Yaom pabui diuk trun khang dalam bilan 10 thun 2020, biar di abih dalam sa thun tapa

Mesup ni (19/10), Jabat rajaei  peih bruk rik pataom dong ka bhap bini bhum Trung Bộ dok gaok rilo khat lahik kayua hajan ia sua biak khang. Hu mbaok di Thủ tướng Nguyễn Xuân Phúc, dom  Phó Thủ tướng rajaei song irlo urang jakar,  urang ngak di jabat rajaei. Dahlau di nan, Thủ tướng rajaei hu brei bruk ka  Mitri jien padai buh brei 4.000 tấn brah meng gilang khik piah di negar brei ka dom tỉnh: Quảng Bình, Quảng Trị, Thừa Thiên Huế song Quảng Nam piah dong ka bhap bini di bhum gaok bala.

Page 19/10, di Hà Nội, Mentri Ngak nong saong Patagok palei pala pambuak saong dom urang di Gah pambuak bruk Patrun bala meng langik tasik peih bruk ginum biai jak ba dunya rik daong ka bhap bini dom tỉnh bhum kreh negar njauk khat lahik kayua ribuk ia sua. Di Viet Nam meng kreh bilan 9 mbiah tal ini, hu 3 mbang ribuk saong 2 mbang áp thấp nhiệt đới rah tabiak gam gam  di tasik Biển Đông, ba tal hajan khang labaih 1.000 mm dalam rilo harei. Ia sua praong rah tabiak di 14 kraong praong di dom tỉnh meng Quảng Bình tal Quảng Nam. Urak ini daok hu sa áp thấp nhiệt đới di tasik Biển Đông, tui kuhria mboh dahlau meda hu hajan praong di dom tỉnh bhum kreh negar, ba tal ia sua kateik angaok ia sua. Labaih 7 trieu bhap bini di labik nan laik tame kan kandha. Jabat thường trực Mban tacei jalan pakat negar ka pacang caga bala meng langik tasik taduan hu bruk sanya daong di Pasak ASEAN, Dom Đại sứ quán: Nhật Bản saong Hoa Kỳ di Viet Nam saong Danak dak Patagok Liên Hợp Quốc (UNDP) di Việt Nam.

Kayua hajan ribuk dui atah labaih sa adit gam, rilo puk palei di  tỉnh Kiên Giang njauk khat lahik yaok tỷ đồng. Labaih 1.330ha padai hè thu njauk jaoh jaleih, dauh ia, 1.700ha njam patam njauk khat lahik trak; labaih 6.300 boh sang njauk ia dauh, 3 boh sang jaleih abih. Hajan ribuk ngak ka 115 sang bac  song rilo labik ngak bruk di karja dauk ia; 74,8km jalan nao mai dalam palei di huyện U Minh Thượng ia dauh dalam…. Chi cục Thủy lợi tỉnh Kiên Giang brei thau tỉnh hu tacei pato dom huyện, xã gaok bala samar peih dom jalan pacang cakak, pacang ia dauh khik caga mblang taneh padai njauk jaoh jaleih piah patrun khat lahik.

Yaom pabui diuk trun khang dalam bilan 10 thun 2020, biar di abih dalam sa thun tapa. Dut saong bilan dahlau, yaom pabui diuk trun meng 10.000 tal 23.000 đồng sa kilo. Langiu di bruk pabuipablei biak rilo, daok hu bruk urang raong pablei pabui oh ka praong, oh ka tal tuk pablei piah plaih jit tả pablui châu Phi. Di dom tỉnh Gah Meraong, yaom pabui meng 70.000 tal 72.000 đồng sa kilo. Tui yaom nan, urang raong khat kayua blei pajaih labaih 3 triệu đồng sa drei, oh ka kuhria jien blei pandap mbang saong  jien pah manuac jeng tagok glaong. Tui dom urang ilamu, gah thú ý njauk brei khik catang bruk pabui blei tame tapa Campuchia, kayua Thái Lan daok tamuh jit ruak tả pabui châu Phi saong jit pabui tangi hijao.

Tổng Công ty Bưu điện Việt Nam brei thau lac oh mek jien pajeng ba pandap dong di bhap bini  song dom kapul nyaom, doanh nghiệp dalam negar  payua tal dom tỉnh Quảng Bình, Quảng Trị, Quảng Nam, Thừa Thiên Huế tal abih bilan 10. Tui nan, Bưu điện dom tỉnh, ban peih bruk ba pandap pandar, jru iek ruak, pandap dong praong saong rilo… meng tong abih dom kapul nyaom menuac urang tal bhap bini di bhum gaok bala payua tal Ủy ban bhap bini, Mặt trận negar, Hội chữ Thập đỏ dom tỉnh, ban  njauk bala. Hadei di nan Bưu điện samar ba tal yaok labik  urang taduan di dom puk palei..

Meng hu 49% blah phiếu buh brei, Công đảng di Thủ tướng New Zealand - Jacinda Ardern janeh khang, lac bruk oh ka bhian mboh dalam bruk palih ruah di taneh ia Thái Bình Dương ini. Thủ tướng Ardern hu dunya taong yaom glaong kayua langyah hu bruk cuh phao pametai rilo menuac di sa urang tui chủ nghĩa iek praong kalik pataih di Christchurchdi thun blaoh.

Dom mbang trun jlan cagar veik rajaei daok patuh tabiak di Thái Lan song hu mbaok di yaok pluh ribau urang bo rilo meng lac urang ranaih umo di rilo labik karei song bruk ni tok rah tabiak  di ban ine Bangkok yau dahlau di nan. Yau nan lac 4 harei gam dom mbang trun jalan praong rah tabiak di grauk labik  di Thái Lan, yaom lac rajaei negar ni tabiak adat oh brei pataom gauk tapa  4 urang.  Urak ni hu 50 urang njauk chap khik, cảnh sát dok pandar nding ia pruh khang piah pateok urang trun jalan.

Tổng thống Iran Hassan Rouhani brei thau, taneh ia ini hu pablei salih phao ndao meng harei 18/10 kayua bruk pakauk pajeng ba pahao karaong vũ khí di Liên hiệp quốc padeih tui thỏa thuận hạt nhân hu mbaok tangin di thun 2015 yaom lac hu bruk cagar veik khang di Mỹ. Ong H.Rouhani brei thau, ini lac sa dalm dom bruk ngak hu di thỏa thuận hạt nhân ngan saong jalan ngak haong gauk di taong abih gah (JCPOA). Tui nan, Iran ngak sit veik danak dak hạt nhân piah salih mek bruk klak dom jalan taong phạt dalam nan hu bruk pakauk vũ khí 5 thun hadei di tuk thỏa thuận nan hu brei tapa./.

Urang lang: Ái Nghiêm – Hani Pha- 19/10 15:33:54