka XIV di Ndang.

So Pato megru Ban Can Tho pambuak haong Kapol Pachreih bac peih bruk jak ba bac megru luac rai, ngak tui harei Pachreih bac Viet Nam.  Dalam thun bac dahlau, Ban Can Tho pato bac pakat mam non ka uranaih umo 5 thun; pato bac pakat tieu hoc tanut 3; pato bac THCS tanut 2 saong pato akhar huroh tanut 2.

Urak ini taong abih 61 labik y te hu caneing ruak di ban Can Tho hu peih ngak jak jeng harak gar ruak hakik tui ndien tu (EMR). Bruk pandar harak gar ruak hakik ndien tu ba mai rilo kein lagaih ka bhap bini, urang ruak, dom labik y te jeng yau kapul y bac si. Urang ruak takik abih tukvak, oh daok pataom khik rilo harak gar; bac si mbuan thau ka sajarah pasang iek ruak saong taong ruak di urang ruak piah ba tabiak jalan langyah samar saong njauk.

My daok ba tabiak jalan patrauk labaih 400 urang Iran, jaik abih dom urang nan tame negar suan hukum, meneing lac bruk pacang urang negar karei tame di Tong thong My Donald Trump. Bruk patrauk urang tame negar suan hukum lac sa dalam dom bruk takik mboh di My saong Iran hadei rilo bilan ginum biai. Tong thong My kuhria patrauk biak rilo urang daok di negar My bo oh hu harak gal. Tame bilan 2, My patrauk 119 urang mai meng dom taneh ia karei, dalam nan hu Iran, Panama tui ginum biai di dua negar.

Gam haong Trung Quoc, dom negar Dong Nam A yau ye Thai Lan, Myanmar, Campuchia saong Lao hu gam gam tame bruk taong tayah dom labik chot pagat praong, rilo meng lac bruk ngak di labik tapen negar. Tui kuhria, labaih 7.000 urang, dalam nan hu rilo rahra Indonesia, hu ba tabiak patruh dom labik chot pagat di Myanmar. Min, kuhria jeng daok labaih 100.000 urang njauk mek kareik dalam dom labik ini. Myanmar jeng bruk pandiak ka dom kapul duas tapa negar pandar labik chot pagat.

Gah pathau khan Mexico ba khaw tin, hajan praong harei 27/9 ia tagok glong labaih 1mét 1 nan ye brei panduan ba bhap bini rahra di bang Mexico nao labik karei. Dom bhap bini khan lac urang gaok khat lahik trak harei ribuk ia sua nan. Karja bhum palei ini brei manuac mai ramik ngak hacih sang danaok saong pruh jru pametai anek ruak. Ini lac sa dalam dom mbang hajan praong abih dalam dom pluh thun tapa saong lac mbang hajan praong abaih di bhum do thi./.